Kipahna tahbeh selthei ahipoi

Miphah khat Jesu henga ahungin, boh khup in,ajah a, 

“Nalung ahile neidamsah in” ataotai.

 Jesu’n akhoto lheh in, akhut alhangin, agah thamin,  

 “Ka lung ahi, damtheng tan,”atipeh tai!” 

 Apet tah in aphahna chu abeiyin, a damthengseh jengtai.

Gang chela chamang dia solin Jesun thu amop in:

 “Ven, hiche thu hi koima seipeh hih in. Chusangin, thempu gakivetsah inlang, Mose thupeh bangin, maichama to ding chu, nadamtheng hetna in gatoh jon” atipeh tai.

Mipa chu achemangin, anomcha bep in lhangphongtah in agaseilele jengtan ahile athu chu akithe thang soh tai. Hiche jehchun, Jesu chu khopi sunga luttheilouvin, munthip laiya aumlotai. Hinla, mipi chu muntina pat in Jesu koma ahung hung jeng taovin ahi.” (Mark 1:40-45)

Sopite,hiche ahin thilloupi ni aum akimui. Khatna, Aphahpa hin aphah chu akihet chet e. Chule, hiche khanga chu phah (Leprosy) hi jendamtheilou ahi. Mipa hin, anatna gihtah ‘phah’ chu jendamtheilou, athipi teitei ding ahi ahetai. Hitia, thi ngah a aumjeng pet chun, Jesu thu ajatai. Jesun dammo jouse aboldam ajatai. Ama vang Jesu koma cheding jong akiphalamin, kisonna aneijoupoi ti hi akigolnem paocheng hin akicheh tahbeh in ahi. Jesun adamsahthei ahi ahet jong kicheh mong mong ahi. A kamcheng hi gelin “Na lung ahile neidamsah thei ahi” ati. Jesu’n anopnop adamsahthei ahi atahsan tahbeh ahi. Hinla, ama aboldam nom ding chu kisong joulou ‘kei michonse pentah hi eidamsah nomna dem o?’ tia kigel ahi akamchenga hi kimandoh ahitai. Hitia, atahsanna det le ama kingainem chu Jesu’n kichehtah in ahei. Hijeh chun, Jesu’n alungset in akhoto lheh jeng in ahi. Hijeh chun, Pakai Jesu chun, ‘Boi, kangailut ka khoto hi kihet in, nadam ding iti kada ding ham? Nang tobanga tahsanna det, adammo, achanset kihet a, ama le ama kihuhhing joulou kihet a, damna- huhhingna ngaichatna neiya, kingainem a kakoma hungho damsah –huhhing dinga hiba hung kahi’ tia gelin “Ka lung ahi, damtan!” agahtile O, miphahpa chu adam hel tan, ati-avou chu athengsel jeng tai.

Pakai kamcheng, akama kona thu hungpot hohin iti lom loma thu anei hitam! Hiche Jesu hi hilouham semtil a Pathen a ana uma “Vah hung umhen”, tia seiya vah hung uma, ati lamlam umjengpa Pathen’a umjing jengpa chu! (Genesis 1 le John 1 simkop in) Tuipi kinonglai le huipi hatlai jong “thip in” atile thi jeng. Adammo ho “Damtan’ atile damjeng. Athi jong “thouvin” atile thou jeng.

Hiche, Jesu hi natahsanle “Na chonset abeitai, chonse kitta hih in” atile bei jeng ding ahi. “Pathen cha nahitai” atile nahi jeng ahi.

Adam le Eve apat numei le pasal (thisan, chi) a kona hung kijila hungpeng kijet ihiuvin chonsetna neisa pengcheh ihiuve. Napena pat in iti phat jonglechun, nathisana chonset umsa ahi. Jesu tailou hiche chonset suthengthei chu umlou ahi. Jesu chu hiche chonset sutheng dia Pathen in ahinsol, Pathen chapa chonsetna neilou ahi. Jesu chu mihem chi pang louva, Pathen Lhagao thenga kon peng ahi, hijeh achu, chonset (Satan) in achunga tha aneitheilou ahi. Jesu joh in chonset (Satan) chunga tha aneijoh ahi. Ama panpi louva koima dang chonset thahat jou ding umlou ahi.

Miphahpan adammona akihetchet a, Jesun aboldamloule thi teitei ding ahi akihet a Jesu kom abel bangin, chonset guiya peng, chonse , chonset a thiteitei ding nahi nakihet ngai ahi. Chule, Jesu’n na soptheng, na ngaidam loule chonset a thiteitei ding nahi kihet inlang, Akoma, kineosah in taovin, chutile, na ngaidam ding ahi.

