NUNNOPNA - PENTHAH

NUNNOPNA - PENTHAH  thua boina nanei em?  Nahetchet nah em?

Jesu’n Nicodemus koma “Na penthah loule van gam namu loudi ahi” tin John 3:3 a aseiye.

 A hinga chu athi loule iti ‘PENTHAH’ thei diham?  ‘Thi’ ngai ahi. Thina aumloule iti hinkitna umdi ham?  Nicodemus in ‘Koi anusunga lutkit a athah a pengkit thei di ham ?” ati hi adihtah ahi. Jesu’n hitobang chu ahetlou di ham? Ahet ahi. Ahile, ipidia “Nathia, chuteng athah a nahung penkit di ahi” atilou ham?

Jesu’n asei hohi Van gam thu, Lhagaothu ngen ahi. Adeh a, Tekahna thu asei hohi Van gam thu(Lhagao thu) ngen ahi. Pathen Lhagaova asunga chenglou, mipengthah lou, pengthah lah a jong, ahedia Lhagao thilpeh changlouvin, moh hetthei ahipoi. Kihilson, mi het akona he hochu, Theologian/Pharisee konkhat le lekhathem,Houbung lamkai lui hijongle,  akisudong paijitai.Pathen Lhagaovin ahetsah ho vang chu Theologian hihen hihih jongle  tuhin hehih jongle ‘aphatcha hetsah, hil’ ahiji’e.  Jesu’n ‘ja vang jauvintin, he vang hepouvinte’ atiho lah a panlouna din taovin.

Penthah nadia thi angai chu Jesu’n ahei! Hijeh achu, ‘nathia napenkit ding angaiye’ tilouva jangjet a ‘Napenthah loule van-gam namu loudi ahi” ati jeng ahi. Hichu, ‘mihing ki hi’sah jong lechun mithi nahi!’ ti’na ahi.

Mithi nahi, golnu, golpa!  Mithi ihiuve, ibonchauvin! I-penkit, penthah louvule ‘athi ihiu’ ahi!  Ole mihing nakihisah em?

 Ahile, Pathen mel namu thei em? Pathen chu Lhagao ahi’n, Lhagao hinna neihon bou Pathen amuthei ahi!

Pathen thu Bible in Genesis achun aseiye. Pathen in Ama ho( Trinity) lim le melpu (Lhagaova hinna nei) in mihem ana sem e. Adam le Eve chu nilhah lamle Pathenin aga kivoppiji. Hichu, Pathen mel amulhon ti’na ahi.

Pathen in se le pha hetna theiga aneh lhon ni ni thi teitei din ana sei peh e. Pathen hi joungailou ahi. Boldia asei chu abol jeng ahi.

Adam le Eve chu Satan in, gul lim le mel pu in ‘ Theiga chu na neh lhonle namit lhon chim di ahi’ tin alhem tai. Tahsanin, anelhontai. Hichun, ‘Amit lam lhon akilehlha’n, amit lhon achimtai!” ati.

Ahile, Pathen chun, achadia asem teni chu alhepham?

 A mit lhon chu achima Pathen to abah ding chu Pathen in avetlelham?

“Amit lhon achim tai!”.

He kate! Pathen chu joudel ahitai o ? Thi tah sanga, Satan seibanga, amit lhon joh chim jota Chula !

‘Thutah’ hea koima umtalou!

John in “‘Thu’ chu ‘Jesu’ ahi” ati. (John 1:1)

 Jesu’n “‘Thutah’ kahi” ati(John 14:6).

Jesu neilouvin hiche Eden a thutah le adih chu koima’n ahetapoi. A hea Pa bou ahitai, chule, Pa a beh jing Jesu le Lhagao Theng in heteiyinte kati ahi. Jesu katahsanle athusei katahsan lou diham? Kei vang Jesu katahsanin, asei jouse katahsan e. Ama katahsanin, ama seina a kahet ho jouse katahsan in, kahetkhel aumle eingaidamsa ahitai. Ahilou jongle, Ama a kikipeta, Anopnop eilo nante!

Theiga anneh joulhon nilhah lam chun Pathen chu Adam le Eve koma ahungtai! Pathen in Adam le Eve chu amunai. Hinla, Adam le Eve mit chu ana danglam ta’n, Pathen mel chu amu thei lhon tapoi!

Houina hiche hi 2010 chun kana seitai. Mi seilou kasei jeh chun, angainom un hinla, lamkai ho alung dong thimuva ham, uove auve tia jong aumpo’n, nupi hole khangthah ho’n vang chibai eiboh sausau nauve.

