Jesu Christa Lam Ve jingin

3.Christian hinkho manna, van gam jotna ahin nasumoding adimset e. Satan lhachahon nalhuh akipapijiuve.Satan loi hochu tua naloi natoh khompi hojong chu hithei ahiuve. Taona le Bible simna nei jingin.

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Hinla, lungdong hih in, I-Pakaiyu Jesu Christa’n chonset, lhepna le Satan ajosa ahitai. Ama’n aseiye,

 “Vannoiya hin hahsatna natoh’ui, hinla, lungmong’un, Keiman vannoi kajoutai” tia asei ahi(John 16:33).

Jesu Christa tahsan in, Ama lam jengven tahsannan kisuhhatsah jingin. Ama song jingin. Na panhu jing nannate. Niseh in Bible sim in, tanglouvin tao jingin.

Chejing ute Christ Songin

2.Van-gam injona iche nauva hin eisumo diu adimset e. Hinla, lungdong hih in Vanmiten jong eivejingun, eitaopeh jinguve.Tao na le Bible simna nei jingin

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Hejingin, I-Pakaiyu Jesu’n aseiye,

 “Vannoiya hin hahsatna natoh’ui, hinla, lungmong’un, Keiman vannoi kajoutai” tia asei ahi(John 16:33).

Van Gam Jona Chejing Ihiuve

1.    Van-gam ijot nauva hin eisumo diu adimset e. Tao na le Bible simna nei jingin.

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati. (Matthew 26:41)

Hejingin, I-Pakaiyu Jesu’n aseiye,

 “Vannoiya hin hahsatna natoh’ui, hinla, lungmong’un, Keiman vannoi kajoutai” tia asei ahi(John 16:33).

Solchah Paul Bang Hiute

“Jesu Christa jal’in i-Pakaiyu milungset chu tahsan le ngailut pumin keidin alet lha jengin ahi.
Chonsete huh-hing dinga Jesu Christa vannoiya ahung hi tahsan dinga lhingset thu ahi; chonset ho lah a keima akhoh pen kahin,” (1 Tomothy 1:14-15)

Solchah Paul hi Jesu Christa thuhil seiphong jouse lah a anasapen ahi. Jesu’n vannoi adalhah jouva, Ama khela miho Athu hildia anganse ahi tithei ahi.

Hitobang miloupi Solchah Paul bonin “chonse ho lah a keima akhoh pen kahi” atitheile, nang le keila iti louding ham? 

CHRISTA THOKITNA THUGUH

1.Jesu Christa thokitna jalin Pathen in phattheinakim napeh ding kakinem’e. Hichehi, Christa nungjuijouse dia  Ama Thokitna hi Pathen thahat channa ahi.

2.Cross chunga athi hin itobang mi ahi– chonset neilou Pathen Chapa ahi, chule, ‘Pathen Kelngoinou vannoi chonset pomangpa’ ahi chu aphondoh ahitai.

3.Jesu Christa’n cross chunga jona anei tobang hi koima dang in aneijouthei ding ahipoi. Kithoina chamkim ajotheina hi Pathen mihema hung peng ahijal ahi. Kithoina anei hi mijouse chonset thoina ahin, munjousea le phat jousea dia abol ahitai.

4.Jesu Christa thi chu kichehtah a ‘khatveiya thi’,’mijousedia khatveiya thi’( Once, For all) ahitai. Avela thi ngaitalou, khatveiya achai ahitai.

JESUN LHATNA KIN ACHAISA AHITAI, HINLA NAKISAN ANGAIYE

Chonset in mihem jouse hi khat cheh a hi ‘soh banga’ ahena, athua anunsah ahi. Jesu Christa hin, hiche chonset-soh a kona hi eilhatdohnau kin chu achaisa ahitai. Hinla, mimal tin hin eima ding cheh’a kisan ngaiya ahi.  Chule, hiche Jesu tohga chu santheina dia ‘achang thei dingdol chu hithei (lhin) ngaiya ahi’.

Vetsahnan, Solkal in natohna ding mun (post) chu akoitai. Adeh a tribal dinga koitum ahi. Hinla, achang dia lhing nahi ngaiya ahi. Tribal jouse chanthei ahipoi. Busom najoa, najona lekha dihtah nanei ding, tribal nahiding tribal hina hetpina napedingdol hon phatecha lekha asemu chu nanei ngaiya ahi, agamsungmi hi’na lekha naneiding ngaiya ahi. Chubana, hitobangmi tamtah lah a chu lhendoh nahiya, tohmun chu nachannadia themvetna khat ngai kit’a ahi. Hichu, jihthoa le kama kidohna ho ham dihtah a nadonbut thei ngai nalai. Aban kit a, napeding ho deichomthei mi, ama mel-het, party mi, insungmi, ahiloule, seiphat chang nahi ngai nalaiya ahi.

Kaden! Moh mumaimai thei ahipoi. Lhai kitet jong ngai maithei nalaiya ahi.

