PATHEN CHA NA HITHEINA DI

Kipahtah le lunglhaisela hinkho namanding Pathen in adeiyin, phatthei naboh nomjinge.Hinla,Adeibang le nangaichat bangin phatthei nabohtheijipoi! Asumoa aumji’e.
Mjousen Pathen phattheibohna chan ding anom cheh in, hol jong aholji. Hinla, deibangin koiman amujipoi! Mitamtah vang, aholna lam’in, asumopau chu kisu-lunglhaile kichanginte tin, pathen bang in ahouvun ahile, Pathen dihtah chu akisuh lunghangun, atuppen’u chu, gamla-tah in adalhaloji tauve.
Misumopa chun, Pathen phatthei-bohna lhingset  nachan ding chu avetlel’a nasuhmoji ahi!
Ahile, misumojia chu ipi ahidem? Ipidia mi chu asuhmoji ham?
Ama chu changjoulou ahijeh a, miho chanding chu thangsea, asuhmo gotji ahi! Ama itih a jong Pathen phattheibohna changlouding ahitan, eiho vang chang thei ihiuve.

Satan Thaneina Sumanga Jesu Hunga Ahi

‘Jesu’ kiti hi ‘Huhhingpu’ tina ahi. (Matthew 1:22)

Ipi a huhhing ding ham? Mihemte.

Hoiya kona ahudoh ding ham?

Satan bolgimna akona huhdoh a, tonsot geiya Pathen-to chengkhom dia ajopmat ding ahi. Edena kikhensa Pathen le Mihem kijopmatna chu Jesu’n ajopmat ahi.

Pathen hi ‘thitheilou, tonsot a hingjing ahi. Pathen-to kijopmatna chu ‘tonsot hinna’ neina ahi.

Pathen hi Lhagao ahi. Chule, Hinna bulpi ahi.

Pathen-to kikhen chu ‘Hinna’-to kikhen ahin, hichu, ‘thina’ ahi. Kijopmat kit chu ‘hinkitna’.ahi. Chule, ‘Lhagaova Penkitna (Penthahna) ahi.

(Pathen in pha asah-le, Limpuma, Bible chang hoto vetsahna, olle abua sodoh dia kigong ahi.)

Jesu chu apengtan, athi in, athou kittai. Mihem simjoulouvin, Jesu Christa akonin Pathen a ‘Tonsot hinna’ chu amutauve.

Nangla, nachantah em?

Ole, na chunga Satan in vai ahop nahlai em? Phat nanop vanga phatna hinkho namansahda jing nahlai em? Nunchan phalou nadeimo vanga, nahetlou kah a phatmona nanunna hung kilangji nalai am? Achutile, nangma hilouva, nachunga vaihompa, Satan chun, athua nanunsah nahlai ahi! Jesu Christa’n chonset (satan) gal ajona chu nachanloulai ahi! (Romans 7:14-20)

Nachan loulai-le, nachan nom em?

LHAGAO KISANIN

Jesu’n aseiye “ Hinla, amasa’n Pathen Lenggam le Achonphatna hol masauvin, chutengle hicheho jouse hi kipebe ding nahiuve” ati. (Matthew 6:33)}
“Amasan, Lhagaova Huhhingna hi kisan masah un, chutile, adang jouse hi nachanthei diu ahi” tina ahi. Jesu Christa ‘huhhingna’ hi naneiloule ‘Christian jong hilou nahi. Huhhing nahi tengle Pathen in Lhagao Theng napeh a, hiche Lhagao Theng panpina jala chu Pathen phatthei bohna ho nachan thei ding bou ahi’. Hiche hi, Jesu Christa le aseijuite, solchah dang jouse thupipen, Christiante dia ngaimasapen ahi.
‘Huhhingna’ chu nachantah-le achangloulaiho seipeh in, kaihoiyin. Them hihjonglechun, nathei sunsinin seipeh in, Pathen in phatthei naboh ding ahi.Nachanloulaile, tuhin taonan Jesu kouvin ;taovin, Lhagao Theng hi napeh a, thildang nangaichat jouse jong napeh ding ahi.

Pathen hi dat neilou ahi

:

Mijouse angailut ahin, mijouse kibang cheh a athu atan ding ahi. Koima deichomtum le vetda tum aneipoi. Mi ama ama chondan dungjui cheh a thu atanpeh ahi.

“Ijeh-inem itile Pathenin mi dat aneipoi,”( Rom 2:11)

“Danthu neilouva chonsete chu dan beiya mangthah diu, Danthu neiya chonsete jong Dan-thua athuu kitan ding ahi; ajeh chu Pathen ang’a midih a kisima chu Danthu jah tho ho ahipouvin, Danthu dungjuiya chonho joh chu them chang ding ahiuve, Chidang namdangten Danthu aneilou vang un, amaho le amaho danthu bang-in akigel’un, mihing ahinauva danthun asei bangin achonjiuve.
Aum chan’u hin alungthim sung-uva Danthu akisutdol avetsah-in, ahet thei nauvin jong phot chetna aneiye, ajeh chu alung gel’uva them chansah le themmo chansah aum sah theiyui.
Kathupha seiphong dungjuiyin Pathenin Jesu Christa jal’a mihemte lungthim guh jouse thu atan nikho le kichen ding ahi. “ (Rome 2:12-16)

Lung Lengvai ho Nunnopna

“Lung lengvai ho anun nom’ui, Pathenin alhamon diu ahi!” (Matthew 5:4)

‘Lung lengvai’ kiti hi ‘lungngapna ding, kinepna ding, lhamonna ding neitalou’ tina ahi.

