Jesun Ichonsetnau Thipin Tonsot Hinna Eipetauve

Pathen in Mihem masapen, Adam themmo achanin, A-angsung (Eden honakonin adeldohtai.

Hinna-pepa, Pathen umlouna a um  chu ‘Thina’ ahitai. Adam le Eve, chule asonho, mihemte jouse hi Lhagaova thisa ihiuvin, hichun tahsa thina gei jong asodoh ahitai.

Eden pama um chu tua leiset ichennau hi ahi. Pathen umlouna muna hinkho hi hahsatna, gentheina, natna le thina ahijeh in, mihemten, alungdon tengle panpina ngaichan Pathen ahol’un, akap un, ataojiuve.

Pathen in asemsa mihemte kana le taona chu Ngailutna in asangin, apanpi diu le chonset-thahatna in abolgentheinauva kona huhdoh din Achapa Jesu Christa chu ahinsoltai.

Pathen hi kidihtah le asei thonngailou ahi.

 Pathen hi Atheng ahin, aboh-to umkhom theilou ahi.

Adam koma ‘nabollouding, nabolle nathi teitei ding ahi” anati chu Adamin anaboltai.

Pathen thupeh nitlou chu, Pathen dihna palkeh, athenglou ahitai. Hichu, Bible in ‘chonset’ ati ahi.

Adam le Eve bangin, mihem jouse hi Pathen thu nitlou, Pathen kidihna le thenna neilou kijet, ‘chonsetna’ nei cheh ihitaove.

Miphapena kihe jong chu alunggel a midang vetdana, thetna, khopna, thangsetna nei. Lunghang jingthei, mikhat house nom, samsenom, dengnom, le misetna thei seinom le bolnom ahithou thouvin ahi.

Hitia, setna umjouse hi Pathen thupeh nitlouna akona umdoh ahi.

Athupeh nitlou jeh a mihemte hi hingden lou dia Pathen in ana gonsa ahitah jehchun, tahsa thina jong aumdoh tai. Hinla, asemsa ahijeh in, mihemte hi angailu in, tonsotgeiya Amato ahinkhom kitna diu lampi asempeh tai.

Pathen chu Athenga ahijeh in, Amato chenkhom kitna dia ‘Thending’ ngaiya ahi. Thenna dinga chu ‘thupeh nitlouna, setna, chonset’ mihema um chu suhbei ngaiya ahi.

Mihem koima ‘adih le atheng tahtah aumpoi’. Asutheng dinga Pathen mama ngaiya ahitai. Hijehchun, Pathen Amatah in mihemte ahung suhtheng ngaiya ahitai.

Hijeh achu, Pathen in Achapa Jesu Christa chu vannoiya mihemte sutheng dinga ahisol ahi. Jesu chu, mihemte jouse ‘setna, chonset’ jouse hi sumang dinga Pathen in ahinsol ahi.

2.Jesu chu mihem in ahungpengtai. Aman ‘Pathen Lenggam’ thudol ahin seiphong letai. Hinla, Judaten, amaho le akivaipohna jouseu sumanga hung danin ageltaove. Amanun, Cross a khetbeh a thadin Rom solkal vaipo Pilate chu apedoh un, atha teidin angeh taove.

Bible’a John 19:16-34 sungthu seitaote :

Pilate in Jesu chu themmo achanin, thadingin Jerusalem khopan Golgotha muna chun sepaihon Cross chunga akhenbeh taove.

Thiljouse alhingsoh tai ti Jesu’n ahetphat in, Pathen Lekhabuthenga kisun ho abulhit sohna din, “Kadang achah’e” tin apengtai.

Sepaihon tuichopna pon chu lengpituiya kisem juthuh achun adekot un, mol saotah ahin atah un, thingpela um Jesu muh achun agah sutouvin ahi. Jesun, ‘juthuh’ chu asangin adon jou phat in, “Akichaitai” atin, alu akaikun alhagao alhatai (athitai).

Ajing nikho chu, Judate Nitheng (choldoni) ahijehchun, Juda hou-lamkai hon thilong kikhai den chu adeipouve. Athi chetna dia akengteni hehboh a, along lahlhah din Pilate angeh taove.

Sepaite acheuvin, Jesu amuphat un athisa ahichu amu’vin, Jesu keng ahehbong pouve.

Sepai khat chun, Jesu nahmong chu tenga agah sut-le, thisan le tui ahung longdoh e. (Thisan le tui kihal hi athi kicheh hetna ahi)

3.Pathen in mihem masapen Adam chu themmo chanin,  Eden hon pama adeldoh tai.

Pilate in Jesu chu themmo chanin, thadingin Jerusalem khopi pam Golgotha muna asoltai.

Adam le mihem jousen lungdon, genthei, thohna le natna athoh in, thinagei atoh e.

Jesu’n jong lungdon, genthei, thohna le natna athoh e.

Jesu’n, ‘juthuh’ chu adontai. Hichu, mihemte ‘chonset, genthei, natna’ jouse Aman Ama mopohnan akilahtai tina ahi.

Chutah chun, atoh ding jouse achaisoh ahitah chu ahechen in, aphongdoh in,

“Akichaitai” tin asamin, alhagao alhatai.

Hichu, Jesu’n ‘huhhingna’ kin achaisoh a, mihemte athidiu khela athi hetna ahitai.

Jesu kinbol Pathen in asan hetna in ‘Thimpi ajinsah in, Ling akihottai’.

4.Adam chu Pathen in anasem tai. Adam achanga aum chu Pathen in phamo asan, achenkhompi ding agonpehtai. Pathen in Adam chu a-ihmut sahtai. A-ihmut kah in, Pathen in Adam nahgu khat aladoh in, Eve (Numei) asem tai. Chuphat in achenpi, ajidin Eve chu apetai.

Jesu athi phat in, Rom sepai khat in Jesu nah chu asunin ahile “thisan le tui ahung longdoh tai”.

Adam(Pasal) nahgua kona Eve (Numei) ahung umdoh bangin. Jesu Christa ‘nah’ akonin  ‘thisan le tui’ ‘Huhhing chate’  ahung umdoh tai.

‘Huhhing chate’ chu sopite ana kitiuvin, khonungin ‘Houbung’ ahung kititai.

Nang le kei jong ‘Hunghingna’ chang, ‘Houbung mi’ ihitaove. Hichu, Jesu Christa thina akona, anahgua kon ihitai.

‘Huhhing chate’ hi ‘Pathen chate’ (John 1;12) ihitaove.

Loupina Pakai chang jing tahen.

Hiche ‘thuguh’ hi hethema ‘tonsot-hinna’ chu chang dingin, Pathen in Achapa Jesu Christa minin Lhagao Theng in napanpi jing tahen, Amen.