JESU KILAH MI HO ANUNNOM AHIUVE

Mary chu lhanpama adingin akap kap’e. Akapuma lhansung kuna agah vet leh,
 Jesu long ajam nauva alulama khat akeng lama khat ponbang sil cheh Vantil ni atou lhon agah mui.Amanin ajah a, “Numei, i-bol’a kap nahim?” ati lhon leh; aman ajah lhona, “Amahon ka-Pakai apomangun, hoiya akoiyu kahetapoi,” ati.
 Hichun aseiyin, agah kihei leh, Jesu adin amun Jesu ahilam ahepoi.
 Jesun ajah a, “Numei i-bol’a kap, nahim? Koi nahol ham?” atileh amanun honlei ngahpa chu ahisah-in, ajah a, “Pu, nangin napoh mang ahileh, ken kipoh tange, hoiya nalupsah ham neihil’in” ati.
 Jesun amanu jah a, “Mary!” atileh; amanu akihei loiyin Hebrew paova houhil tin nan, “Robboni !” ati.
 Jesun amanu jah a, “Neituh chah hih-in, ka-Pa henga kakaltou hih laiye; ahin kasopite henga chen lang ajah-uva, “Keima ka-Pa, nang ho Pa chule ka-Pathen, nang ho Pathen henga kakaltouve, tin aseiye gatin,” ati.
Magdala Mary chu achen seijuite henga chun, “Pakai chu kamutai,” atin chuleh thil dang amanu jah a aseiho jong chu agaseiye.(Joh 20:11-18)

Jesu nakoma kilangtam? Akilah tah-le, kipah in. Nahinkho apui jang ding ahi.
Akilah loulai-le, taovin, kouvin.

Jesu hi midang peson in

Pathen in mijouse hi kibang cheh’a angailut ahi. Vannoi pumpia mijouse angailut cheh’a, jeh in

 “koimacha amathah ding anompoi” (2 Peter 3:9).  ,

  “Mijouse huhhinga aumdiu le thutah ahetdiu” adei ahi (1 Timothy 2:4). 

Hijeh achu, Pathen ngailutna changsa hohin, achang loulai ho Huhhinga aumna diuva itaopeh diu” ngaiya ahi.(Romans 10:1). Chutichun,  “Ama seijui bangin kilang’ute” (John 15:8)

Pathen mi Huhhingna thu hohi miho simnom nom ding lama seiyin homjalleute. Chujongle, Pathen ahin mu’va, akisan theina diuvin taopeh jingute.

Hitia chu bolding nanop-le Pathen panpina thumin,

Taovu hite :  ”Pakai, nei huhhing nau jalin, na huhhingna thupha mijouse ding ahidol miho seipeh theiya neipanpi jalin kakipah e. Na lampi ho juithema, lhagao lama pilhing din neipanpin.Na Lenggam kehletna dia pan latheidin nei mangchan tina ka Pakai Jesu naminin kathume,, Amen.”

Hitia chu nataole, Pathen kom lhutnan ‘Amen’ jih in. Pathen in napanpi jing tahen.

Hinkho iman dan’uva hin Pathen ngailutna nei ihinau kilah sah’ute. Bible in eihilu chu  ”Atahsanlou miho lah ahin chingthei tah in umutin, phat gomkom hohi ajechan, aphacom din mangchau hite. Na houlimna ho chu lungset um le ngainom um hihen, chutile, mijouse santhei nahiding ahi.” (Colossians 4:5-6)

Christian khat hi’na a Pathen ngailutna thu hi  midang ho,adeh a  ingailut tah hou iseipeh diu ngaiya ahi. “atahsanlou ho lah a hi hinkho theng imandiu ahi. Chutile, thilpha ibolhou amudoh’uva Pathen athangvah thei diu ahi” (1 Peter 2:12). 

Pathen thu hi adingdol cha ihiltheina diuva Lhagao Theng kaihoina hi taonan thum jing’ute. Eima deideiya bol hilouva, Pathen deiya bol ihina diuva Lhagao Theng chu thum jing ding ahi. Chutile, “ mingol ho bang hilouva aching ho banga phat gomkom jouse hi iman them diu ahi”. (Ephesians 5:15-16).

TAO’UTE :  ”Pakai, nei huhhing nau jalin, na huhhingna thupha mijouse ding ahidol miho seipeh theiya neipanpi jalin kakipah e. Na lampi ho juithema, lhagao lama pilhing din neipanpin.Na Lenggam kehletna dia pan latheidin nei mangchan tina ka Pakai Jesu naminin kaathume,, Amen.”

Jesun Ichonsetnau Thipin Tonsot Hinna Eipetauve

Pathen in Mihem masapen, Adam themmo achanin, A-angsung (Eden honakonin adeldohtai.

Hinna-pepa, Pathen umlouna a um  chu ‘Thina’ ahitai. Adam le Eve, chule asonho, mihemte jouse hi Lhagaova thisa ihiuvin, hichun tahsa thina gei jong asodoh ahitai.

Eden pama um chu tua leiset ichennau hi ahi. Pathen umlouna muna hinkho hi hahsatna, gentheina, natna le thina ahijeh in, mihemten, alungdon tengle panpina ngaichan Pathen ahol’un, akap un, ataojiuve.