Mitamtah in, ‘ka penthah tai’ atin, hinla, kipanatah aneitheipoi. Nang le nang nakilhep sang in, miphahpa bang hin, kipetheng in, kineosah in tao jengin. Aman nangaidam tahbeh tengle na lunggel kipah a nahinkho nom ding. Koima sei ngailouva, nasunga hinna lhagao chenga chun, nahi nahilou ahetlet ahi. Nahiteng ama chu kipah intin, miphahpan adam akihetchet a, Jesun ajahda vanga aphonlele jeng banga chu nang jong umthei talouva

“Kipana tah tah akisel, aki imtheipoi !”

 tibanga na umding ahi.

Hijehchun, kipanakim chu naneiloulaile, dilsun, taovin. Jesu chu kouvin:

“Pakai, chonse kahi neingaidamin. Chonsea kijil, chonsea peng, chonset a hinkho mang kahi. Chonset a thiding kahitai. Kadinga Cross a ka Pakai Jesu ahung thina chu keidingin moh hisah hih in. Ka Leng le Huhhingpu din ka kouve. Ka lungsunga hung cheng hen, kahinkhoa vai hung homhen, nalungdeilam hinkho neimansah in. Neiteppeh’u Lhagao Theng chu ka sunga chensah in, eipui, eihil, eilhamon ding le nacha lhingset hinkho, na deilam chun eipui jing hen, tin, ei huhhing ka Pakai Jesu minin kataove, Amen” tin taovin.

Chutile, Jesu Christa chun hinkhothah napeh a, apengthah chu nahiding ahitai. Nitinin na lhonpina tin, kipah tah le lunglhaisela hinkho naman ding ahitai. Na lung akipa tengle natahsa jong damtheiya, naneh lamlam nakitopi ding, nabollamlam nalolhin ding ahi. Lolhinna chu Pakaiya ahi.

Anina in, miphahpa chu Jesu’n ajahda vanga aphon lele jeng hi kipah vala ahi. Hitia chu, kipahna tahtah neihon, koima sol ngailou, koiman jong ajahda joulouva, Jesu Christa ngailutna thu hi kilhangsamsam jeng ahi.

“Kipana tah tah akisel, aki imtheipoi !”

Chihna- thepna hi ipiham? “Jesu chu Pathen chapa ahin, Huhhingpu ahi. Eihinsah, eidamsah uva, ingaichat jouseu eipeuva, eipetheiyuva ahi” tisehseh seilele jong leuhen Pakaiyin phatthei abohle mitampin Ama atahsan jengtheiyu ahi. Miphahpan aseilele jalin thupha akihom jal in Pakai chu loupina achangtai, Bible a kisei hi sim kit in  “mipi chu muntina pat in Jesu koma ahung hung jeng taovin ahi.”

“Kipana tah tah akisel, aki imtheipoi !”

Na kipah tah tah tengle, nangma banga miho jong kipaha aumdiu nopna nanei ding ahitai. Jesu’n, “keiman ka ngailut bangin nangho kingailuvin” tia asei banga miho ngailutna nanei ding ahitai. Seinom nom jeng tanate.

Sopite, seinom nom jengna Pakaiyin napeteitei jenuvo!

“Midang ngailut” kiti Pakaiyin asei hi, adang sangsanga Pakai ngailutna seipeh- chankhompi hi aphapen ahi. Michu na seipeh a, a Lhagao sochatna achantengle tahsa thil hochu aumsa ahijenge. “Amasan a Lenggam le achonphatna hol masauvin, chutengle hiche (tahsa ngaichat ho) ho chu nakipehbe diu ahi” tia Pakai Jesu Amatah in aseisa ahi.

Asei sei hijengpa Jesu chu natahsanlou ham?

Angailutna thu hi seiphong dinga Aseijuite ana hilsa ahin, Seijuite banga Ama tahsanna juijouse jong eisol’u ahi.

 “Vana le leiset chunga thaneina jouse eikipetai. Hijehchun, cheleuvinlang namtina mijouse seijuiyin gasem un, Pa, Chapa chule lhagao Theng minin baptize bolun, chule Ka thupeh chengse hi anitsohhel diuvin hilun. Veuvin, keiman phat kichaini geiyin nangho koma ka umjing e” ati. (Matthew 28:18-20)

Jesu a hinna neijouse sol ihiuve.Pakaiyin umpi jingjeng tauvin.