Vel seiying e. Pathen in Adam le Eve chu amu in, hinla, Adam le Eve chun Pathen chu amu thei lhon tapoi!

Hichu, Pathen in amu phat in alung na beh seh  jeng tai! Satan in ana lheplhah lhon ahi chu Amutai.

Kum 20 val chetasa chun, gollhang lah a lamkai kana hipet in, chapang khat athi’n, jan khovah in Lasah-lenkhom bolin katoupiuve.  Go ajuh jeh in lhan jong akilai theipoi.  Anu le apa chu, achapau long koma touvin, akapkap jeng lhon’e. Jingkah lam nidan khat ahilam chun, alel behseh jeng lhontai. Hichun,  “Ahipoi, nangni chomkhat beh ihmu lhontan, keiho tou nauving e” katile, anom lhonin a ihmu lhontai. Hinla, jingkah nidan 4(li) donin ahungthou lhon in, achapau long chu aloh chen lhonin, aponsil jouse jong ahohdoh lhonin, kap in -

“Boi, thoutang! Ahcha khongta! Na tho-phat hita!” tin akaithou go-lhonin, aloh chen lhonin, angoldeh leuvin akap kap jeng lhon tai!

Hinla, chapangpa chu, achapau mongmong ahivangin, anu le apa chu amutapo’n, a o‘ lhon jong ajatapoi! Athi ahitai !

Anu le apan amu lhon vangin, achapau chun, anu le apa chu amutheitapoi. Athi ahitai ! Ahing hosen kamuvin, athipa vang chun ahing ho amutapoi !

A khonna’n, anu le apa jong lunghan lamin asep lhontai ! Lunghan pumin,

« Ipidia, thoulou nahim ? Jingkah matah a nei kaithou khohkhohjiu hilou ham ? Tua  nanu le napa’n kakaithou got tah uva ipidia jalou nahim!?” tin lunghan le ka akop lhontai !

Ana e! Golte, moh sei sei jong kanomji poi! Hinla, kumni avaltai 2010 kumbula Pakaiyin kahinkho akheldoh a pat in, Athu hin eiphutuntun jin, hinla, Bible hatah a sim simin, kakap hi katim timin, kumnival kathip vangin tuni’n kasei khoh khoh tai. Ajeh chu, nang ho ka ngailut jeh u ahi. Pakaiyin, eingailutnau hi helouva na umdiu kanompoi!. Pakaiyin, panpi teiteiyun lang, avaangbohna loupi hi changteiteiyun, O?

Chapangpa bang chun - Nilhahseh a akivoppi banga kivoppi dia, Adam le Eve in theiga anneh joulhon nilhah lam a chun Pathen aga che phat in Adam le Eve in amu lhon tapoi! Chapang thipa chu anu le apa’n amuthei lhonin chapangpa chun amutapoi! Athi ahitai. Atahsa, along chula chapangpa,achapau mong mong chu ahinai!

Pathen in Adam le Eve chu amunai. Hinla, Adam le Eve chun, Pathen mel chu amu thei lhon tapoi! Athi ahilhontai! Jou ngailou Pathenin atepsa banga chu thi lhona ahitai! Pathen kamsungsoh chu,velsei ngailouva natongdoh ahi jingtai!

Chapangpa to adanglam depna vang chu – Chapangpa chun O jong ajathei tapoi. Adam le Eve in vang Pathen chu amu lhonlou vangin, a O vang aja lhon’e. Hinla, a lim amel kimulouvin ahin naiyuva, agin ajah lhon chu kichat umtah, Lhadam hunga banga bou agel lhona, akichat lhona, kisel lhon ahitai.

Iti akisel lhon vangin Pathen in amujing lhon’e. Tu’n jong nang le kei jong eimu jing’uve. Eihon bou imu thei louvu ahi. Ajehchu, eihohi Pathen hi-na lhagaova chu athi ihiu ahi.

Pathen chun, athi lhon chu amuta’n ahile alung ana behseh jengin; chapangpa anu le apan aangsunglhona um gehguh ha sap sap a asap lhon bang chun, Pathen in Adam le Eve anga  dingin

 “Adam, Adam!” ti’n akoutai!

 Tu’n jong eikou jingui!

Iti eikou vangun, Adam le Eve bang beh in jong A O ijathei tapouve. Hijeh chun, Pathen in, alim le amel imuthei diuvin, Achapa Jesu chu leiset a ahinsol ahitai. Hiche a jong chu atahsan loulai aum nah laile ipiba kisei ding hitam!

Hiche thugil, thutah hi hethemlou chun tonsot hinna chu iti aneitheiding ham?