Pathen in asemsa mihemte kana le taona chu Ngailutna in asangin, apanpi diu le chonset-thahatna in abolgentheinauva kona huhdoh din Achapa Jesu Christa chu ahinsoltai.

Pathen hi kidihtah le asei thonngailou ahi.

 Pathen hi Atheng ahin, aboh-to umkhom theilou ahi.

Adam koma ‘nabollouding, nabolle nathi teitei ding ahi” anati chu Adamin anaboltai.

Pathen thupeh nitlou chu, Pathen dihna palkeh, athenglou ahitai. Hichu, Bible in ‘chonset’ ati ahi.

Adam le Eve bangin, mihem jouse hi Pathen thu nitlou, Pathen kidihna le thenna neilou kijet, ‘chonsetna’ nei cheh ihitaove.

Miphapena kihe jong chu alunggel a midang vetdana, thetna, khopna, thangsetna nei. Lunghang jingthei, mikhat house nom, samsenom, dengnom, le misetna thei seinom le bolnom ahithou thouvin ahi.

Hitia, setna umjouse hi Pathen thupeh nitlouna akona umdoh ahi.

Athupeh nitlou jeh a mihemte hi hingden lou dia Pathen in ana gonsa ahitah jehchun, tahsa thina jong aumdoh tai. Hinla, asemsa ahijeh in, mihemte hi angailu in, tonsotgeiya Amato ahinkhom kitna diu lampi asempeh tai.

Pathen chu Athenga ahijeh in, Amato chenkhom kitna dia ‘Thending’ ngaiya ahi. Thenna dinga chu ‘thupeh nitlouna, setna, chonset’ mihema um chu suhbei ngaiya ahi.

Mihem koima ‘adih le atheng tahtah aumpoi’. Asutheng dinga Pathen mama ngaiya ahitai. Hijehchun, Pathen Amatah in mihemte ahung suhtheng ngaiya ahitai.

Hijeh achu, Pathen in Achapa Jesu Christa chu vannoiya mihemte sutheng dinga ahisol ahi. Jesu chu, mihemte jouse ‘setna, chonset’ jouse hi sumang dinga Pathen in ahinsol ahi.

2.Jesu chu mihem in ahungpengtai. Aman ‘Pathen Lenggam’ thudol ahin seiphong letai. Hinla, Judaten, amaho le akivaipohna jouseu sumanga hung danin ageltaove. Amanun, Cross a khetbeh a thadin Rom solkal vaipo Pilate chu apedoh un, atha teidin angeh taove.

Bible’a John 19:16-34 sungthu seitaote :

Pilate in Jesu chu themmo achanin, thadingin Jerusalem khopan Golgotha muna chun sepaihon Cross chunga akhenbeh taove.

Thiljouse alhingsoh tai ti Jesu’n ahetphat in, Pathen Lekhabuthenga kisun ho abulhit sohna din, “Kadang achah’e” tin apengtai.

Sepaihon tuichopna pon chu lengpituiya kisem juthuh achun adekot un, mol saotah ahin atah un, thingpela um Jesu muh achun agah sutouvin ahi. Jesun, ‘juthuh’ chu asangin adon jou phat in, “Akichaitai” atin, alu akaikun alhagao alhatai (athitai).

Athikona Jesu Seijuite Athulhah

Athi Konin Anungjuite chu Pakai Jesu’n,

“Chate, phat chomcha bou kaumpi ding nahitauve, neihol diu, ahinla Juda ho jah a, ‘Kei che naa nang ho nahung thei lou diu,’ kati banga, tupet tah ajong kaseipeh nahiuve.

“Nang ho (vang) khat le khat naki-ngailutto chehna diuva Keiman nang ho kangailut nahiuve. Naki-ngailutto cheh-u leh kaseijui nahiu mi jousen ahet ding ahi,” ati.

“Nang ho (vang) lungkham hih-un, Pathen tahsanun, Keijong neitahsanun.Ka-Pa in’a chena mun tampi a-ong’e, umlou hileh seipeh pouvinge.Nang ho ding mun kagon jouteng hung kit ing ting Keima umna a naum thei diuva Kahenga dinga Kahung pui ding nahiuve. ( Joh 13:33-35 & 14:1-3 kilachom)

Jesu’n, ‘Nangho vang’ atiho hi aseijui som le khat hochu ati ahi. Chule, Ama le aseijuite hinseiya kona tahsan jouse. Abana kisei hintahsante jouse jong aseina ahi.

Nangla ‘Nangho vang’ atiho lah a napan tah em? Ahungkit-nile apuiho lah a napan ding hinam?

Napantah-le, Christa nungjui huhhingna chang, Pathen cha nahitai.

Pathen chate, Christa nungjuite chu kingailutto ding, hahsatna a kipanpito ding. Tahsanna a lhasam panpi jing. Akipal aum jongle kaithou ding, taopeh ding; lampi dih hila puihoi ding ahi.

