NGOLTHUT HI PHATTHEIBOH CHANNA AHIJOI

Numei hi angolthim dia gon ahin, achih teiteile boina asohjitai!

Numei chu ching teitei henlang, apa-anu innom dalha nomlouvin, umteitei tale ‘Nungah a theh a thiding ahi’ – ‘Nu hiding ngah jinga thiding’ ahidingdol hilouva ahinkho kichai hiding’, Pathen thilgon asuhchatvai ding ahi. Thil kigong chu adolcha alolhinna dia, numei chu, angolthut ngai ahi. Ngolthut a, anu-apa innom dalha a gollhang khat ajuiya, itobangte ahiu jong hechenlouva ajuilut jeng ngai ahi.

Golte, Christian dihtah hitheina dia ngolthut ngai ahi. Pathen mihuhhingna,  Jesu Christa a ‘Huhhingna’ hi chantheina dia ‘ngolthut’ ngai ahi. Hichu,  ‘tahsan’ kiti hi ahi. Nungah in gollhangpa bou ahet, ainsungmite itobang mong ahi hechenlouva, gollhangpa angailutna jala ain ajotlut jeng banga chu, ‘tahsan’ kitihen kholchil masahval umlouva ‘hichu hinte, phateiyinte, umteiyinte’  tia alungthim pumpia tahsan a mano, majot jeng hi ‘tahsan’ ahi.

Hichea ‘ngolthut’ kiti hi, mihem gela ‘ngol’ ahin, Pathen lama ‘chihna’ khat ahi.

Jesu Christa kakouva, Aman eisan chun kahethem vah poi. Thil umdan hochu mihem khohetna a hethem joujat ahipoi. Hinla, Jesu chu Pathen chapa vannoi huhhingpu, chonset jouse eisopthengpeh’uva Pakom eilhut’uva ahiti kitahsan ngala, tia ‘Asemsa, ka hinna jong eipea Pathen hichu, Ama Pathen hija, Ama a kahi’ tia gelin, “Nanopnop neilotan, ka Leng le Huhhingpu nahi, na umna chan chu kipa le nopna, hinna ahi kihea, Daniel teho jong Keipi khul sunga umpia, Daniel loho Adrak, Mesak, Abenego teho meilhum sunga umpia ka Pakai nahi; nanople Damunin jong neisoltan, chejeng nange neilhonpi ding poule” tia kakilhan tah in vang, O!  Akidang e. Tuhin kum thumval ahitai. Nitinin, eiumpi jingin, tahsa le lhagao lama masotna eipejinge. Loupina Pakai changtahen, Amen.

Kakipehdoh dan chu, mihem chihna dola vang, ngolkai ‘angola’ chu kahitai! Kangol jeh a tua hitia, kana gelphahlou hel, Jesu Christa a hinna, leiya jong nopna, vana dia jong tonsot hinna thu hi nitina seisei jengtheiya eikoi ahitai.

Golte, nang ho jong ihiche hi changtei leuchun, iti nakipah ta diuvem?

Houina, Pastor tamtah, Houbung upa, nupi upa, nungah gollhang ho dimset lah a hiche thu hi kaseiyin, chule,

“ Hou thua lamkai, Christian pilhingtah tah, hahsatna le patepna ho ahung lhuntenga lung lhathei nahi nahlaile, koima seipeh angaipoi, na sunga lhagao chun, ‘nahiloulai ahi, phaten kiholin’ tia naseipeh ahi. Kiletsahna jouse pailhanlang, koima jahsah ngailouvin, guhthim chan, taonan, nachonset phongin lang, cross bula Jesu Christa anga chun kunin lang, Leng le Huhhingpua nakisan thu jong phongin lang, napanpi jing ding, napuihoiya, hahsatna le lhepna nato koma jong na lhamon din Lhagao Theng chu thum jengin. Khatvei jachat chu thohlha jengin, tonsot a nakipana ding joh ahi” tia kaseile, mijouse chu nomcheh le phatsah cheh in kamun, anom lheh jengin ahi.

