JESUA HINNA: 1. NUNNOPNA HINKHO MANGIN

1. NUNNOPNA HINKHO MANGIN

Mipha nahiman,thilpha nabol jala huhhinga um nahipoi.Na chonset mana nachandadin jong kigel hih in. Jesu’n eingailut jaluva Cross a hungthia eilhatdoh’u ahijoi. Solchah Paul in ”Lungset jala tahsanvanga huhhinga um nahitauve,hichu nangho jal hilouva Pathen thilmohpeh ahi,tohphat (chonphat)vang ahiloujeh in kisonna thei ahipoi” ati.(Eph2:8-9)

Hiche Bible chang hi NIV a hi iledohle “Natahsan jal’uva chu nasandiu lomlouleu deichomna nachan’uva Huhhing a um nahiu ahitai, hichu nangho jal hilouva Pathen thilmohpeh ahi,tohphat (chonphat) vang ahiloujeh in kisonna thei ahipoi” ti ahi.(Eph2:8-9)

Mipa phatah chun, achaten thilpha, neocha hijongle, ahintohdohteng, kipah behseh a, adeichomma, manthei duhdah ahilousasa jong manchah a aneiya, asontenji ahi.

Hiche banga chu, eihon Pathen hi ThiljouseSempa Pathen ahi tia i-tahsan’uva, Jesu Christa hi Achapa ahin, eiho chonset jeh a tonsot a themmo changa thiding ihiuva kona eihuhdoh diuva ahinsol ahi i-tahsan’uva; Jesu Christa chu Leng le Huhhingpu dia ikisan tengule, Pathen hi kipah behseh a, i-tahsan’u hi, Ama (Pathen) tena dola lhinglou hijongle, deichomna sangtah einei’uva, Acha ( Lamdoh cha) dia eikisanjiu ahitai.

Chutengle, chonset in athua einunsahnauva kon, chonsot soh’a i-umnauva kona chu eihuhdoh’uva, chonset thaneinan eitohkhah phah tah lou diuva, Satan koma “Ama hi Kacha ahitai, natohkhah theilou ding ahitai” tia ‘Huhhing cha, Huhdohsa cha’ dinmuna eikoi jiu ahitai. Hichu, Bible seidung juiya “Huhhingna chang, Hudoh’a um” tia kisei ahi’n; hitia um ho chu ‘Pathen chate” tia kihe ahitai.

Hitia chu , Chonset noiya uma ‘Chonset cha, muthim cha’ i-hinauva kona ‘Pathen cha’ ei hung hisahnau chu ‘Penthah, Lhagaova Pengthah’ tia kisei ahi.

Hichu, John 1:12 a kisei hi ahitai – “Tahsa dol’a peng hilouva, Lhagaova(Pathen lam’ a) peng ti’na ahin; hitia Lhagaova peng hochu tahsa mihem –Pasal le Numei lunggula kona le thisana kona hung kijil hilouva, Pathen lungdeia peng (Pathen le Jesu Christa tahsan jal’a Pathen cha hidia kisemthu, Midang cha, deichom tah le ngailutna jala kikilah a eima chadia dia kisem tobang ahi) ahiuve.

Hitia chu, “Acha” hi’na lhingset eipeh teng’ule, Pathen in Lhagao Theng chu eipehjiu ahi.

Mihem hi hatmo ihiu, Acha din eipom tajongleu, eiho hanta a Pathen Cha hindingdola ihinjoulou diu Pathen in ahei. Hijeh achu, Lhagao Theng eipeh’uva, Ama (Lhagao Theng) chu -eiching diu, eipuidih diu, thutah eihilthem diu,eipan-hu jingdiu le vannoi hahsatna ho le lhepna itotenguva ‘kabolkhel kittai, ole Pathen cha hi’na (huhhingna) kachan hi lhinglou jong ham O? Pathen hin kasuhkhel, kalhahsam jeh hin eipaidoh kit jeng dem!” tia kinemlel’a i-umteng’u jongle eilhamondiuva, Lhagao Theng chu eipeh’u ahitai.

Lhagao Theng hin, ikineplel teng’ule “Boi, Pathen cha nahi, nasuhkhel chu ngaidam thum in, nangaidamsa ahitai, ngaidam jing ding nahi. Na hatmo, nalhahsamna a na Huhhingpu Jesu Christa kouvin, Ama mina panpi dingsa Kei um kahi. Lungmong tah in Pathen cha nahina hinkho chu kipah le thanomin, Ama deilamin mangin. Tonsot geiya umpi jing dia akitepna chu thon ngailou ahi, Lungmong in umin” tia eilhamon jiu ahi.

Lhagao Theng in nahou, nahil najah, nahetji nah em? Keivang kaja, kaheji. Jah le hetna dinga, ‘ngai’ ding ngaiya ahi. Na tao tengle, phatechan nadonbutna ngaiyin, lunglhahna le hahsatna le kichat le kineplelna natoteng jongle taovinlang, Pakai yin thu ahinsei jeng em O tin ngaijin, najah kom umding, najah lou jongle Pathen in nasanna nahet ding ahi. Na lunggelbeh hung kikhel ding, lhamonna le kinepna ham nahinnei ding ahi. Hichu, Pathen in nalungsunga ahinsei ahi, sangin, kipathu lhut pai jengin.

Nitinin Bible themkhat beh sim teiyin, chule tao jing jengin. Pathen in Lhagao Thenga na umpi jing chu kihet jingin lungmong tah in, Alungdei hinkho chu mangin.

Hitia chu umding nanop’a Pathen koma panpina nathumle ‘Amen’ jih in.

Ijemtia, ‘Huhhingna, Pathen cha hi’na’ chu nachan loulaile, tutah a hi nakisan jengthei ahi. Kisanin, taovin :

 “Pakai, keima neilhatdamsa ahi kahetlou, nei ngaidamin. Chonse thisan guiya peng kahi ahi tu’n kahetai. Nei Huhhing loule, chonset a thiding kahitai. ‘Chonset cha, muthim cha’ kahi. Pakai, nacha kahi nom’e. Nacha nei hisah in. Chonset akonin nei huhdoh loiyin, amahthah ding kahitai.

Keima chonset jeh a Cross a nahungthina chu keima din moh hisah hih in, nathohna-ga chu neipen, ka Pakai Jesu, ka Leng le Huhhingpu nahi. Ka dinga nathi jal’in kakipah e. Tuhin, ka lungsunga hung chenginlang, vai hung homin, ka Hinkho nadeilam in neipuiyin. Keima huhhingna din Cross a nathi’n, loupitah in Pa Pathen in nakaithouvin, lei le vana thuneina jouse nachangtai ti kahetai, loupe jing jeng in ka Leng le Huhhingpu ka Pakai Jesu. Tuhin, na galjona  chu neichanin, kachunga thuneiya chonset hi neijopeh in.

O Halleluiyah, Amen, ka Pakai, Jona chu nei neipeh tah jalin naming kathangvah e. Nacha dia neipomsa ahitai ti neihetsah jalin naming kathangvah e. Nacha kahilam kana hihetlou chu themmo kahi, neingaidamin. Tuhin, nacha hi’na hinkho chu neimansah in. Eipan-hu dia neiteppeh’u Lhagao theng chu kasunga hin chensah jing jengin, chutile, na lungdei hinkho chu eimansah tante ti katahsane. Nei umpi jing jengin, nacha dia lom in hinkho neimansah in tia, ei huhhing ka Pakai Jesu, namina tao kahi; Halelluiyah, Amen.”

Hitia chu nataole ‘Amen’ jih in. Pathen in na umpi jingtan.