Hichea, Pakai Jesu’n asei hi – Mihem khat in, chonse ahija, chonset a athiding kihet a, kingapna ding him him neitalou. Leiset chihna, thepna, haona, hoina, loupina le thahatna him himin imacha alotheilou ki het a, lung lengvaiya, kisih a, kap a Pakai kouva, akoma taova bel ho aseina ahi. Hitobang miho chu Pakaiyin apanpin, alhamonin, phatthei abohji.

Nang jong, leiset thil ho le nangma hatnan na tahsa damna, hatna le kipana tahtah ding, chule, na lhagao ding imacha aboltheilou ahi kihet in, lung lengvaiyin, Pakai bel jing jengin.

NGAILUT KIDANG

KA LHINLEL HENASA NEI NGAILUT KAKIPAH E

“Kalhinlel, hatlou, dihlou, phatlou, chonse kahi nahet nasasa a nei-ngailut teitei jeng ahi kahetnia pat in kipanan kadimtai!” tihi Pathen koma kataona ahi.

Pathen in, “Michonse, thidia lom nahi chu kahai nahisah ham. Bible sunga aboncha kasei namu chula em. Hinla, ka ngailut jeh a, michavai nahi kahet sasa nahinna dinga kakom nahin belna ding kagonpeh nahi” tia asei kahetnia pat in Bible hi kasimnom nom jengtai.

Adeh in, kachonset, mihemte chonset nunchan aseina, hatmo, themmo ihina hou thu hi ngei kasan, kasimnom nom jengtai.

Pathen in eihetchil dandan’u hi akidange. Kidah um, thet um, paimang jeng ding, thadoh jeng dia lom ihinau hi kamujitengle Pathen in eingailutnau kamu chen cheh cheh jin, Achunga kakipana hi asang cheh cheh jengji.

Masang chun, “mijouse chonse ahitai, michonse nahi” tia Bible’a kijih hohi kamuteng kasimnomji tapoi. “Eiphona, ei oimona thu ipidi katipoi” katijin, kasimnom jipoi.

Pathen thu kahetchetnia pat in kasimnom nom jengtai. Sei jong kaseinom nom jengtai.

Pathen in eiboltahtah chun kathemmona jouse kamutai. Hitobang miphalou kahilam kakihet himhim poi. Kei chula them kichanchan jeng kana hi. Ajehchu, Pathen thu kana hetlou jeh ahijoi. Kahetchet nin kipanan kadimtai.

Kadinga pha jong kihetlou kana hi ahi. Apha kati tampi chu kadinga phalou anahi. Dih kanasah tampi chu Pathen gela dilou ahimai ahipoi; keidia jong dihlou anahi. Achutiloule chutilou ding kanahi.

Kadinga pha ana kihet leng, eingailupen, kadinga pha eibolpeh nomjingpa, eisempa Pathen kana belding anahi!

Kana bellou chu ‘Mingolpa’ kahi chu kamu chen mong mong tai.

Jesu Christa huhhingna channa dia bol masahpen ding chu ‘Chonse kahi’ tia kihet ding ahi. Ahiloule, “ ‘chonset’ hi keiya uma ahi” ti kihet ding, chule, ‘chonset tha-hatna  hin ‘ei chonset sah jingthei ahi’ “ ti kihetchet ding ahi.

Abana, ‘chonset tha-hatna’ hi mihem in ajotheilou, eima chonset koiman akisuhthengtheilou ahi tijong kihet ding. Chonset suthengthei, chonset thahatna jouva chu Pathen tha-hatna bou ahi ti het ding. Mihemte chonsetna suthenga le chonset thahatna jouva chu Jesu Christa bou ahi. Hijeh achu, Jesu Christa hi kisan ding, eima chunga vaihom ding, thunei dinga kouva, hisah ding ngaiya ahi.

Jesu Christa chu, mutheilou Lhagaova eiho sunga achentengle bou eiho ‘chonset’ chu eisuhthengpeh’uva, abana ‘chonset’ in ei thununna diu tha hatna jong eijopeh jiu ahi.

Kahet nia, Jesu kakoule, eisanna, kipana seijoulou eipeh nia pat a, iti seileng midangin jong hiche kipana hi aneidem ti gel in kaseinom nomjengtai.

TAHSAN JALA THEMCHANG

CHONPHAT VANGA HUHHINGA KOIMA AUMLOU JEH A 

“Jesu chu eiho suhkhel jeh a thidia apehdoh-u ahin, them ichanna diuva Pathenin akaithou ahi.” (Rome 4:25)

