LUNGHAN LE MIPHO APHA HAM

Sopite, thase ho phohsal'un, lung lhachom tilkhouvun, alhasam kithopiuvin, mi jouse dia thoh hat dinga ka-ngeh-u ahi.

Chingtheiyun, koiman setna chu setna thuh louvin, chusangin phat jousen khat le khat din jong chule mi jouse din jong thilpha bol ding go jinguvin. (1 Thessalonians 5:14-15)

Namit sinsah ingting, nahou jing pumin nati-natahsa ho chu khoiyin meh/sih in, najen leleng namittah a neimulou vanga nakoma kaum chu nahet ding neimu banga nagel ding ahi.
Hichu,keima Pathen in (alhacha/avantil tiding ham in) einajena, katahsa le lhagao adamsah a, nunlui le mellui chavai jouse jong eikheldoh peh danchu ahi. 

Hitia, Pakaiyin kahinkho eikhel pehtil chun kaloinu akipah behseh jengin, lunghang thei talou din einagelkhai. Ajehchu, kum khatval tobang chu lunghan le phunchel bollou kana hi. Ajehtahbeh chu, hiche phatsung chu, apengtil naosen banga um --- tija geuva um, suhkhel ding kicha jing; ipi bola, iti hinkho man ding ham helou; umje, tohje, seiding jong helou, ‘practical’ hinkho mannaje helou (inactive life manga ) kana hin, lunghanpi ding umlou ahi.
Keibanga kidanga Pathen in ahinkho akhel ( keima thum le hol jong hilou, tahsa le lhagaova eijendam, eijen pet jong mit a eimusah, Ama lim kamulou vanga, eihou le aseijouse kajah, alim kamulou vanga aum kahet, kamua kagel jengthei.
Mithemtah (Writer) khat in “Nang tobanga Pathen in ahinkho akhel hi mi sangni-sangthum lah a khat bou aumji, mi vangpha mong mong nahin, thangset um nahi” eiti.
Kumkhat jouvin, ol ol in lunggel kahinneiyin, ‘practical hinkho’ man angai chu kahin hetai. Tahsa hinkho manlai sunga hi tohding, milah a lhatding, mun chomchom hoa lhat ding, neh le don bolding, business chomchomjong bol ngai ahi; suhkhelkichat mana umthim jeng ding ahipoi; tahsa hinkho jong mantei ngaikhoh ahi kahin hechen tai. Hichun, thu jong kasei ngam dom domin, hoilim bol le neh le don, chule, chele vale, natoh jong kahinbol pantai.
Chuphat in kaloinu le kachate oimo le pho kahinbol pantai. Lunghan kipanta. Hichun,kaloinu aungdong in “itihai, angaingai nahikit ding hitam?” eiti.
Hichun, ken jong, “Nachatvai le nasuhkhel jouse jong pha kasahding ham? Aphalou chu douding, ase chu kidintetpi ding ikinu ahi. Bible in ‘Agiloupa chu kidintet piuvin, le-nouvin. Chutile,nakomuva konin jam tante’ atichu nahetlou ham” katipeh tai.
Christian nun, penthah nun hi hetkhel louding ahi. NUnphat ngaiya ahi. Hinla, lunghan louding, moh phat a phat ding, aphalou jong donda ding tina ahipoi. Apha bollding, apha bolding le seiding; aphalou chu paiding, phoding, semphat ding tina ahi.
Hiche hi hetthemlou jeh in, Christian insung le Houbung sunga adihlou semdih le semphat ding donlouva ahihia hisah a phattouna umlouva angaingai hihijeng hi umthei ahijinge. Pathen thu le Christian hinkho hi hetthem ngaiya, Pakai Lhagao Theng panpi ngaicha jing ihiuve.

Jesu Christa tahsana, Huhhingpu le Pakaiya kisana, Athu hetthema le nit a manthem hidin Bible hi nitinin simin, tao jingjengute.
Pathen in na panpi jing tahen.