Tahsa mihem mitmu theiyin, um tahih jongle, lhagaovin eiumpi jing taove. Jesu chemang le aumthim chu nithum bou ahi. Nithumnin, athoukit tai. Chule, Pentecost nia pat in, atahsante jouse Lhagao Theng in eiumpi jing taove.

“Nang ho (vang)” ati, aseijui kicheh, huhhingna chang, nahi-le-nahilou nakicheh loulaile, tuhin taovin, Jesu kouvin. Napanpia, aseijui nahisah din ngeh in.

Jesun Koi chu Ipi ahi ahei

Jesu alung agim behseh-tan, “Atahbeh kaseipeh nahiuve, nalah-uva mikhat eipehdoh a pang ding ahi,” ati.( Joh 13:21)

Jesu matsah a panga chu amelma holah akon ahipoi. Nitina akivoppi, agol, aseijuilah a khat Judas Iscariot ahi.

Nitin hinkhoa hi eikipalsah’uva hi i-gol ahinome. Chingtheiyin, tao jingin.

Nang jong Jesu Christa johdoh’a le minsetsah a, Alenggam machal ding sumoa pang jingthei nahi. Chingtheiyin.

Nitinin Bible sim jingin. Tao jing jengin. Nadinmun, nalunggel le nangaichat jouse, taonan Pathen kom lhut in.

JESU THOHNA IDAMNAU:

“Aman eiho thohding jouse athoh in, igimnadiu chengse apo jenge! Hichea jong hin athohna jouse hi Pathenin talen apeh danin igel tauve.  Ama chula eiho chonset jal’a mapu ahin, thilse iboljeh’uva min aden  ahibouve! Ama talen don eiho’n idamlo’vin, min ajepna chengse’n eidamsah tauve.  Kelngoi vahmangte banga ideilam cheh a che’ah ihitauve! Ahin eiho tale’n donding Pakaiyin Ama adonsah in, I-thohdiu talen Ama’n athohtai.(Isaiah 53: 4-6) 

Nangla nadampi tah em?

Nadampi loulaile, tuhin taovin, tahsa le lhagaova damnakim napeh din Jesu kouvin, Aman tonsot-hinna napeh ding ahi.

JESU SILLOU HOCHUN PATHEN LENGGAMA MUN ANEIPOI

Jesun ijakai Pan akhut’a apehdoh a, Pa-henga kilekit ding ahi ahen; ankonga konin akipatdoh-in, aponsil ahoh lhan tinot ponin kong akigahtai. kisilna konga tui alheiyin, seijuite keng asilpeh-in, pon chun atheh pantai.

Peter in, “Pakai, nangin kakeng neisilpeh ding ong?” atileh;

Jesun, “Tupet tah-in kabol hi ipi ahi nahepoi, ajo teng henan nate,” ati.

Peterin, “Nangin a-itih a jong kakeng nasil louhel ding ahi,” ati.

Jesun, “Nang kasil loule Keiya nangin chan naneipoi,” atipeh-e.

Hichun Peterin, “Pakai, kakeng te ni keo hilouvin kakhut te ni le kalu jong ahe,” ati. (Joh 13:3-9)

‘Pakai Jesu chun, koihile Ama thisana kisillou chu Pathen Lenggama mun aneipoi’ ti aseina le avetsah ahitai.

O, Peter, Peter, nasei hoi valjenge!

Good Friday’ :

  Christian tamtah in hiche Friday nikhoa chu Jesu khetbeh a um ahin, ipidia ‘Good’ kiti ding ham atiuve. Adih’e.Judate le Romansten Jesu abolnau chu ‘aphamo’ lheh jengin, ‘Apha’ tijat ahipoi(Matthew 26-27). Hinla, Christa thina-ga chu, eiho dia ‘Aphapen’ ahitai! ‘Jesu thi’ chu eiho dia ‘hinna’ ahitai. Christa ‘thi’ hih-le eihon ‘Pathen hinna’ ichanloudiu ahi.

Solchah Paul in, “Hinla, Pathen in eingailutnau photchetna hitihin eivetsah taove : Chonse ihilai tah’un, eiho din Christa ahung thitai.”(Romans 5:8)

Solchah Peter in aseiye, “Chonset jouse (suhthengna) dia khatveiya Christa thi ahitai. Hichu, athemmo dia themchanna ahitan, Pathen koma napuilut’uva pang ahitai. Ama chu tahsa’a tha ahitan, hinla, Lhagaova hing ahitai.” (1Peter 3:18)

NGAILUTNA HAPTA MANGIN

Lungdonna Hapta hi English in Passion Week akiti. ‘Passion’ kiti hi Dictionary ivet-le ‘fervor, ardor ,obsession, infatuation, excitement, enthusiasm, zeal, craze’ ahi.

Hichu, ‘lungdonna’ hilouva ‘ngolpi’ tia kaseiji hi hijole kakilomsah in ahi. Nungah, Car, Inhoi, thilpha hamkhat deivala ‘Ngolpi’, ipi hamkhat gut le thanoppi vala ‘ngolpi’ leu tina lam joh hinte kati.