DANTHU LE TOHPHAT VANGA HUHHINGA KOIMA AUMLOU AHI

Tahsan jal’a them chang ihi-phat’un i-Pakaiyu Jesu Christa vanga Pathen to kicham ihitauvin,Ama jal’a idin nau lungsetnaa hi lut theiya, kipah thanom’a Pathen loupina chang dia kinem jing ihiuve.Chuti jengseh hilouvin hesoh gentheinaa jong ikipah thanom’ui; ijeh-inem itile eihon iheuve, genthei hesoh nan thoh hat asosah-in,thoh-hat chun chonphat asemdoh-in chonphat nan kinepna asodohjie;hiche kinepna hin eijumso pouve, ajeh chu eipeh-u Lhagao Theng jal’a Pathen mingailutna chu ilung sunguva long lut ahitan, ihatmo laitah-un aphat chan Christa chu Pathen hephaloute din athitai.
Midih khel din khattou thi ngam jeng jongle, mipha khel’a thi ding jong thil hahsa ahi;
Rom 5:8 hichea hin Pathenin eingailut nau photchenna eimusah-un, chonse ihi laitah-uvin Christa eiho khel din athitai! Tua Ama thisan jal’a them chang ihitauvin, achung chon’a Ama vanga Pathen lunghannaa kona huhhinga iumtei diu ahiye. Ijeh-inem itile adouva ipan laiyuva achapa thi chun Pathen to eisuh cham’u ahitah leh, kichamna chung chon’a Ama hinkhoa huhhinga iumtei diu ahi. (Rome 5:1-10)

ATHAH NACHANNA DIN ALUI DA-LHAN

Nungah in ji anei dingle, anu-apa, ainsung adalhah a, ajipa insunga agalut ngaiya ahi. Chutengle, inthah, inkothah nei, hinkhothah nei ahitai. Nungah kititalouva, jinu, mou, nu hung hijia ahi.

Ahsi lekhathem hochun, Jesu Ahsi amuvin, agaholun ahi. Jesu penna mun alhun phat’un, “Chuin insunga agalut’u leh naosen chu anu Mary toh agamu thauvin, boh khup cheh-in chibai aboh tauve. Chujongle agoubomu hongin thil manlu cheh-sana, bego chule myrrh atoh-un, thilpeh hicheng hi apetauve.

Herod henglam ahopa kit louhelna diuva Pathenin amanguva ahilchah phat’ in lamchom khat ajuiyun agam languva akile kit tauve.” (Matthew  2:11-12)
Christa-to hinkhomna, Christian dihtah manna ahi ‘dalhah’ neilouvin, atahtah hithei ponate. 

Pathen cha nahina dia Jesu Christa hi Huhhingpu le Pakaiya nakisan ding. Nunlui , mi Pengthah hi’na dia  chondan le hi’na pha dia lomlou, sana le dangka banga nanei, na itlai, nasummuna phalou, natoh phalou, neh le don thenglou jouse chu, Jesu anga nalhan (selhah) a, Christa’a nunthah nakilah ngaiya ahi.

Chutengle, Pathen in acha dia nakisan ding. Na chonset, themmona, nunchan phalou, lhinlelna jouse na ngaidam ding. Jesu Christa’n na umpi ding. Lhagao Theng nasunga chenga, kipana, lolhinna, phatna hinkho, vangphatna le lungmonna, lunglhaina hinkho, Christa-to hinkhomna namankhompi ding ahi.

NGAILUTNA JALA THEMCHANGA NAHI TAI

 “ Danthun aseiho  bol vanga mihem koima them chang jou lou ding ahi, ijeh-inem itile Danthua kona chonset hetdohna um ahibouve.

Tun vang Danthu le Themgaoho hettohsah Pathen dihna chu Danthu vang hilouvin ahung kiphongdoh tai;
hiche Pathen dihna chu Jesu Christa tahsan vanga atahsante jouse ding ahin, koima imachom aumpoi;
ajeh chu mihem jouse chonsea Pathen loupina changlel ahitauve;
Jesu Christaa lhatdamna jal’a lungset vanga manbeiya them changkha ahibouvui; (Rom 3:20-24)

Ngailutna jala Christan na huhhing ahi chu kihet in, Pathen koma kipahthu lhut jingin. Tahsanna lama nakhantou jing nadin, nitinin Bible simin, tao jing jengin. Pathen lungdeiyin umin. Napanpi din Lhagao theng thum jingin.

MIJOUSEN TOHMAN ASAN DIU AHI

“thilse bol jouse ……. achunguva thoh genthei hesohna hung lhung ding ahi;
thilpha bol ho vang …… loupina jabolna chule chamna chang diu ahi. “ (Rome 2:9-10)

Thilpha bolin, kipaman nasan ding ahi. Nangma hatna keuva nabol got-le najolou ding ahi. Amanasan ‘Patheng Lenggam (lungdei kibolna) hol masan. Jesu kisan in. Chutengle, Pathen in Lhagao Theng napeh ding. Hichun, Pathen dei thilpha bolna a napanpi ding ahi.

I-tobang thilpha boljong lechun, mihem het’a apha bou ahinalaiye. Aphapen chu, Pathen tah khatseh le ahinsol, Achapa Jesu Christa kisan hi ahi.

Kisan in tutah hin. Aman na lungkot akiu jing e. Honpeh in. Taonan kouvin. Napanpi ding ahi.

CHAPANG BANGA TAHSANNA LHING NEIDIN JESUN NADEIYE

Pastor khat in Houina aseiye :
Gojuhna din taona kagongun, nilhum keiya taodin kakikhom un, katao taove. Nilhah lama kakikhen'ule go ajutai. In jotdan kahetapouve.
Chapang khat chun vaipo ahin choi chu alan, in ajontai. Kei hola khat cha achoiya ka umpouvin, go chat kangah taove. Hichun, kakihou houvule, hiche chapangnu tahsanna chu Pathen in asan danin kaseidoh taove.
Keiho gojuhna dia katao vangun, ajuhding kagel phapouve. Chapangnu vang chun taona sanga Pathen in go ajusah ding chu lhingset a atahsan jala Vaipho ahin kichoi ahi.
Chapangnu tahsanna asange. Ama banga tahsanna inei diu hi Pakai Jesu'n aseisa ahi."Natao tengule, amusan kigel n ati"ahi.
Chapngna jalin Pathen chu loupina pen, Ama banga tahsanna neidin kithopina thumute.