Bible pumpi hejongle chun, Jesu natahsan loule, nachihna le nahetna, nathemna chun na sochatsah thei ding ahipoi. Chonphat vang jong ahipoi. Lungsetman, tahsan vanga bou sohcha ding ihiuve.

 Jesu’n “Pakai, Pakai, eiti chan chu van-gama lut ding ahipoi. Koi hile, Pa lung deilam bolpa bou chu lut ding ahi” ati (Matthew 7:21) ahi.

Chule, Pa lung deilam chu Ama le ahinsol Jesu tahsan ding hi ahi “Pathen tah khatseh nang le nahinsol Jesu atahsan diu hi tonsot hinna ahi” (John 17:3) ti’n asei kit e. Bible pumpi’n aseinom jong chu Pathen le Achapa Jesu Christa tahsan a tonsot hinna ineidiu hi ahi.

Hijeh achu, Nicodemus koma chu “Thi inlang athah in pengkit in” tilouva, a thi jingsa hija koiya “Napenthah, napenkit loule van-gam nalutlou, namu louding ahi” tia asei ahi.

Hitia chu,Jesu a hinna ineitengule Pathen loupina dia hinkho kipah le thanom a eimansah jiu ahi. Hichu, “Jesua hinna” “NUNNOPNA”, “A Blessed Life in Jesus”  tia subject a kaneijing hi ahi.

Mihem mit, Lhagaova thisa mit, in amuthei dinga hung Jesu chu tahsan in, Leng le huhhingpu in kisan in. Chutengle, Ama’n tonsot hinna, hiche leiset chung jenga jong hi hinnopna, nunnopna napeh ding, tonsot hinna kinem jing puma kipah tah a umjing ding nahi. Hiche nading chun taovin,

Adam le Eve chu chonset jeh a thisa ahi lhonta’n. Mihem jouse amania kona hungpeng peh ihiuvin. Hijeh achu, mijouse achonse, chonset jeh a thisa ihiu ahi(Rome 3:21). Hiche hi ahetchet val jeh achu, Lengpa David chun,

“Chonsea kijil, kanu oisunga kaumapat chonsesa kahi”  (Psalms 51:5) tia akama aphondoh a, Pakai abel ahi.

Chuti banga chu, eima kam sung tah a i-chonsetnau phondoh a, eima kam tah a eihuhhingdia Jesu chu kouva, eima kamtah a “Ka Leng le ka Huhhingpu’n kapom’e” tia phondoh ding ahi.

Chonset phon kiti chu, jan hia khat nasuh lunghan, najudon, mito nakinah, mi thilkhat nasuhset chu hilouvin,  chonsetna guiya peng -  Adam le Eve thisan guiya peng, nanu le napa’n jong chonset a nahin hinnu chu ahi  phondoh ding.

Hitihin taovin, “O Pakai, chonse kahi. Gulseson, Eden hona gul lheplhah, nangma sapsetna changsa thisan-guiya hungpeng, gulson kahi bouve.  Chonsea kijil, chonsea  peng kahi. Ka chonset lam jong kihetlou kana hi; kelngoi vahmang, Chapa vahmangpa kana hilam kana kihetpoi. Nei ngaidamin, Pakai. Tu’n, hiche chonset akon hin neihuhhing in. Nathua kamu bangin nei huhhingsa ahitai. Chonset a thiding kahi khela ka Pakai Jesu Christa chu cross a thia, thoukit ahitai. Keima’n, nei huhhingna kana hetlou jeh a bou hitia chonsea hing jing kana hi . Tuni nei hetsah tah jeh in, nacha kahi kakihettai. Nei ngailutna tunin kamutai, kahetai. O Pakai, namin kathangvah e. Tutah hin, ka Pakai Jesu chu Leng le huhhingpu in kasang e. Ka lungsunga hung cheng hen nalungdeilam hinkho eimansah hen. Kahinna, ka thaneina apumpin nang kapei. Na thun nei nunsah in. Nei teppeh’u Lhagao Theng chu kasunga chensah in, eipui, eihil, eilhamon ding le nalungdei hinkho eimansah dingin tiin ka Leng le ka Huhhingpu ka Pakai Jesu Christa minin kataove, Amen”  tiin taovin tutah hin.

Hitia chu na taole, anoiya ‘comment’ na muna khun ‘Amen’ jih in. Pathen in phatthei naboh ta’n. (Simin 1 Peter 1:23; 2 Corinthians 5:21; John 1:12 -13; 2 Peter 1:4; Titus 3:5-6; 2 Corinthians 5:17; Ephesians 2:4-6)