Gollhang cha kahilai chun nungah hohi lunghang theilou din kana gele. Chue, nungah hoi hohi mijousen aja ding, ahoungamlou din jong kana gele.
Hinla, kana gel hochu adihlou kijet anahitai.
Nungah ken kana hou ngamlou le koiman angapsung loudia kana gel hochu, anopnop a bol jeng jong atam tai. Hoi kasha le ka itlotlot a ken jong kakhoi ngamlou hojong mi kichepna asoh taove.
Tahsanna pilhing a, lhepna in anai ngamlou dia kagel tamtah in ‘lhepna’ atoteng alhop loi loi jeng, Christa nungjui ahijong kihetlouva, agellou banga thilasotengle ‘lhepna’ ahijong helouva, Peter (ahetthem masanga) banga ‘chemjam’ satdoh a sat loiloi jeng kamucheh cheh in hatah in keima kakinlo kha e.
Hinla, ije behseh katilou, tahsanna lama hat behseh loudia kagel konkhat chu kagel sanga lhepna dou hattahtah kamukit e.
Abanin, houlamkai tamtah hin ama hihen midang hijongle lhagao lama khantouna ding gellouva tahsa kivaipohna lamngaisanga sei le bol,Houbung jong hiche lama chu khantousah ding bou boipi tampi kamutai.
Konkhat hin hou kivaipohna hi lamkai hina, thuneina, minphatna le tahsa gouthil neina dia agut danin kamun phamo kasa lheh jjengin ahi.
Hitobang kato hohin, phatkhat chun eijep lhu deh jengin ahi!
Hitia ka umlai, kalunglhah le kalunggel asetlai tah chun O khat hin “Nang naphat ham?” eihinti!
Hichun,kalu ahbomte ahijengin, kanung lhuh deh jeng e.
Ka lungmit chun ‘cinima role film’ kive bangin ka seikhel, kagelkel, katoh khel, kanehkhel le kaboldia pha kabollou jouse chu khat khat in ahung kilang lang jeng tai.
Hichun, kalunggel in “Hichepa hi manthei hilou hila” katitai.
Hichun, Ogin chun “hichepa hi nang nahi. Nangma le nangma kamusah nahi” eititai.
Chutah chun, “achutile, hitobang hi Pakaiyin angailutpa chu kanahi ham!” tin Pakai chunga kakipana chu nasatah in ahung sangtai. Hichun, hitihohikahin-geldoh tai :
”Mijouse hi chonse ahitan,Pathen loupina chu changlel ahitauve” ati ahi (Romans 3:23). Chujongle, hiche chonset chun tonsot adia Pathen to kikhenna, thina asodoh ahitai(Romans 6:23).
Chonset ngaidamna changlouva koima Pathen kom jonthei umlou ahitai. Jesu’n, “Pengkit louvin koiman Pathen lenggam amutheipoi” ati ahi(John 3:3)
“Pathenin vannoi angailut behseh jeh in Achapa neisun(Jesu Christa) chu apetai, hichu, Ama tahsan chan mangthah louva tonsot hinna aneitheina ding ahi.” — John 3:16
Pathen ngaidamna, huhhingna chu Jesu Christa tahsan jala bou chanthei ahin, mihem tohphat jal le mihem kihabol vang hilou ahi. Mihem in huhhinga iumtheina diuva imacha bolthei ineiyu umlou ahi. Pathen khotona jala bou huhhinga um thei ihiuve (Ephesians 2:8-9).
Eihon hichu itahsan’uva, ngaidamna chu changa ihitaove.
Na chonsetna kingaidam ahitai (Colossians 1:14), Pathen cha nahitai (John 1:12), tonsot hinna nanei tai (John 3:16)
Hinla, het jing ding chu :
Jesu Christa-a hinna naneitengle, boina ding umtalouvin geldan. Ajeh chu, na kidoupi jing le Pathen doumah boljingpa Satan chun Pathento hinkho naman khom ding chu nomlouhel ahi. Amachun, na lhahsapna ho vegeuvintin, na lung lhahsah agot jingding ahi. Hitia chu, lhagaova na hatmona lai chachu mangcha a naloilhuh got jing ding ahi. Hitia chu aumtengle lunglha hih in. Chusangin, nalhahsamna chu kihet inlang, napanpi din, Satan jousa na huhhingpu Jesu Christa chu nahudin kouvin. Taona mang jingin lang, lhepna chu najopeh din kikouvin. Bible sim jingin, hiche kipuihoina simmun hohi sim jingin. Pathen in najoding kalval lhepna natosah louhel ding ahi tia Bible in asei ahi (1 Corinthians 10:13).
Nang bou lhepna toh a nakigel thei ahi. Hinla, atahsanjouse lhep a umcheh ahi. Lhepna hi chonset ahipoi. Jesu jeng jong lhep a um anahi(Hebrews 4:15). Lhepna kijosahna akona chonset umji ahijoi.
Lhepna najona din, na hahsatna chu Pathen kom lhut loiyin, achesot masangin. Taona ha manin. Lhepna le hahsat-boina nachanna lam chu hagel danlang, Pathen lam hageljon (Philippians 4:8).
Hiche hoa kona chu hetna le hinkho manna lama kihilna pha neina ding joh in Pathen koma taovin. 1Corinthians 10:13 hi lunglut tah in siminlang, tepna aneiho ahin kingaiyin.
Pakaiyin umpijing tan.
No comments:
Post a Comment