NUNNOPNA TAHBEH

Mi-giloute thumop sang-lou, chonse-te umchan jomlou, Pathen taitomnom-te joplou chu, mi nun-nom tah ahin;

Pakai Danthu-nit akipapi jo’n, Danthu chu sun le jan’in asim jing’e.

Hitobang-mi hi luipanga thingphung-keh, aphatcha hung gatheiya, ana’n goptih neitalou tobang ahi’n, atoh lamjousea alolhing theiye.

Mi-gilou vang chuti ahipo’n, huiya vai-kithe bep ahiuve.

Chonse-te jong Pathen’in themmo achan’a, midih-te kikhopna-a lha theiloudiu ahi.

Midih-te chu Pakaiyin apuiyin ahoidam’in, migilou-te’n vang manthahna lam ajontauve. (Psalms 1:1-6)

PATHEN LHAGAO CHENNA MITE CHU MUDOH THEI AHIJI

Mary sunga Jesu aumtai.Anulamnu Elizabeth sunga chu Pathen lhacha Lhagao Theng dimset Baptist John chu uma ahi.

Elizabeth ina Mary agah lut-le, anu Elizabeth sunga um John chun Mary sunga a Pakai Jesu um chu ana lem in, anu oisunga chun ana kichom jenge. Hichu, Pathen lhagaovin Elizabeth ahetsah in Elizabeth kipanan adimtai. ( simin Luke 1:39-56)

Elizabeth in Mary sunga Jesu umchu ahedoh tai. Koima seipeh angaipoi. Pakaaiyin ahetsah ahi.

Hijehchun, Elizabeth in Mary chu, “Ka Pakai-nu” ati jengin ahi.

Loupina Pakai chang jing tahen.

Christa jala ka insungmite, nasunga Pathen Lhagao Theng chu achentengle, hetna napeh ding, Pathen thupha naseidohsah ding, thilpha nabolsah ding, nunchan pha naneisah ding ahi.

Elizabeth in asunga um naocha chu akichopsah ahipoi. Naocha chu kichoma ahi.

Christa Lhagao chu nasunga aumtengle nangma kihabol ngailouva, Lhagao Theng chun nanga na ahintohdoh jeng ding joh ahi. Mihem kihabolna, mihem chihna- hatna a phat bol hi alhoupoi. Mipha, Pathen dei hinkho manna dinga Jesu Christa hi kisan masah ding ahi. Chutengle, Pathen in Lhagao Theng chu isunguva achensah a, Pathen tha hatna, Christian pha hina chu ei neisah jiu ahi. (Acts 1:8)

HETBEDING: Pathen in alungdei aseimasaji. Achapa Jesu hungding seimasa dia Alhacha kin boldia John ahinsolding chu apanna ding Elizabeth aseipeh masai

Achapa Jesu penna dia agon Mary jong chu Pathen in, vantil Gabriel kama konin aseipeh masa’e.

Nang jong nasunga Jesu pending adeithu Pathen in Bible ahin dimset in aseiye. Chule, alhacha thusei tampin jong naseipeh e. Keima, alhacha dia jong simtheilou jeng jong eiseisah jinge.

Elizabeth le Mary banga “Pakai, nadei chu kachunga lhunsah in” natia, nalungthim pumpi napeh thenga Jesu Christa chu nakouva, nakisan-le, tonsot-hinna chu napeh ding, Lhagao Theng chu napeh ding ahi. Chutengle, Pathen lungdeimi hinkho chu naneisah ding, mite mutheiya na ahin tohdoh ding ahi.

Jesu Christa chu nahinkhoa vaihom ding, na Huhhingpu le Pakai dia nakisan nom nah em? Nanga na ahintoh ding nanop em? Nanop thu nasei tah em? Taona a nakou tah em?

Nakouva, nakisan tah-le, kipa aume. Tuhin, Lhagao Theng thahatna chu thumin. Nanga na ahintohdoh nadin tao jingin.

JESU CHRISTA ISANTEIYU NGAI AHI

EIHON JESU CHRISTA HI HUHHINGPU LE PAKAI DIA IKISANTEIYU NGAIYA AHI; CHUTENGLE BOU PATHEN NGAILUTNA LE THIL EIGONPEH’U HI ICHANTHEI DIU AHI.

JESU CHRISTA ISANTEIYU NGAI AHI

“Ama ana kisan jouse chu Pathen chate hi-theina(Right) chu apetai, Ama mina tahsan ho geiyin” (John 1:12).

TAHSANA’A KONA HUHHINGNA HI ISANU AHI

“ Tahsan jal’a lungset man’a huhhingna chang nahiuve, hiche hi nang hoa kon(nang ho kilamdoh) hilouva Pathen thilpeh ahibouve. Natoh vanga (nachanu) ahiloujeh hin (koima) kisonna thei jong ahipoi.” (Ephesians 2:8,9).  