Jesu’n, “Van le leiya thuneina jouse eikipetai….” (Matthew 28:18) tia asei chu natahsanle, kasei hi bolin, Pathen phattheibohna kisanin.

Pathen thu nit hi phatthei channa ahi

Pathen in phatthei naboh henlang lolhinna, kipana, hinna le damna nape jing tahen. Hiche nading chun, athu Bible hi taoto thon sim jingin, chule tao jing jengin.Pathen in :

 “Hiche Danthu hi nakama konin chonmang sah dan; sun le jan in geljing jengin, chutile hichea kijih jouse hi chingtheiya najui thei ding ahi. Chutile, na tehchana, nalolhin ding ahi.” — Joshua 1:8

Hichea “nakama konin chonmang sah dan” atihi, “na paodoh, na seijouse chu Pathen thu – to kitoh, a pansa hihen” tina ahi. Jesu chu lheppatep a aum chun Pathen thu kijet mangchan alhempa ajouve. Eihon jong hitia chu iboldiu ahi. Pathen thua jona, lolhinna, hinna, kipana aume.

“geljing jengin” ati kit e. Jesu’n “Lungsunga um chu kamin aphongdoh e” ati chule mihem nun le khan chonna jouse hi alunga umchun ahin pohdoh ahi. Pathen thu chu sun le jana i-gel jingle chonchatvai, hinkho thenglou chu umdoh louhel ding ahi. Ajehchu, Pathen thu hi ‘jona, hinna, lolhinna, kipana’ ahi.

“Chutile, na tehchana, nalolhin ding ahi.”

LHAGAO GA

‘Ngailut’ hi, ineidiu pipen in Jesu’n eihiluve.

Houbung lamkai phabep to kakihoulim’un, khat in “Ga soding nati jingjiu hi ipi ham?” tin ei dongui.

Adonbutna in, kigin jana houina kathusei kavel seipeh e. Hichu,

“Houlamkai hon, ‘ga’ natiuhi ‘tohdoh’ ahi natiuvin, adih e. Sum hi Houbung kivaipohna in angaiye. Houbunga pankhom louvin, Pathen thu machalponte. Mimal in ipipen kitongdoh louding ahi.

‘Toh pha’  angaiye. Hichu, mihem, aphat le aphatlou kihetna ahi.

‘Houin kai’ angaiye, tahsanna lama khantouna ding le tahsan chankhom ngaiya ahi. Kiloikhom, hinkhom, pankhom hi Pathen lungdei ahi.

Hinla, ‘Ga’, Christa nungjui tahbeh jousen anei tei ding chu –

¹⁾        ‘Ngailut’ – Pathen angailut ding, midang jong angailut ding;

²⁾        ‘Kipana’ – tonsot hinna le Pathen phattheibohna ho achan jala kipana anei jing ding;

³⁾        ‘Cham le lungmonna’ aneiding, hoikom –itobang mun le phat hijongle, Pathen in thiljouse hi apha dia abol ahi ahetding, chule, Jesu Christa jala tonsot hinna anei ahet jala jong ‘cham le lungmonna’ anei ding;

⁴⁾       ‘Lungnen na le thohhatna’ anei ding, itobang mun le phat hijongle;

⁵⁾       ‘Lungset le khotona’ mijouse chunga aneiding;

⁶⁾       ‘Mipha le phatnanei’ hiding, ijakaiya;

⁷⁾        ‘Tahsan um’ hiding, aboljousea;

⁸⁾       ‘Nunnemna’ anei chu mijouse het hiding, chule

⁹⁾       ‘Kitipthem’ mi hiding.

