NGAILUTNA HAPTA MANGIN

Lungdonna Hapta hi English in Passion Week akiti. ‘Passion’ kiti hi Dictionary ivet-le ‘fervor, ardor ,obsession, infatuation, excitement, enthusiasm, zeal, craze’ ahi.

Hichu, ‘lungdonna’ hilouva ‘ngolpi’ tia kaseiji hi hijole kakilomsah in ahi. Nungah, Car, Inhoi, thilpha hamkhat deivala ‘Ngolpi’, ipi hamkhat gut le thanoppi vala ‘ngolpi’ leu tina lam joh hinte kati.

Hiche phat sung thu hi Matthew 21-27; Mark 11-15; Luke 19-23; John 12-19 hoa hin akimun ahi.

I-Pakaiyu Jesu Christa hin, ei ngailut val jenguva, hahsatna, voh le den, jachat le jum, thinagei jong ija seplouva, chonset jeh a thia mahthah dinga ium diu hi nomlouva, Amakom ijottheina diu ahipoule tia hung kipe jenga ahi.

O, a ngailutna hi anasa behseh jengin ahi. Ahethem hodia, Peter banga abungbua kikhai jong ipi ngaplel aumpoi.

Ajehchu, Ama a ‘huhhingna, hinna, nunnopna’ chan hi tu hinkhoa jong nopna, kipana ahin, tahsa thinunga jong tonsot a Pathen-to chen khomna ding ahi.

Eingailut behseh jeh’un, Hiche eihon ‘Lungdonna hapta’ (Ngolleuva eingailutnai avetsah sung) hin, thilsoh, seidoh le boldoh tampi aneiyin ahi. Hiche sunga hin, eingailutnau avetsah dan hi kidanga ahi. Hiche jeh ahi, Houbung lamkai masahon ‘Passion Week’ atiu ahi.

Hijeh achu, Ama bangin Jesu Christa hi ingailutnau, ngolpi leuvin vetsah’ute.

Ahoi hoiya, naljet a kisema, naltah a hinkho manna hi athengin aphai. Hinla, nungah kihoisah tah jong, athenglou kidah jingnu jong chun, nao ahinneitah tengle, anih akan singa, kidah donlouva, anao eh ho asop jeng ahi. Hichu, ngailut ahi.

Hiche banga chu, I-Pakaiyu hin, van a loupina le lalna jouse dalhah’a, leiset mihem, kidah umtah, natna le thina tohthei mihem tahsa ahung kivonna; voh le den, totnopna, daichatvaina, cross a thinagei ahungthoh ahitai. Hitobanga, eiho ei ngailutnau chu leiset mihem geldia ‘Ngol kaitah’ ahi.

I-Pakaiyu Jesu hin, mihon ‘Mingol’ atidiu ije atipoi. Nang le kei eingailut jeh’uva, hiche ho jouse chu ija seplouva, ahungthoh ahi.

Pa Pathen in vana konin, Achapa thohna chu ahinmun, akipan behseh jengin ahi. Nithumnin, lhana konin akaithouvin, Ama (Pa) jetlama atousah in, lei le van chunga thuneina jouse apetai.

Hijeh achu, hiche athohna le tonsot hinna kot eihon peh thu’u hi vannoi muntina seidia eisol’u ahi. (Matthew 28:18-20)

Nangjong, a huhhingna change nahitah-le, kipanin. Navale theilou jongle, Pathen in napeh na Mobile, Computer ho beh in thot in. Na loi le gol le tohkhompi le adang ho seipeh jin. Toumun houlimna le Hou-in hoa jong seiyin. Jahcha hih in.

Pathen thu itiuvin, mitamtah in aseiyin, thudangdang aseiji. Kivaipohdan, nunchanpha, thenna, themna, chihna, khantouna, Houin sahding, tolom peh ding, thakonding, miho thusim le adang seiding ahinai. Pathen thu ahi cheh nai.

Hinla, hiche ho chu, ‘Gospel’ thu tahtah ahipoi. Gospel thu hi seiyin. Hiche, ‘Jesu penapat athia athokit le ahungkit ding thu ahi.’ Hichu naseile ‘Milah a Christa phongdoh a’ nahiding ahi.

Kipanin. Nitinin, Athupha Bible ahin sim jingin. Tao jing jengin.

Pathen in na panpi jingta hen.