{HILCHETNA : “ Tahsanna a kona  lungsetna changa huhhinga um nahiuve, hichu  nang ho kilamdoh ahipoi; Pathen in manbeiya napeh’u ahijoi; natoh-ga, natohvanga nachanu ahiloujeh hin koima kisonpithei  jong ahipoi “ (Ephesians 2:8,9).}

JESU CHRISTA ISANTENGULE HINKHOTHAH CHU ICHAN DIU AHI

KOT HONPEH IN

Mary bangin Pathen in nitinin nakoma thu asei jinge. Huhhingpu Jesu chu nasunga apensah nome. Mary’n, “Pakai nalhachanu chunga hin nadeibang chu umhen” (Luke 1:38) bangin, Nalungkot akiu jing chu honpeh in, nanop thu seiyin, “Pakai, kalungsunga hin hung chengin, hungpengin, na Huhhingna chu neipen. Ka lungsunga vai homin, kahinkho nadeilamin neipuiyin” tin tao tao jengin.

Pathen in na panpi jing tahen.

Luke Simin

Kipana Thupha danga hin Jesu pen le neolai akimu behsehpoi. Aseijuiten jong ahetlou diu mong ahi, aletjouva bou kivop ahiuve.

Luke hi seijui hilou, judami hilou;Gentile-mi, Solchah Paul kilhonpi, Doctor ahi akiti. A lekhasut jong hi Gentilete simdia kisun ahijeh in; Solchah hoakona ahetban in Jesu-nu Mary koma konin Jesu neolai thu akhola ahet in akiseiye.

Gentile-mi khat in gentile-te simdia asut ahijeh in, mijouse din hetbailam le kicheh ahi. Hiche Luke hi simin, hichea kon hin Jesu thu simute.

MI KICHEH HI IN

Jesu Christa tobanga vannoi pumpi mihem khelsoh jeng pengkittaponte. Ama nungjui jouse kheldoh a, ama deimo le deh jouse jong akheldoh ahi. Kivaipohna jouse, kumsimdan hihen, phat le nikho mandan kheldohsoh, chule, Hou (Religion) jouse jong kheldohsoh’a ahi.

Jesu Christa hi mihem chapa ahina jong kicheh tah, Abraham son, David son’a pat Joseph chapa tia kichehtah a apennagui, chule Juda phungmi ahi.

Pathen ahina jong kichehtah ahi. Pathen in Adam koma aphondohsa, Abraham ateppeh a “nachilhah hon” tilouva “nachilhah in”. tia anatepsa, Mose koma aphondoh, David le themgao ho kama anaphonsa, Achapa ( Pathen chapa) ahichu, Vantil Gabriel in Mary le Joseph koma aphondoh ahi. Pathen Chapa chu Pathen ahi. Pathen lhagao (Lhagao Theng) akona hung kijil nungah theng Mary sunga hung kijila peng ahi.

Pathen Cha ahivanga Mihem sunga Mihem lim le mel aput jeh achu Mihem lhingset jong ahi. Hinla, mihem ahi jeng vangin Pathen ahina chu abeipon, alhingset in aumin ahi.

Adam le Eve, alheplhah jouva pat a vannoi pumpi hi Satan lenggam, avaihopna gam ahi. Mihem jouse chunga vai ahop a, Pathen deiloulama apuiji ahi. Pathen in mihem konkhat mangcha a thu ahinseitengle, mihemte puimangna din Satan in mihemte chu kipana, haona, loupina, thanopna le thaneina apejin, Pathen tah chu mudohlouvin amahthahsahji.

Mihemte chun chomkhat kipa-thanopna, loupina, lalna, nei le gou, chule minthanna aneiyu chu ngolpin, asempau Pathen chu adonjipouve.

Pathen in asemsa mihemte angailut behseh jeh in Achapa Jesu Christa chu leiset a ahinsoltai. Ajehchu, mihem jouse Satan in anopnop a apeichatvaiya, chomkhat kipa-nopna apeh a akhonna-le natna, gimna, gentheina, thina le tonsot geiya manthahna atosahdiu chu Pathen anompoi. (John 3:16-17)

Pathen in Achapa Jesu chu Satan vaihopna le thaneina jouse sumang ding le Satan in sohbanga ahen mihemte huhhing dinga ahinsol ahi. Jesu hungpen ding chu kicha in, Satan in suhboitei agon, ahungpenna ding khanggui chu suhtan agojinge. Hinla, guitan ding chu Pathen in Ruth mangchan ajopmat e. David jong akipalsah in, hinla, Pathen in ajopmat thouthouve.“Phat chu alhinset phat in” ‘Huhhingpu Messiah’ chuahungpengtai.

‘Jesu’ kiti hi ‘Huhhingpu’ tina ahi. (Matthew 1:22)

Ipi a huhhing ding ham? Mihemte.

Hoiya kona ahudoh ding ham?

Satan bolgimna akona huhdoh a, tonsot geiya Pathen-to chengkhom dia ajopmat ding ahi. Edena kikhensa Pathen le Mihem kijopmatna chu Jesu’n ajopmat ahi.

Pathen hi ‘thitheilou, tonsot a hingjing ahi. Pathen-to kijopmatna chu ‘tonsot hinna’ neina ahi.

Pathen hi Lhagao ahi. Chule, Hinna bulpi ahi.

Pathen-to kikhen chu ‘Hinna’-to kikhen ahin, hichu, ‘thina’ ahi. Kijopmat kit chu ‘hinkitna’.ahi. Chule, ‘Lhagaova Penkitna (Penthahna) ahi.