Bible in aseiye, “Lhagao ga chu Ngailut, kipa, cham le lungmon, thohhat, khotona, phatna, kidihna le tahsan um, nunnemna, le kitimthemna ho hi ahi.” (Galatians 5:22-23)

Christian tamtah in atup, chule lamkaihon ahilnau chu – phatding, nun le khanna pha hiding, hinkhopha neiding, chule tohpha toh ding. Mipho le housan, gihsal le oima; akihilnau chu ‘hichu bolin, hichu bol hih in’ ti ahi. Bible chang ho amun le aphatto kitohchet a simdoh in, miphonan aneiyui.

Miho jousen jong, ‘Ga’ chu ama hatna sodoh din hatah in abol jiuvin, hinla, alosam cheh ‘uve. Eima hatna hidoh, boldoh, thodoh ding itup’uva, ibol sungseu Pathen in eihu loudiu ahi. Eima hatmo kihet’a, Pathen koma kipehlut’a, eima chonset le eima hatna bolding kitup adihlouna a ngaidam thuma , Ama panpina thum ding. Chutengle bou Pathen in eihu diu ahi.

‘Eden chonset thisan inei laiseu le chonset puma i-umlai seuva, iti ‘Atheng, Lhagao ga’ chu ineitheidiu ham? Hitia chu i-neithei diu ahi nah nahle, Pathen Chapa Jesu chu leiset a hunga, cross chunga ahung thi chu ipi angaina um ding ham?

Imatih chana jong eihon ‘Lhagao ga’ hi ineitheilou diu ahi. Jesu bou ahi, hichega sodoh ding achu. Eihoa hi, Jesu Christa, Lhagao Theng a achen tengle bou, hiche ga hohi, eihoa ahin sodoh ding ahi.

Hijeh achu, Jesu’n hitia asei ahi - John 15 :1-8 - “Keima Lengpi gui tahbeh kahi, ……. Thingbah in ama changin ga aneitheipoi; aphunga aumjing ngai ahi. Nang hon jong, keiya naum louvule, ga naneithei loudiu ahi

 “Keima Lengpi gui kahi; nang ho abah ho nahiuve. Nang ho Keiya na um’uva, Kei nang hoa kaumle, ga tamtah naso diu ahi; Ka beiyin ima nahipouve.”

Jesu, thingphung a na um kahsea, Jesu bah nahilou ahi. Leiset tahsa thia athijouva kona, tua hi Jesu chu Lhagaova uma ahitai. Pathen’a chonset ngaidamna le Jesu Christa mi Huhhingna ichantei diu ngai ahi. Chutengle bou, Jesu chu, Lhagao Theng a eihoa cheng ding ahi. Lhagao Theng chu eihoa achentengle, Aman, eihoa chu Lhagao ga hochu ahin sodoh ding ahi.

Hitia, ‘Lhagao ga chu Ngailut, kipa, cham le lungmon, thohhat, khotona, phatna, kidihna le tahsan um, nunnemna, le kitimthemna’ ho hi Lhagao Theng in ahin sodoh tengle, somakhat, tolom dang peh, chonphatna, tohdohpha le adang hochu, achamchama hung sohdoh jeng ding ahitai.

Eiho bolding kin lenpen chu ‘Jesu a um jing ding bou ahi. Jesu chu Leng le Huhhingpua ikisan tengule, Ama eihoa um a, Lhagao Theng in eichenpiu ahi.

Lhagao Theng hi, Pathen in Jesu Christa Leng le Huhhingpua kisan jouse apeh ahi.

KA THUGUH 2.CHAPANGNEO BANGIN NAPA JESUA KINGAIYIN

Ka THUGUH khat seipeh kit’unge. Masang chun, chihna kana ngaisang in, chingthei tah a hinkho Kaman got jile kakipal jinge. Min eihil’uva, chondan eikomu’u chingthei tah a jui kagotjile, kakisumo jinge. Ka khop in, asohsoh tia kalen chatvaile, katahsa le ka lhuoh in alel kit e.

Jesu kakouva, Ama a kaki ngap phat in vang, chihna jouse kapai lhan, chapang neo chihna neiloulai bangin, ngol lelluh in, lungmongtah in ka um tai.