Hiche phat sung thu hi Matthew 21-27; Mark 11-15; Luke 19-23; John 12-19 hoa hin akimun ahi.

I-Pakaiyu Jesu Christa hin, ei ngailut val jenguva, hahsatna, voh le den, jachat le jum, thinagei jong ija seplouva, chonset jeh a thia mahthah dinga ium diu hi nomlouva, Amakom ijottheina diu ahipoule tia hung kipe jenga ahi.

O, a ngailutna hi anasa behseh jengin ahi. Ahethem hodia, Peter banga abungbua kikhai jong ipi ngaplel aumpoi.

Ajehchu, Ama a ‘huhhingna, hinna, nunnopna’ chan hi tu hinkhoa jong nopna, kipana ahin, tahsa thinunga jong tonsot a Pathen-to chen khomna ding ahi.

Eingailut behseh jeh’un, Hiche eihon ‘Lungdonna hapta’ (Ngolleuva eingailutnai avetsah sung) hin, thilsoh, seidoh le boldoh tampi aneiyin ahi. Hiche sunga hin, eingailutnau avetsah dan hi kidanga ahi. Hiche jeh ahi, Houbung lamkai masahon ‘Passion Week’ atiu ahi.

Hijeh achu, Ama bangin Jesu Christa hi ingailutnau, ngolpi leuvin vetsah’ute.

Ahoi hoiya, naljet a kisema, naltah a hinkho manna hi athengin aphai. Hinla, nungah kihoisah tah jong, athenglou kidah jingnu jong chun, nao ahinneitah tengle, anih akan singa, kidah donlouva, anao eh ho asop jeng ahi. Hichu, ngailut ahi.

Hiche banga chu, I-Pakaiyu hin, van a loupina le lalna jouse dalhah’a, leiset mihem, kidah umtah, natna le thina tohthei mihem tahsa ahung kivonna; voh le den, totnopna, daichatvaina, cross a thinagei ahungthoh ahitai. Hitobanga, eiho ei ngailutnau chu leiset mihem geldia ‘Ngol kaitah’ ahi.

I-Pakaiyu Jesu hin, mihon ‘Mingol’ atidiu ije atipoi. Nang le kei eingailut jeh’uva, hiche ho jouse chu ija seplouva, ahungthoh ahi.

Ven, Na Lengpa Ahunge

Jesu Lenga Jerusalem alut thu

Jesu Jerusalem agalut chun, Juda mite le aseijuite geiyin jong, Rome solkal vaipohna noiya aumnauva kona jalenna apeh’uva, Israelte dia David banga leiset a lenggam atundoh ding anasauve.

Mipi kipah in, achena lampia chun akigolun, apon hou aphauvin; konkhat in theoboh (Lusudo -Palm Leaf) kichoiyin, kipah in asamun

“Pakai min a hungpa hi anunnom’e!

David Chapan huhhing hen!” (Matthew 21:9) atiuve.

Amahon, leiset lenggam tundoh dia anagel vangun, Pathen thutep bulhinsah a, Pathen thu aseiyu ahilam akihetpouve.

Leiset a leng ho itih a sahem hatlouloi le ganglouloi Sangan a atouvuva gal asat’u amukhah’u vem? Nanginla, nahet khah em?

I-Pakaiyu Jesu chu leiset lenggam tungdoh dia hunga ahipoi. Alenggam tundoh chu, ‘Pathen Lenggam’, mihem sunga Pathen vaihopna mun, Pathen thu nitna lungsung semtoh a hunga ahijoi.

Hijehchun, koima toungailouna Sangan chunga ahung touve. Hichun, Pathen vaihopna, Jesu Christa vaihopna lungsung le hinna neina dia ‘kineosahna’ angaidan avetsah ahi.

Mipihon, ahetlouvu abolu “Pakai mina hungpa” atiu chu atahbeh aseidoh’u ahi. Jesu chu Pathen mina hung, Pathen hinsol ahi aphondoh’u ahitai. Chule, Pakai mina hungpa le tu le khonunga Pakai mina kalsong jouse jong “Anunnom ahi” nau chu aphondoh’u ahitai.

Jesu chena ding lampia “Pon”ana phau chun avetsah chu ahile, Jesu chenna ding mihem chun, alungsung von,pon,amije chu apailhah ding, kingaitom ding, nunnem ding, kingainema lungkot ahon ding” angaidan avetsah ahitai.

‘Lusudo (Tumdo)’ (Palm do) chu hichelai khanga chu ‘jona, galjona melchihna (Victory Symbol, banner,flag) a kimang ahi.

Hijehchun, nang jong, Pathen lam sangin, nanunchan (navon) chu pailhan, kingaitomin, Jesu chu hin jonin.

Taonan Jesu kouvin, na lungsunga vaihoma na Lengpa, na Huhhingpu le na Pakai hung hidin kouvin. Chutile, Aman nanga um chonset thaneina jouse chu najopeh ding. Pathen cha nasoa, chonset gal najopeh ding. Galjona nachansah ding ahi.