(Pathen in pha asah-le, Limpuma, Bible chang hoto vetsahna, olle abua sodoh dia kigong ahi.)

Jesu chu apentan, athi in, athou kittai. Mihem simjoulouvin, Jesu Christa akonin Pathen a ‘Tonsot hinna’ chu amutauve.

Nangla, nachantah em?

Ole, na chunga Satan in vai ahop nahlai em? Phat nanop vanga phatna hinkho namansahda jing nahlai em? Nunchan phalou nadeimo vanga, nahetlou kah a phatmona nanunna hung kilangji nalai am? Achutile, nangma hilouva, nachunga vaihompa, Satan chun, athua nanunsah nahlai ahi! Jesu Christa’n chonset (satan) gal ajona chu nachanloulai ahi! (Romans 7:14-20)

Nachan loulai-le, nachan nom em?

NGAILUT MANLUTJE

Mijouse ngaichat khohpen chu ‘NGAILUT’ ahi. NGAILUT beiyin thil ijakai hi apanna tahtah aumtheipoi. Aphapena kihe jouse jong hi NGAILUT apanloule, kichat umpen le deimo umpen asohtheiye. Sum hi ngaichat khohpen khat ahi. Hinla, NGAILUT apanloule sum jong hi kinahna, kithana gei asohtheye.

Nei le gou loupitahtah jong min aneinom cheh e. Hinla, NGAILUT apan loule nei le gou jouse jong hi manthahna sodohsah ahijing theiye.

Pathen thu ijat he-ingting, seithem jongleng NGAILUT kaneiloule, koimachan hinna kimuthei deh ponte.

Hijeh achu, Solchah Paul in,  "Kanei jouse migenthei ho hoppen’ingting, ka tahsa hi meiyin gouvam jeng jengleng, NGAILUT kaneiloule  imacha ka phatchompi ding aumpoi " (1 Corinthians 13:3) ati ahi.

Jesu Christa’a kagolte ho, Pathen thu hi Pathen in hetthemna eipeh loule, hetthemthei ahipoi. Hetthemna thum jingin.

Bible in NGAILUT  atihi, mihem in asei NGAILUT  hi ahipoi.

Pathen aseina ahi. “Pathen hi NGAILUT” ahi (1John 4:8)

Pathen aumloule, thil ijakai hi “Pannabei, Pannabei jeng ahi”. Thuhilpa thusei geldoh in.

Thil ijakai hi pannanei ahitheina dia, eisempau, aumlouva kona thiljouse umsahpa, aneipa Pathen, NGAILUT PATHEN hi neiteitei ngaiya ahi.

Pathen dihtah khatseh chu naneina dia, Achapa Jesu Christa hi nanei ngaiya ahi.

Tuhin, Jesu Christa chu kouvin, taonan. Aman, Ama mina kou joouse chu asanji ahi.

NUNCHAN PHALOU DALHAH HI PATHEN PHATTHEIBOH CHANNA AHI

“Achonset sel’a chu lolhing louding, aphongdoh a, dalhah’a bolkit talou hon vang lungsetna akimu diu ahi”. (Proverb 28:13)

Pathen adei chu “sunggil pena thutah a um hi  ahi”(Psalms 51:6) chule eihon iboldia teidiuva eingeh’u chu “chonset kisih ding” ahi (Acts 17:30)

Michonse chun atahsan jala lungset mana huhhingna achanna dia achonset akisih tei ngaiya ahi(Ephesians 2:8, 9).

Chonset kisih hi Pathen in a phalpeh ahi. (Acts 5:31 & Acts 11:18)

 Hiche ahin, Chonset kisihna neilouvin koiman huhhingna amu theipoi tia aseina ahi

Huhhinga umsa chun Pathento akijopmat  jingnadia kisihna hinkho amanjing ngai ahi. (Job 42:1-6).

Pathen nunnemna chun chonset nakisihsah ahi. (Romans 2:4)

Hichun  “Pathen kom jotnadia chonset kisihna le Pakai Jesu Christa  tahsanna hi” asodoh ahi (Acts 20:21);

Tahsan ding chu - Christa chu eiho chonset jeh in athi’n; vuiyin aumin chule athilah akonin athoudoh kit e ti tahsan hi ahi (1 Corinthians 15:1-4).

Bible in ‘chonset kisih’ atihi English in ‘Repentence’ akiti hichu ‘anunchan phatlou hedoh a dalhah’ tina ahi. Lungin adeitahlou mai hilouva, chonset hinkho chu dalhah aseina ahi.

 ‘Chonset dalhah hin mihem huhhinga umnadin alhinsah in, hinla, hichena ding chun Christa tahsan angaikhoh in ahi. Kisihna dihtah chu tahsannato chekhom tei ahi. Chonset kisihlouva huhhinga umna dia tahsan chu umtheilou ahi. “Pathen lam jotna dia chonset kisih ding, chule I-Pakaiyu Jesu Christa tahsan” kiti teni hi huhhinga umna dia ngaikhohten ahi.

Hitia chu, chonset dalha’a Christa min akisangle Pathen phattheibohna chu asanpatji ahi. Ikisantengle, Lhagao Theng thahatna chu thum ding, hiche bou chun Jesu Christa-to hinkhomna hinkho eipuidih diu ahi.