Apa’n achinjing pasal chapang, anopnop a kichem ho bang in hinkho kamange. Kapa Jesu’n eipui le eichin jing kahen “Pakai, hiche hi kabolnomin, neituhlou nahnahle se nasahlou kahisah a kabol jeng ding ahi” tia taovin kabol jengji. Ase ahile eituh ding kahei.

Jana kagel chu jingkahle, lunggelchompou eipen, boldia kagel masahho bollouvin; achomhel kabolkom atam lheh e.

Suhkhel kanei kakihet a, kalunggel anoplou tengle “Pakai, kabolkhel hitam? Kalung anomtheipoi. Lhagao neipeh hin adeilou hinte ti kagel e. Kabolkhelna a nei ngaidamin. Miho chunga kaseikhel, kabolkhel ahile nei ngaidamin, mihon jong eingaidamna diuvin, alungsunguva seipeh in.A umlouva kona thiljouse umsah, kei jong abeiya kona eisema nahi. Hui le tuipi kinong koma “Umthimtan” natile umthim jeng ahiuve. Miho koma ‘Hiche mingolpa hi ngaidamin’ tile chun eingaidam tauvinte. Ipihile, nangin neingaidam poupou lechun mihon jong ei ngaidam tauvinte. Adihlou chu, tua kona bollou din neituh in. Nei umpi jingin, Lhagao Theng chu ka sunga hin chensah jing jeng in” tin kataojin ahile, kalung nopmona ho eisuhbei peh in, milah a kalhatna ho anomin, koima kachunga lungnommo din kageljipon, ka um anomjin ahi.

Ka umdan hi heleuchun, chapangngol bangbanga um kahi. Ka chaloh, kakiheina jousea hi, Jesu-to kivop kahi kahen, kakoma kagol umto kihou bangin kahou jingji. Ama, Pakai Jesu’n,

“Kagolte nahiuve…….” (John 15:12-15) ati chula em!

Hitin jong katiji, “Pakai, ‘Ka umpi jing ding nahiuve’ (Matthew 28:20) nati bangim eiumpi jingin, neipanpijingin” tin kaseiji,

Lungjinna kaneitengle, chomkhat kalungin kakisaleljin, chomkhat joutengle, “Kagelgel in aphachompoi, ka Pakaiyin alhachaho kam ‘Na lungkhamna jouseu Achunga seplhauvin, Aman nakhankho diu agelnai’ tia asei chu, kei ipidia kaboi boi ham” tia gelin, kataojitai – “Pakai, na Bible thenga na Lhacha ho kama nasei bangin, hiche kaboina hohi, na khut a kakoiye, nei gelpeh tan, tia Ka Len le Huhhingpu, Ka Pakai Jesu, naminin kataove, Amen” tia kaseijoutengle, ka lungsunga konin, eilahmangpeh jitai.

Golte, Mihem chihna hi, Pathen dia ngolkai bep ahi. Pakai anga kichihsah le chingthei tah a uma phatna neitheiyin kigel hih in. Kei bangin, Pakai a kingaiyin, chapang chaho apa koma angolla banga khohelouva auma, ipiham ahi sehle “Hepa” tia ahung ka, ahung eo jing bang hin – lungmong tah in, uminlang, nabolding, Pakai mitmua selou (apha tahtah nang le keiyin ihe pouve) hochu bol jengin.

Suhkhel,bolkhel, kisuhmo naneikomsehle; chapangpa akisuhmoteng kap a apa akoule apan agapanhu jing bangin; taovin, kap in, Pakai koma ngaidam thumin, panpina ngeh jingin, napanpi ding ahi.

KA THUGUH 1.KILE KIT IN KIPANTHAH IN

KA THUGUH 1.KILE KIT IN KIPANTHAH IN

Golte, KA THUGUH sepeh kit’unge. Ka College kai kichai kum 25 jouvin Class 1 simkit bangin Computer,Internet websites boldan ho kakichuh kit in tua khangthahte lah a kapangkit theiye.

