NA MIT MONA CHU KISUHMO SAH HIH IN

HICHE HI SIM TEI TEI IN, Pathenin phatthei naboh hen

Golte, tua kaloi nanghohi Pathen lhen nahiuve. Pathen deilhen nahijal un kipah in, phatthei naboh ding ahi. Ajehchu, thu hi mohsei sei kahipoi. Pakaiyin, eimusah le eipuina akona sei kahi. Khangthah cheh nahiuve. Pakai thusei ngaiyun -

“Pathen in  aseiye, phat kichailam tengle mijouse chunga ka lhagao bunglhangting, nachapa le chanuteuvin gaothu aseidiu, khangdong pasal hon kilahna amudiu, upa domhon mang aneidiu…………chule, koi hile Pakai Amina kou chan chu huhhinga umding ahi” (Acts 2:17-21 simin) ati ahi.

Internet Pakaiyin amannom eimusah chunkana hethempoi. Nitina kumni val eihin puiya hin kakhut hi amangchan, eipui peh in, atohdoh hohi kamu jingin, kadatmo behseh jenge. Tun achen-achaiyin sei ponge. Kakola ‘receiver’ eikoi peh un, kikah tah tah a ‘receiver’ neiho chu kaki hou jingui. Ka koma umhon ajapouve, ken kajai. Abangle kana pao sang domjile kaloinun “Angola nahim? Ipidia nachanga nakihouham?” eitiji.

Langkhat a geldia tijat umtah ahin, tuni geiyin, eimusah le eipuina ahin, aga chu ahung kilang doh cheh cheh tai. Janhia kasei bang chun Mobile in eina seisah in, imacha hilouham kati kah in , akhangtou jingin, Face Book eibolsah in, chuin, blog eibolsah kit in, tun website ahitai. Website hi kachamtah a kamantheiya, Pathen in kakhut a amandin  janhin ‘website’ eichohsah tai. Probation period 48 hours ahin, jing nilhah lamle honpatthei hitante. Website ahi Fb, blogs ho le secular website a hose hinlah gom ding, adang ho jong manthou ding amavang – Huhhingna lamhil le Christa a khantouna le Pathen Lenggama machalna dia tohgon le tohna ding ho banneicha website akona bou umthei ding ahi. Hichea pan lading tua lekhathem, Computer, Mobile, Internet le uptodate technology khoithei ho Pakaiyin nahin man diu ahi.

Kilep hih in gol! Pakaiyin amannom chu aman ahijenge. Keibon internet khoi khalou eihila eimanchahsahle nang ipi nahim? Nahetlou jong nahetsah ding ahi.

Mose chu Pathen in akouva chu iti aume tia iseitah uvem? Phatechan kana seitai. Mose chun anoplouna thu aseisei jeng, alhinlelna jouse asei. A seidohlou vanga, alhahsapna pen ‘CHEPTANLOU’ ahi jong akihet ahi. Israelte chun “Mose, nang cheptanlouvin ipidia keiho koma Yahweh thu nasei ngam ham?” etiuvintin, ijejong eiti pouvinte ti jong akihet ahi. Hinla, mihem ahijeh chun, hiche Pakai anga jong seidohlouvin “kakam jong alhomin,” tiho amitmona jouse aseiye. Hinla, akichaatpen chu, Egypt insunga kiseilen, cheptanlou chu ahi. Pakaiyin ahe them’e. Mosen apohnat, lungsunga pohgih a anei chu Pakai Pathen in ahetpeh in, alongset in; hiche cheptanlou chu Pakaiyin khoh asa him him poi!

O sopi, ipi ham nalhinlelna, nalungsunga nalhinlelna chu napohnat tuntunle Pakai hetsah in- nachonset, nasuhkhelna, nahatmna, na-im im jeng le seidoh ngamlouva napohgih (chonsetguh) ipi naneiyem. Pakai kom lhut lechun, nangaidam ding keu jong ahipoi. Pakai Jesu nagahgela “Jesu kom belleng aman eigelpeh tante’ ti nagel a naga kiheiya kona chu nangaidamsa ahitai.

Chapa vahmangpa chu nahet em? Apa kom ajot achu ngaidam athum man em? Athummanpoi! Ahung chu gala pat a apan amua chu, apa chu lhaiya aga lamtoa, akola, apoma, in ahinlhut ahi. Kipaman lhingset apeh ahi.

Ama chu tua michonse Jesu tahsan loulai ho ‘symbol’ a Jesun asei ahi. Apa chu Pathen lima um ahi. A upa chu tua eiholah a Christian hija, huhhingna jong changta, hijala Lhagao kisantheilou ho lima um ahi.

Lung aheiya chu apan asan ahitai. Nang jong na lung naheile Pakaiyin nahetpai jeng ding ahi

Mose chu acheptan Pathen anotthap peh poi. Ahitheina beiya akisei jehchun Pathen in “Ahile, nakhut a nachoi chu ipiba ham?” tia adohle, Mosen “Mol, katenggol ahi” atitai. Hiche mol chu Pathen in phatthei aboh in, Israel mipi soh a um chu hinpuidoh theina thahat in apangin, ahin puidoh tai!

Loupina Pakai changta hen.

Golte, namitmona chu Pathen in namitna pena asothei ahi. Asotheiyin Pakai chu tahsan poupou jeng in.

Pakaiyin phattheina tincheng nachan tahen.