“ Pakai, Nathu hohi hethema juithemtheidin neipanpin. Na deibang hinkho mangdin Lhagao Theng chu eipui, eihil, eilhamon din kasunga chensah in;. Kahinkho nadeilamin neipuiyin, Jesu minin, Amen.”

JESU CHRISTA HI TAHSA LE LHAGAO HUHHINGA AHI

Jesu Christa hi Lhagao sochatna keuva nahet em? Tahsa sochatna jong ahi. Tahsa natna jouse damna, nunchan phalou, chonset jouse damna ahi. Kei banga johsah phalou nei nahi jeng em? Ju, Lou, adang; ahiloule, guhchat, sumkap, jouva kivah, alamlouva sumlamdoh le adang? Na khop a jong nalha thei deh lou hijeng am? Nalhaso gotle nahimo ham? nalhaso gotle na oi, nati na jeng am? Na summuna phabehsehlou chu nalhaso gotle na insung hahsatna um jeng am? Naloi hon nakou jing jenga, na donda gotle nabolchah jeng um? Ole kichatna a na um jeng em? Gihsalna namu jeng em?

Hiti ho jousea kona jong “HUHHINGPU” ahi JESU CHRISTA hi.

Itobanga kona huhhingna na ngaichat em?

Kouvin, tuhin kouvin, Pakai Jesu Christa chu. Na huhhing ding ahi.

Taovin,kouvin Pakai Jesu Christa chu tuhin, nahuhhing ding ahi. Pathen thun “Pakai Amina kou chan chu huhhinga umding ahi” ati ahi.(Romans 10:9-13)Pakai chu Aminin kouvin, Pakai le Pathen’a mihem hon aneiyu tamtah ahi, “Pakai Jesu, Ka Leng le Huhhingpu Jesu Christa” tin kouvin.

JESU CHRISTA SONG JING IN

“Hettohsahna hijat pin meilhang banga eiumkimvel jeh’uvin einoh phahsah jouseu le ichung’uva kaijing chonsetna hi pailha’n, thoh hat tah-in imasang’uva kilhai tetna lama hin lhai’yu hite. Tahsan bulpi le kikhomna Jesu lam kat jingute” (Hebrew 12:1-2a)

Na lhinlelna ho kisuhmosah hih in. Chonse le Hatmo ihiu hi, thiljouse hetohsoh le musoh Pathen in, ahaipoi. Eiho chonsetna sanga, Aman eingailutnau hi lenjo ahi. I-chonsetnau le hatmo,lhinlelna jouse ahetsoh, amusoh vanga, Achapa, Jesu Christa itahsan’uva Leng le Huhhingpua kisan jal’uva ichonsetnau le hatmona hohi akimumosah a, Acha dei-um eiso got’u ahi. Hichu kihet inlang, nasumo le  nasunohphah jouse - ‘nachonset , kisonlelna, kineplelna, hatmo le lhahsamna, jouse chu sumilin, dontalouvin; Ama tahsante kitetna – Bible sim-het le tao jingna, nunchanpha bolna, natohpha tohna, houin kai getngaina, Pathen thu lama tompanna lama hin ha-kibol’in.

Nangma kigel louvin, na Huhhingpu Jesu Christa’n nangailutna, nachonset ngaidamna dia thinagei atochu gelinlang, kipah tah in Ama panpi jing ding kinem in, lhagao lama khantou ding le tahsa lama naboljouse jong Ama lungdei hidin, tao pumin, malam no jingin.

Na lhinlelna ho aseiding, “Hettohsahna” dimset jongle, Jesu natahsana le Ama’a nakipana thu ‘Hettohsahna’ jong aum’e - Lhagao Theng, nanga umjing chun Pathen kom le mihemho jong ahetsah jing ahi kihet in. Songlel hih in.

Nangma kisong hih in, nakisonle, nakonlel ding ahi, ima nabolngamlouding ahi. Agiloupa’n nakisonna chu hin mangintin, “Keivang, imacha kihilou, mibanga thilpha kiboltheilou, houin kaijong kijoulou, Pathen thu kithemlou, taona kihatlou, tolom pehding jong kijoulou, kanunchan phatloula kilha theilou” tia nagelsah ding. Hichun, nalung asuhneova, malam nona naneisahlou ding, na kitimtim jeng ding. Ajona chu mohseh nahiding ahi.

Nangma kisong hih in. Jesu Christa songin, “Keima imacha hihih jongleng, ka Pakai Jesu’n eipanpi ding ahi. Ol ol’a Aman hatna, lhinna, phatna, thilpha bolna, eineisah ding ahi. Apatna lamin ima hihih jongleng, Ama’a kingaileng, Aman eipanpi ding ahi” tin bol jengin. Taona le Bible sim bol jingin, thiljouse boltheipa chu songinlang, malam no jingin.

LHEPNA KIJOSAH HIH IN

            Ijemtia lhepna natoa, “Taona a kilhandoh mana huhhingna kisan chu lhingponte” tia Agiloupan nagelsah, mikhattou ahin seisah jengle, “Lhing ponte. Hinla, kaboltheisun kabol hi Pakaiyin eisan ahitai” ti katahsan in kingamlha  jengin. Pathen tahsan hi ‘Pathen a kingaplhah’ tina ahi. Asei thonngailou Pakai chun aseiye : 

“tahsan jala lungset mana huhhing chang nahiuve. Hichu nanghoa kon ahipoi; Pathen thilmohpeh ahibouve. Natoh vang ahipoi.Hijeh achu,koiman akisonpi thei ahipoi.” (Ephesians 2:8 9).