Kum 47 Christian hi-nungin, Cross lama kakile kit in, ka chonset phongin, Cross bula kalehlhan ahile ka Leng le Huhhingpu Pakai Jesu Christa’n phattheibohna mangtalouding eipen, kum thumval hi kipana kijet hinkho eimanpitai.

Keima tobanga kipana Jesua um hi midangin jong neile tin kaseisei jengtai.

Nang jong, kipanatah neilou nahile, kineosah in, Cross (Christian kipatna) bula chun kilekit inlang, chonse nahija Pathen phattheina tahtah nachanloulai chu gaseiyin, chonse nahi chu kihet in, nakam tah in, taonan, Pakai koma phonginlang, Jesu Christa chu na Leng le Huhhingpu din kouvin, chule, Lhagao Theng chu thumin. Chutile, Pathen phatthei bohna chu nachana, kipah jing ding nahitai.

‘Penthah’ keova i-ki ngap jiuva ahile, naosen pengtil banga i-um jinguva, khangtou theilou le ga-theilouva i-um denjiuva, kipana le lungmonna kim i-neiji louvu ahi. Hitia chu, thingphung akhangse (khanse) ho ga nehtheilou ahibanga khanse i-hiuva, manthei duhdahlou Christian ihijiu ahi.

TAONA : 1.PHATTHEI NACHAN THEINA DIN MIHO TAOPEH IN

Golte, Pathen thangvah’ute. I-Pakaiyu Jesu Christa’n, Anungjui Ama Huhhingna chang jouse, midang ho seipehson dia eingansenau (Matthew 28:18-20)muna Asei banga, themcha cha hijongle pan i-lah nauva, nangho jousen jong Internet a neihin jopnau tilkhouna jal’a Songpijang sahlam, Lamdukan muna Taonamun (Christian Prayer Centre) May 12 nia pat kihon hi amachal lheh jengin ahi.

Sign-board jong kitahdoh loulaiya Songpijang Headmaster Pu K.Lhouvum in Chair 2 le Bench 1, Sopi Thanggin Guite’n Chair 2, Ng. Phalvah in tuidap koina ding (filter) le glass khon, chule, adanga kithopina hinpe tampi aumtai. Chule, nitinin mi ahungin, taona hungmang le taona hinthum jong atamtai. Amin’u sei ngailouvin ‘CPC a taona thumho’ tin, taonan hin hecheh’uvin tia kahin ngeh nahiuve.

Midia taona i-neitengle bou, Pathen in hanta le kipana dihtah eipehpan ahi. Hatmo kisa jong lechun, tujong hin, dilsu’nlang, hung taovin. Ven, nalungsunga Pathen in kipana le lungmonna napeh ding ahi.

Chule, keila, hitia kisalel kahin, ka ummanpoi. Ahitheichanna uma, Crusader le Speaker Sopi Seithong Keivom din jong taona hinnei jinguvin.

Pakaiyin eipanpi jala Bible Track, eipao, English le Hindi hoa achelheh jenge.

Tuni June 17,2013, chun Hindi Bible Track ka print doh in, Pastor Rev. (Rtd) T.S.Changsan in thensona aneitai. Pastor (Rev.) P.Singson in jong taona neiyin, dammo khat jong tao pehna aneiyin ahi. ( Hindi Bible track Lim 13 lah a khatna Lim kahin tah lange)

