KICHEH TAH A JESUN AKIMUPI HOA KONIN BOU HINNA HI MI APEJI

Pathen thu hi kichuh thema seithem ding ahinai. Hinla, itobangin themin seithem jongleng, keiya hi Pathen achenloule, kasei jahon hetnan vang neitheiyuntin, hinna’a vang aneilou maitheyu ahi.

Pathen in ‘hinna’ apeh kiti hi, ‘A Lhagao, Lhagao Theng’ apeh tina ahi. Pathen in hiche ‘hinna’ ‘Lhagao Theng’ apeh hi mihem khut akonin apepoi. Amanbou apeh ahi. Mi apehna din, mihem amangchaji. Amanchah mihoa chun Lhagao Theng hi apansan, Pathen thilpeh ‘hinna’ chu apesonji.

Achomlama seidin : Pathen in Ama a um ‘lhagao hinna’ hi Jesu Christa tahsana kisan ho apeh ahi. ‘Hinna’ neiho chu amangcha in thu aseisah in, aseiyuva kona tahsan ho chu ‘hinna’ chu apeji. Amanchah ho chu ‘tuikai’ abou amanchahji ahi.

“… ‘Keima eitahsana chu alungsunga hintui put’a luiya longding ahi’ atibanga um ding ahi,”ati.(John 7:38b)

Thu kisei hohi hopni in aki khen’e. Hetna dia kiseiloi aum’in,‘hinna’ dia kiseiloi aum kit’e.  Leiset a cheng nahlai ihijeh un hetna jong angaiye, manchah din. Hinla, hiche hoa hin ‘hinna’ hi min amuding ahahsai. ‘Hinna’ dia kisei hohi achamcham (automatic) a hungdoh, mohmaimai bang, ngol thut a kiseibang ahiji. Eiphut tuntuna, ipi ahijong kihebehseh louva, ei seisah’a, ei jihsah’a uma ahiji.

Seikit’inge : ‘Hinna’ thu hi kihilthem vanga muthei ahipoi. Pathen in Lhagao Theng a mihem kama aseidohji ahi. Hichu, Pathen kamcheng ahijin, ‘Vah hung umhen’ atile ahung um jeng banga chu, Pathen kamcheng mihem kama hung potdohji hochu “Pathen thu ‘hingjing’, natong hattah chu ahijin, mite lung asunkhan, Pathena ‘hinna’ hi akisanjiuve.

Chihna- themna notthap ding ahipoi. Kihil ding, kithemchuh ding ahi. Ajehchu, min ahetna akona ahin kihola atahsanthei ahi.  Ahetna akona chu, munchombeh khat a jong Pathen in  achoisahmi-to akimuto sah a ‘hinna’ chu chang jengthei ahi.

Bible a ‘jindot them aseina muna, ‘mikonkhat in vantil jong alhunsahji’ kiti banga hi, Vantil hihen mihem amanchah phatah jong nahetlou kah a nakoma hung jengthei ahi.

Kataona hi, “Pakai, mandinga lom nei hisah-le, na ‘tuikai’ in neimangin” katiji.

Chule, kathusei hoa hin, hetna manga kasei sangin, achamchama hungdoh kaphondoh ho hi mihon asantheiyun kamu’e.

Pathen thu hi akhang akhanga Pathen in ahinsei, Themgao ho kama ahinsei bou ahi. Themgao hohi ‘tuikai’, ‘Microphone le akhao’ banga anaman, tuilonsaona, thu pehsonna a Pathen in amaman bou ahi.

Pathen in amanchah a, ‘hinna’ pesontheiya achoisah hochu, Christa-to akimutona kichehtah hobou ahijiuve. Kicheh tah a kimutolou ho hi ‘hinna’ chu choisah ponte kati. Achutiloule, i-neovuva pat a houin kaina umjing, Pathen thusei kingaijing tah a, ‘hinna’ choiya Pathen manchah kihe behseh lou.

I-gam pumpiuva, Songpijang hi mithem umna tia jatdang hon jong eijabol’u ahi. Athem behseh umhih jongle, mihon agelbanguva, Pastor, Theology them tahtah thusei kingaijinga ahi. Mijouse hin ‘hinna’ hi apesontheiya ‘choi’ cheh hitaleuhen kilomtah ahitai. Hinla, ahideh poi!

Tamtah thusei hi, alunghanga hileu kilom ahiuve. Lunghanga, sensala le avoh-adento thoa mihon ‘hinna’ akilah diu hijongle, Houbung mite hin ‘hinna’ nei cheh in, apesonthei higamtau hite. Hinla, achuti dehpoi!  

Pulpit chunga thuseina’a, ahetlou kah’a seidoh “eibon i-iti mong mong ding kihelouva, hitibep hokhu iti diu ham!” tia sei akijatam behseh jenge!

Jesu Christa-to nakimuto kicheh nam?

Kicheh mong monga, na Huhhingpu, Jesu Christa hito nakimuto nah em?

Nahinkho chu kikhel mong mong nam?

Kipana le lungmonna dihtah nanei nah em?

Tuhin thijeng lechun iti na um nadem?

Boina atamtai. Thithut hi abai valjengtai. Jinga din gel hih in.

Leiset a nahinlaiya lungmonga hinkho naman theiloule, thinunga din moh kinep hih in.

Pakai Jesu’n, “Lungdog hih un” (John 14:1) ati hi, Ama tahsana kisante ‘Huhhingna’ chang jouse chun  hinkho hi ‘tua le khonung dinga jong lungdong louva, lungmonnakim neiya mangthei ahidiu kiseina ahi.

Nakimuto akichehlouva, lungmonnakim naneiloulai-le, kilhanpha jengin. Velbol angailouvin gel hih in. Thil kiboljouse hi akisuh loule kivelbolji mong ahi.

Huhhinga naum le naulou chu, miho, thuseiho, Pastor ho, Crusade bol ho seiya kingap ding ahipoi. Keiman jong, nahi le nahilou kaseithei ding ahipoi. Nangin nahet ding ahi. Nasunga cheng lhagao chun ahet ahi. Nachantenglebou lungmonna le kipana dihtah naneipi ding ahi. Nachan lulaile, tuhin - Jesu kouvin. Guhthimin taovin, koiman namu le najah angaipoi. Pakaiyin, namu jingin, naja jingnai.

“Guhthim chan, na indan sunga lut in, guhthima namu, Vana um na Pa’n, nataona asan ding ahi” .

Taovin, chonset thina dinmuna nauma, lungmonga naumtheilou, na kicheh theilou chu phongdoh in

Taovin :

“ Pakai, iti ka um ham? Lungmonna dihtah kaneitheipoi. Michavai, michonse, chonset thina muna umnalai kahibouve. Kachonset jeh a nahung thina, nei thohpehna-ga chu neipen. Ka chonset jouse neingaidamin, neisiltheng peh in. Pathen cha din nei pomin. Tonsot hinna, Lhagaova Penthahna, Hinkho thah chu neipen. Lungmonna kim neipen. Chutile, lungmong jing tang kate. Leng David in “Kachonset soptheng-lechun theng tang kate” ati bangin, nei soptheng-lechun theng tange, tia  ka Pakai Jesu naminin kathume, Amen.”

Pathen in nataona sang henlang, lungmonna kim, kipana kim chu nape jingjeng tahen.