Jesu chu nalungsunga aluttengle, navonlui, nanunlui phalou jouse chu nakheldoh peh a, nunchan pha athah (vonthah) chu napeh ding ahitai. Goljoupa, galjounu nahisah ding ahi. Chutengle, kipanakim, nunnopna chu nachan ding ahitai.

Tunin, Jesu nakoma ahung e. Na Lengpa hidin kisanin.

HINNA NANEI NADIN JESU KOUVIN

Pathen in vannoi angailut behseh jeh in Achapa changkhat chu ahinpetai. Koihile Ama tahsan chan chu mangthah louva Tonsot-Hinna anei johding ahi.” (John 3:16)

‘Vannoi’ hi ‘mijouse’ tina ahin, ‘Achapa’ hi ‘Jesu Christa’ tina ahi. ‘Hinna’ hi ‘Pathen hinna’, mihemin aneile Pathen-to tua le tonsot a hingkhomding ahi.

Nangla ‘Hinna’ chu nanei mong mong hitam?

Ole, lhagao dihlou ho, nunchan phalou ho, du le ngaithei dihlou ho suhboi theibep nahi jeng nahlai em?

Kaneova pat in ‘huhhingna’ ‘hinna’ changsa kigel kana hitai. Hinla, kahung hitheidoma, kalhatna ahung tamdom phat in, miho bola nom le thanop um ho chu asea gelna chu ahunglhasam cheh cheh in, masanga ‘phamo kasha ho chu, kana hetthemlou jeh a “aphamoa kakoi bou ahi” tia gelna kaneiyin, pha kahinsan ahile, ken jong ‘ahitheidom ho bol chu’ kahinboltai. Kahetlou kah in, kana chegil lheh jengtai.

Pakaiyin eingailutna thu eihetsah kit in, thina phaicham-lim jot kahi chu eimudoh sah in ahile ‘thina kokhuh achu ka ngonggeiya lhum kana hitai’.

Pakai Jesu kakouvin, Aman ngailutna chungnungin eisangin, ei huhhing tai.

“Jesu’ kiti hi ‘Huhhingpu’ (Matthew 1:21) ahi tia kisei hi kahinkho in kamuchenin, kahechen mong mong jengtai.

Jesu’n “Ka minin taovun” ati. Chule, aseijuite koma aum pet chun, Ama ahin aseijuite jong Pathen komin bou ataovui. Pathen koma atao sungseuvin Lhagao Theng anei pouve. Hijeh chun, seijuiten Hatna aneipouve. Hiche Hatna (Lhagaova hatna) chu Lhagao Theng achan tengule anei diu ahi (Acts 1:8)

Chule, Lhagao Theng chu Jesu thijouva pat a bou aneitheidiu ahi. Hijeh achu, “Keima kache ding hi(athiding) hi nang ho dia phatchomna ahi; kacheloule  Mi-KITHOPIpa chu nakomuva hunglou ding ahi. Keima kache vangle, Ama chu nahenguva Kahin sol ding ahi” ati (John 16:7)

Pakai Jesu’n, “Tuni geiyin Kaminin natao hih laiyuve. Thumun (kaminin), nachan diu ahi, chutile nakipanau lhingset ding ahi” ati (John 16:24)

Tujong hin Jesu minin taovin, thumin. Ama kouvin, napanpi din ngeh in.

JESU THOHNA IDAMNAU

“Aman eiho thohding jouse athoh in, igimnadiu chengse apo jenge! Hichea jong hin athohna jouse hi Pathenin talen apeh danin igel tauve. 

Ama chula eiho chonset jal’a mapu ahin, thilse iboljeh’uva min aden  ahibouve! Ama talen don eiho’n idamlo’vin, min ajepna chengse’n eidamsah tauve.

Kelngoi vahmangte banga ideilam cheh a che’ah ihitauve! Ahin eiho tale’n donding Pakaiyin Ama adonsah in, I-thohdiu talen Ama’n athohtai.(Isaiah 53: 4-6)  

SUM CHENA LHOMNA DIN TAOVIN

(Kathuguh 12na)

Pathen koma hi angolngola ka umle nom kasai. Ka Pa koma ipidia kakichihsah ding ham, chapangngolbanga kaumlebou nom kasai. Kataona ho jong hi chapangngol lheh lheh kahiji. Hinla, hitia kauma pat in, Pathen panpina  kachang tamoi.

Mhoi summuna dinga bou  atao kahen, sum chena (manna)  lhomna dia taova kahekhapoi.

Kei jong masangin sum hihen thildang hijongle amuna ding, eipehna din bou kana taoji.

Hinla, ka Pakai Jesu’n eikimupi nia pat in, kataodan jong tampi akikheltai.

Sum le adang muna din kataoji. Chule, sum manna ding jong eisuh lhompeh din kataojitai.

Masang chun, sum jong kamuna atame. Tampi vang kamujilou vangin, muna lampi atam thouve, kei ding bep bep in. Hinla, kamu jatjat koihe ummanlouvin, kamangchaichai jengji. Keima kijenna, insungmi le heng lekom damlou jenna le akhoh le akhohlou, chavaitahtah le manmoa kimang jong atame.

