PATHEN IN MIHEM A NASEM LONA NA HET EM?

Ipi dinga Pathen in mihema nasem ham tihi nagel khah tah em?

Sahem hilou, mihem a nasem hi doi le tup neiya nasem ahi.

Nasempa’n ipi hidia nasem ahi donlouva, nanop nop a na um chu dih nakisah hi nam?

Vetsahnan : Me-a hondin  Maipum khat nacho tai. Neocha chan na-at in, konga nakoiye. Chuin, Bel nalan, asunga tui nasungin, meichunga nasong tai.

Tui chu sou tadinante natin, malcha na-at in ahile; na kisah-lel kah in, maipum na-atsa hochu, meichunga bel sunga chun achamin analut’un, anamin deltai.

Nane nom nadem? Ole, iti nagel dem?

Na kipah dem? Ole, nalung ahang dem?

Keima gel danin vang, Thilha bol hisah inatin, nengam po’nate kati. Ahilou jongle, kidah inatin, nenomponate.

Anche bon nagel banga aumlou naki’chat’a , nakidah-le, Pathen dinmunin ding patep in.

Nasempan, agon banga umlouva; nasempa doi le tup donlouva, nanopnop a naum chu, dih nakisah name m? Pathen in ipi agel dem? Lunghang lou ding ham?

Kho-hetna, lunggel theina napeh chu, nasempa lungdei nagela, nahetna dia abol ahi. Alunghan-le, nadonda ding; napaimang jengthei ahi.

Ei sempau Pathen lungdei donlouva, inop nop’uva hinkho iman’u hi Bible in ‘chonset’ tia asei ahi.

Mitamtah in ‘chonset’ hi ‘mi tha (toltha)’, ‘ju’ le ‘khamnatheidang bol, ‘guhchat’, le thilse mongmong ho bol bou hidin ageljiuvin, Pathen thu ahe chentheipouve.

Bible in ‘Chonset’ ati hi hetthemlou jeh in, ‘chonset ngaidam thumding’ atihi adonnompouve. Adeh’a, mihem mitmua mipha dom hon Pathen “ipi suhkhelval kaneiya, ngaidam kathum ding ham?” tin ageljiuve.

Chonse ahi kihetlou jeh a, ngaidam thumlou mitamtah  aum jing nalaiye. Hijeh hin, hitobangmi, mipha, Houlamkai, Bible sima Pastor, Evangelist  hung hiho, tamtah hin Lhagao Thilpeh – mihon chonset lung aheiyuva, akisemphatna diuva kinbolnathei achangthei behseh pouve.

Chule, ‘tohna hai geiya Houbung lamkaiya panga, thu jong themtah le sangtah tah a seiya, athuseiya kona mihon  huhhingna le Lhagao thilpeh chomchom hoachan’u kihelou tampi aume.

Ajehchu ipiham? Amatah in Bible sei ‘chonset kiphonna le ngaidam thumna’ aneilou, Lhagao thilpeh changlou ahijeh ahiji.

Pathen hi lhagao ahi natahsan’e. Athu jong lhagao thu ahi natahsanai. Hinla, Lhagao Theng ipi ham hechenlou Christian tamtah aume. Chule, Pathen thu hi, Pathen Amatah in ,semtila pat a ahinseiya, miho hetsah dia Themgao ho ahinseipeh a, hichu kisei sonpeh bou ahi.

Themgao hi ‘Pathen thusei lhunna le aseison dia nganse khat’ ahi.

Tukhanga ‘Themgao’ aumpoi tia gel atam’e. Min hi ‘Themgao’ tia kimang ahitapoi.

Jesu Christa huhhingna chang jouse chu Lhagao Theng in aumpi ahitai.

Lhagao Theng chun, achennapa/nu chu Pathen thu ahinseisahji ahi.

Lhagao Theng manchah jouse hi  ‘Themgao’ natoh tonga ahitai.

Hinla, hiche hoa kon jong chun phat jousen Lhagaovin thu aseideh jipoi.

Lhagao Theng chenna hochun, phatecha taona manga Pathen thu aseitengule, Pathen in phatthei aboh’a, asei ngaiho chu Pathen phatthei bohna changjiva ahi. Chutengle, mihon Jesu Christa akisanuva, Lhagao Theng in achenpiji ahi. Hichu, ‘Huhhingna chang’, ‘apengthah’, ‘Lhagaova hinna nei’, ‘Tonsot hinna nei’ , ‘Jesu-a hinna nei’, ‘Nunnopna nei’, ‘Pathen phattheibohna kim kisan’, ‘Longlou Lenggam kisan’, ‘Christian dihtah’,’Christa-to hingkhom’ tia Bible in asei chu ahi.

Nachan tah-le, na khantouna din nitinin Bible siminlang, tao jing jengin.

Nachan loulai-le, tuhin, taovin. Jesu Christa chu kouvin. Chonset ngaidam thumin, kisan in.

Pathen in nataona jouse nasanpeh jingjeng tahen.