Amaho angsunga Nepali khat kakouvin

Pathen phatthei bohna channa dia kiphon leki phaltheng ngai ahi

(tunilhah 1 houina kathusei)
Bible abul ivetle Adam in aloinu suhkheljeh a athiding chu thipi ngamin akiphalin ‘Neh loudia Pathen in asei’, aloinu Eve in anehjouva ama jong apeh chu Adam’in anen, lhagaovin athigel lhontai.Hinla, Pathen in khonunga huhhingna asemkit lotai, Adam kiphaltheng (Sacrifice)hi Pakai dia lunglhai um khat ahi. 
Pathen in alhendoh le akoudoh Abraham chu – agam hetlouna a avale laichun aloinu Sarah koma aseiyin, “Mihoi nahin, min namu tengule nadeichat jeh’uva eithalo thei’u ahi. Eitha sanguvq “Ka sopinu ahi” kati ding ahin, nangin jong “Kahinai” nati ding ahi” atipeh e. Leng Pharaoh in Sarah chu adeichatai. Abraham adohle “Ka sopinu ahi” atin, Sarah chu jidin akipuiyin, thil tampi Sarah man bangin Abraham chu apetai. ( Genesis 12: 10-20) 
Sarah chun ajipa angailut jalin, ain le ajipa dalhan, kichat le thiding jong donlouvin, miji hidin ajipa dalhan achetai.  Hitia, ajipa huhhingna dia akiphal chu Pakai lunglhai teiya hinte, Pakaiyin Pharaoh le a insung mite chunga natna alhunsah in, tongkha manlouvin Sarah chu alepeh sah tai. Hichun, Abraham le Sarah chun gou tampi aneidoh lolhontai. Leng Abimelech tojong chute chun aumkit e (Genesis 20:1-18)
Abanin, Isaac jong apa Abraham bangin ajinu Rebecca chutin abolkit e (Genesis 26:1-32). Rebecca jong, ajipa Isaac huhdohna din akiphal in, Leng Abimeleck ji hidin, ajipa le insung dalhan achen, hinla, Pakaiyin ahuhdoh in, nei le gou tampi alamdoh lolhon tai.
Pakaiyin, Ama thupeh nit jala pan late, suhkhel anei jengu jong ngaidamin, suhkhelna akonin jong, ase beihel le aphalam tah in aheidoh peh ji e. Hiche hoa hin kiphal thengna (Sacrifice) apang cheh e.
Achaina lam in, Nungah Theng Mary chu, aji kihelouva naovop ahiding chu, Israelte dana ‘ajong’(Adulterer) ahin, songa selih ding bou ahi. Hinla, Pakai sei ahijal in, thiding jong kicha louvin, Pakai thupeh nit in “Pakai, nasei chu kachunga lhung jeng hen” tin akiphaltheng (Sacrifice) tai. 
Koi thi malah in, vannoi pumpia minthangpen, Vannoi Huhhingpu Pakai Jesu Nu ahung hitai
I-Pakaiyu Jesu Christa Chula, kiphalthenga (Sacrifice) sangpenin akiphaltheng in, ahinna atoh in Cross chunga ahung thitai. Hichu, nang le kei, chule, vannoipumia mi, atahsan jouse Huhhingna ding ahitai. Ama athi in, Pathen in, loupe tah in akaithou kit in, lei le van a thuneina jouse apetai. Hiche thaneina jal in, Ama tahsate jouse chu “Pathen cha” hitheina eipetauve.
Loupina Pakai chang tahen.
Bible in “Eiho chonset neilouva iki sei’ule, eiho le eiho kilhem chavai i-hiuvin, thutah chu eihoa umlou ahi.I-Chonsetna hou iphondoh’ule, i-chonset suhkhelnau kidihtah a eingaidam diuva, Ama chu  tahsan umtah ahi. (1 John 1:8-9) tin aseiye.
Mihem mitmu le mihem hi’dola miphatah nahithei ahi. Hinla, mihem, numei le thisan guiya kona peng nahi. Adam le Eve guiya peng nahi, chonsetna gui, chonsetbeh thisana peng nahi chu kihet in. Nitin suhkhel hohi, ‘iniquities’, mistake, ‘wrong-doing’ ho jong hi chonset ahinai. Hinla, chonset thisan guiya i-pen’u hin, mijouse chonse ihinau ahi. Hiche hi keisei, mihem sei ahipoi, Pathen thu’n asei ahi.