Tuhin, kamuna alhomtai. Hinla, holthu le hahsatna val kaneitapoi. Nitina nehkhop dingbep chu aboitapoi.

Aman boldanpha eihilbangin, Summanna eisuhlhompeh dia kataoji. Ka taona Pakaiyin asangin, kamulhom vangin, amanna ding jong alhomin, aboitapoi.

Sumsanlou kumkhat lhingdeh jen ahipet injong kaboipouve. Konkhat in hao hih jongle ahitheiloi hidin eigelui.

“Ima kaneipoi. Jesu kaneinai” katiji.

Keibanga genthei nahile, sum le adang ho muna din taovin. Chule, summanna lhomna din jong taovin.

Ahideh in, kei boldan nadeile, Jesu’n Lhagao Thenga na umpi jing nadin, taojing jengin.

NA HINNA DIN JESU KOM JONIN

Bible thu thep aphai, Pathen thu seina din. Hinla, iti het in he’in, them jong lechun, Jesu kom najot loule, athu het in hinna napetheipoi. I Pakaiyu Jesu Christa’n aseiye :

“Pathen lekhabu hoa chu tonsot hinna neithei din nagel’un nasim jiuvin, hiche ho chun Kei thudol ahettohsah-u ahibouve.Nahinna diuvin kakoma nahung nompouve.” (John 5:39-40)

Jesu kom bel in, taonan kouvin, “Pakai, nang katahsan’e. Ka Huhhingpu le ka Pakai nahi. Ka chonset jouse neingaidamin, tonsot hinna chu neipen” tin taovin.

NUN-NOP-NA

“Lhagaova chimtih neilouho anun-nom’ui, Van’a Lenggam chu amaho-a ahi! ((Matthew 5:3),

( “Lhagaova lengvai - genthei ho anun-nom’ui, Van’a Lenggam chu amaho-a ahi!”);

Lung lengvai-ho anun-nom’ui, Pathen’in alhamon diu ahi! (Matthew 5:4),

Mi-lungneng ho anun-nom’ui, amahon leiset alodiu ahi! (Matthew 5:5),

Pathen dei hol-na gilkel-dangchah thoh ho anun-nom’ui, Pathen deiya lung nachimdiu ahi. (Matthew 5:6),

Mi-hebol ho anun-nom’ui, Pathen-in amaho ahebol ding ahi. (Matthew 5:7),

Mi-lungtheng ho anun-nom’ui, ama hon Pathen amudiu ahi. (Matthew 5:8),

Mi-sucham ho anun-nom’ui, Pathen chate kiti diu ahi, (Matthew 5:9),

PATHEN LENGGAM MITE

Pathen Lenggam thu ihasei lheh jengtauve. Ahile, nangla, Pathen Lenggam-mi, citizen lhingset nahi nah em? Tu-leiset a nalenlaiya hi hiche Pathen Lenggam-mi chu nahiya, agamsunga nachenpat loulaiya, hiche Lenggam sunga chu NUNNOPNA,HINNOPNA naneitheilou laile, thinunga bou man din kinemval hih in.

 Mihem muding le mihem gelin haovin, chingin, them hih jong lechun Jesuahinna ((John 1:12) ; John 3:5), chu naneile koiman nalahpeh theilou, NUNNOPNA,HINNOPNA chu naneiya (Luke 17:20-21) kipah jing ding nahi. Nabol le nachan jouse Pakaiyin nangdia apha lampen ahi nahetsah a lungmong tah a na umding, imachan nalahpeh theilou – Hemto chemjam; tulaiya dia choibaipena milhamin manchah hoi ahetpen jong AK 47, natna,thina le lhankhuh jengin jong nakhen jou lou ding kipana nanei (Longlougam a um) jing nahiding ahi. Hiche, Lenggama NUNNOPNA,HINNOPNA  lhingset chu leiset pon in kiphetlhah joutengle (Thinungteng) Christa-to tonsot adia Vanthah le Leithah achu bulhingset a namankhom diu ahi.

Ka chunga Pathen Thu Guilhun Kidang

Pathen loupina din, kachunga Pathen thu guilhunna khat seiyinge.

Pathen thun asei,“Amasan Alenggam le achonphatna hol masan, chuteng adang jouse nakipehbe dingu ahinai” (Matthews 6:33,)

Atihi kachunga aguilhun kidang kamui.

Kum tampi kisahlelnan kadimin, ichanham tohdoh aumnai. Hinla, Pakai Jesu kamunia pat a eipuidan hi kidang kasai. Katohna lam jousea eipanpina kamui.

Masanga iti kaboipi vanga Newspaper Daily bolna dia RNI, New Delhi a kathum jing chu ahahsai. English tailou, paodanga hi amu abaiye. English ajong Kum, Lha le hapta hoa kiso hi amu abaidomin, 2004 in Weekly in kamunai. Hinla, English paova ‘Daily’ muhi ahahsai. Pata, Electoral Certificate le adang tampi ngai ahin. Chule, DM level a kholchilna le Certify bol ngaiya, Affidavit avelvela bol ngai, seiphatna lekha le adang tampi ngaiya ahi.

2010 kumbulin Pakaiyin kahinkho akhelin, nitinin eipuiyin, 2011-12 apat in Daily din ka thum kit in; communication kitup lou, tubanga Internet phaloulai ahin 2013 August in Verified ahin, October lamin kamun. January 2014 in DM level in ADC in spot verification ahung bolin, certified eibol peh un, Regd. Lhingset ahin, hapta masah in website in kamutai. Tunin, Certificate Paper chu Regd. Post a eihin thot’u chu kamutai. Hitichan chu, imatih in RNI in Regd. Post in koima lekha athot ngaipoi. Keima Regd. Post a eihin thot’u hi kidanga ahi.

Chunga kisei hi NIV English a iledoh-le “Amasan Pathen Lenggam le Ama (Pathen) kidih-lhinsetna chu hol masauvin, chutengle, adang jouse jong hi kipe ding nahiuve” (Matthews 6:33,)

Hichea, ‘Patheng Lenggam” atihi “Pathen in Achapa Jesu Christa kisana Huhhingna chan hi aseina ahi.

Kaneova pat in ana kimu leng, thil tampi eina boldohsah tante ti katahsan e. Tu jenga jong midang- jatdang ho geiya kipapina changtheiya le gambung neocha khat hijongle miho lah a hetdoh theiya eikoipa Pa Pathen, Chapa Pathen le Lhagao Theng Pathen chu kathangvah in ahi.

Nang jong, tuhin, ‘Pathen Lenggam’ chu holing, napeh ding ahi.

“Amasan Pathen Lenggam mumasan” atipoi. Ajeh chu, nang le kei kimuthei ahipoi. Pathen in ‘aholte’ chu manbeiya, lungset le khotona jala apehji bou ahi.

‘Holding’ chu mihemte kin ahi. Apea chu Pathen ahi.

Pathen Lenggam Mi

Pathen hi :-

1) LEI le VAN le asunga thil kisem jouse SEMPA ahi (Genesis 1:1-27)

2)“NGAILUT ahi”  (1 John 4:8),  

3) “VAH ahi”  (1 John 1:5), 

4) “LHAGAO ahi” (John 4:24), 

5) THILJOUSE HESOHPA  ahi (Psalm 147:5),

6) THANNEICHUNGNUNGPEN ahi (Revelation 19:6),

7) MUNJOUSEA UM ahi (Psalm 139:1-10).

Achomlama seidin, Pathen hi mutheilou; LhagaoIn ; Tonsot mi; Tonsot apat umjingsa; apatna le ajona bei ahi. Lei le Van, thiljouse chunga thuneina nei, thahat chungnung, thunei chungnungpen ahi. Achungchungnungpen le thiljouse hesoh ahi.

Hitia, akiseile van le leiset pumpi hi Pathen vaihopna mun le gam ahijenga. Hinla, Bible in aseinompen chu ‘Pathen lunglhaina mite le achennau mun chu PATHEN LENGGAM ahi.’

Nangla, PATHEN LENGGAM mi nahi nah em? Nalungsunga, nahinkhoa Pathen in vai ahop nah em? Pathen thua na chonnah em? Nangma deideiya chonlouva Pathen deiya nachon nah em?

Nachon theiloulai-le, chonset joupa Jesu Christa chu kouvin. Taovin, na huhhing ding le napanpi din kouvin. Nalungsunga chenga, vai homdin ngeh in.

MIJOUSE HUHHINGNA NGAICHA IHIUVE

1.      Bible’a kisun thuhohi Pathen in asei, ageldan, ahi-sah thu ho ahi.

Bible in “Mijouse chonse-a Pathen loupina changlel ahitauve” (Romans 3:23) ati.

Nangin “kachonsepoi” natile ‘mi’ (Mihem) nahilou hinte. Ahiloule, Pathen thusei hin nang nahoptha lou hinte.

Pathen h thiljouse sempa, nang le kei jong eisempau ahi. Natahsa, nahinna, na hinkho, nahinding, nadamding, nathi ding, navom ding nakanding, aboncha Pathen thu thu ahi.

Pathen in mijouse hi achonse-a akoiya, Ama loupina chu achansah tahlou, apehsa alahpeh ahitai.

2.      ‘Pathen loupina’ ati hi ipi ham?

‘Pathen loupina’ chu ‘Hingjing, thitheilou, kikhel ngailou, abang hijingjeng’ hi ahi.

Pathen in mihem asema chu, Ama banga ‘tonsot hinna’ apeh ahi. Hichu, mihem nah homa alhalut ‘hu’ chu ahi. Hinla, mihem in athupeh nit-louva satan thua anun phat a Pathen in, Aloupina chu alahpeh ahitai. Hijeh achu, natna, hahsatna, gentheina, thina gei umdoh kha ahitai.

Mitamtah in, ‘chonse’ ahilam akihetpoi. Adeh in, aneova pat a mipha, ima suselou hohin, “Ipi chonset kabol em? Ipi kachonset kaphon ding, ngaidam kathum ding ham?” tin agelji.