JESUA HINNA: 1. NUNNOPNA HINKHO MANGIN

1. NUNNOPNA HINKHO MANGIN

Mipha nahiman,thilpha nabol jala huhhinga um nahipoi.Na chonset mana nachandadin jong kigel hih in. Jesu’n eingailut jaluva Cross a hungthia eilhatdoh’u ahijoi. Solchah Paul in ”Lungset jala tahsanvanga huhhinga um nahitauve,hichu nangho jal hilouva Pathen thilmohpeh ahi,tohphat (chonphat)vang ahiloujeh in kisonna thei ahipoi” ati.(Eph2:8-9)

Hiche Bible chang hi NIV a hi iledohle “Natahsan jal’uva chu nasandiu lomlouleu deichomna nachan’uva Huhhing a um nahiu ahitai, hichu nangho jal hilouva Pathen thilmohpeh ahi,tohphat (chonphat) vang ahiloujeh in kisonna thei ahipoi” ti ahi.(Eph2:8-9)

Mipa phatah chun, achaten thilpha, neocha hijongle, ahintohdohteng, kipah behseh a, adeichomma, manthei duhdah ahilousasa jong manchah a aneiya, asontenji ahi.

Hiche banga chu, eihon Pathen hi ThiljouseSempa Pathen ahi tia i-tahsan’uva, Jesu Christa hi Achapa ahin, eiho chonset jeh a tonsot a themmo changa thiding ihiuva kona eihuhdoh diuva ahinsol ahi i-tahsan’uva; Jesu Christa chu Leng le Huhhingpu dia ikisan tengule, Pathen hi kipah behseh a, i-tahsan’u hi, Ama (Pathen) tena dola lhinglou hijongle, deichomna sangtah einei’uva, Acha ( Lamdoh cha) dia eikisanjiu ahitai.

Chutengle, chonset in athua einunsahnauva kon, chonsot soh’a i-umnauva kona chu eihuhdoh’uva, chonset thaneinan eitohkhah phah tah lou diuva, Satan koma “Ama hi Kacha ahitai, natohkhah theilou ding ahitai” tia ‘Huhhing cha, Huhdohsa cha’ dinmuna eikoi jiu ahitai. Hichu, Bible seidung juiya “Huhhingna chang, Hudoh’a um” tia kisei ahi’n; hitia um ho chu ‘Pathen chate” tia kihe ahitai.

Hitia chu , Chonset noiya uma ‘Chonset cha, muthim cha’ i-hinauva kona ‘Pathen cha’ ei hung hisahnau chu ‘Penthah, Lhagaova Pengthah’ tia kisei ahi.

Hichu, John 1:12 a kisei hi ahitai – “Tahsa dol’a peng hilouva, Lhagaova(Pathen lam’ a) peng ti’na ahin; hitia Lhagaova peng hochu tahsa mihem –Pasal le Numei lunggula kona le thisana kona hung kijil hilouva, Pathen lungdeia peng (Pathen le Jesu Christa tahsan jal’a Pathen cha hidia kisemthu, Midang cha, deichom tah le ngailutna jala kikilah a eima chadia dia kisem tobang ahi) ahiuve.

Hitia chu, “Acha” hi’na lhingset eipeh teng’ule, Pathen in Lhagao Theng chu eipehjiu ahi.

Bible track Lim 13na

Bible track Lim 12na

Bible track Lim 11na

Bible track Lim 10na

Bible track Lim 9na

Bible track Lim 8na

Bible track Lim 7na

Bible track Lim 6na

Bible track Lim 5na

Bible track Lim 4na

Bible track Lim 3na

Bible track Lim 2na

Bible track Lim 1na

Bible Track 2

Pathen phatthei bohna kisanin pm 2

Abanin Lim 1 - 13 banneichan ven

Bible track pengmai 1

Pathen phatthei bohna kisanin pm 1

Abana pengmai 2na ven