 “ Mikhat jeh a leiset a chonset hunglut a, chonset jeh a thina hung um ahi. Chule, hiche jeh achu, mijouse thina hung umdoh ahitai, ajeh chu, mijouse chonse ahitai.” (Romans 5:12 );  “Mijouse hi chonse ahitan,Pathen loupina chu changlel ahitauve” ati ahi (Romans 3:23);“Chonset ga (bol) chu thina ahitai”(Romans 6:23).

            Hinla, “Pathen chu NGAILUT ahi”. ( 1 John 4:8)

 “Pathenin vannoi angailut behseh jeh in Achapa neisun(Jesu Christa) chu ahinpetai. Koihile, Ama tahsan chan chu mangthah louva tonsot hinna anei ding ahi.”  (John 3:16)

“Koihile Pakai chu amina kouchan huhhinga umding ahi” (Romans 10:13).

“Eihon i-chonset i-phondoh’ule, Ama hi tahsan umtah le kiditah ahin, chule ichonset chengseu angaidam ding, chujongle kidihlouna jousea kona eisoptheng diu ahi.” — 1 John 1:9 2.

Pakaiyin, “Lungdong hih un, Pathen natahsanui, Kei jong neitahsan’un” tia (John 14:1)

            Chunga kasei banga hi, mihem in adihtah le aphapen akibol theipoi. Hetjong ihepouve. Bible a Pathen thusei hohi jui jeng ding ahi. Ajeh chu, Bible a thu um hohi Pathen in semtila pat’a amanchah miho koma ahinseiya, hichu kijihlut’a ahi. Hijeh achu, Bible in asei ahi :

“tahsan jala lungset mana huhhing chang nahiuve. Hichu nanghoa kon ahipoi; Pathen thilmohpeh ahibouve. Natoh vang ahipoi.Hijeh achu,koiman akisonpi thei ahipoi.” (Ephesians 2:8 9).

     Hinla, “Pathen chu NGAILUT ahi”. ( 1 John 4:8)

Pakai Jesu’n, “Lungdong hih un, Pathen natahsanui, Kei jong neitahsan’un” tia John 14:1

Pathen in Na Ngailutna Thu Midang Seipeh In

Pathen in mijouse hi kibang cheh’a angailut ahi. Vannoi pumpia mijouse angailut cheh’a, jeh in

 “koimacha amathah ding anompoi” (2 Peter 3:9).  ,

  “Mijouse huhhinga aumdiu le thutah ahetdiu” adei ahi (1 Timothy 2:4). 

Hijeh achu, Pathen ngailutna changsa hohin, achang loulai ho Huhhinga aumna diuva itaopeh diu” ngaiya ahi.(Romans 10:1). Chutichun,  “Ama seijui bangin kilang’ute” (John 15:8)

Pathen mi Huhhingna thu hohi miho simnom nom ding lama seiyin homjalleute. Chujongle, Pathen ahin mu’va, akisan theina diuvin taopeh jingute.

Hitia chu bolding nanop-le Pathen panpina thumin,

Taovu hite :  ”Pakai, nei huhhing nau jalin, na huhhingna thupha mijouse ding ahidol miho seipeh theiya neipanpi jalin kakipah e. Na lampi ho juithema, lhagao lama pilhing din neipanpin.Na Lenggam kehletna dia pan latheidin nei mangchan tina ka Pakai Jesu naminin kaathume,, Amen.”

Hitia chu nataole, Pathen kom lhutnan ‘Amen’ jih in. 

PATHEN IN MIHEM A NASEM LONA NA HET EM?

Ipi dinga Pathen in mihema nasem ham tihi nagel khah tah em?

Sahem hilou, mihem a nasem hi doi le tup neiya nasem ahi.

Nasempa’n ipi hidia nasem ahi donlouva, nanop nop a na um chu dih nakisah hi nam?

Vetsahnan : Me-a hondin  Maipum khat nacho tai. Neocha chan na-at in, konga nakoiye. Chuin, Bel nalan, asunga tui nasungin, meichunga nasong tai.

Tui chu sou tadinante natin, malcha na-at in ahile; na kisah-lel kah in, maipum na-atsa hochu, meichunga bel sunga chun achamin analut’un, anamin deltai.

Nane nom nadem? Ole, iti nagel dem?

Na kipah dem? Ole, nalung ahang dem?

Keima gel danin vang, Thilha bol hisah inatin, nengam po’nate kati. Ahilou jongle, kidah inatin, nenomponate.

Anche bon nagel banga aumlou naki’chat’a , nakidah-le, Pathen dinmunin ding patep in.

Nasempan, agon banga umlouva; nasempa doi le tup donlouva, nanopnop a naum chu, dih nakisah name m? Pathen in ipi agel dem? Lunghang lou ding ham?

Kho-hetna, lunggel theina napeh chu, nasempa lungdei nagela, nahetna dia abol ahi. Alunghan-le, nadonda ding; napaimang jengthei ahi.

Ei sempau Pathen lungdei donlouva, inop nop’uva hinkho iman’u hi Bible in ‘chonset’ tia asei ahi.

KICHEH TAH A JESUN AKIMUPI HOA KONIN BOU HINNA HI MI APEJI

Pathen thu hi kichuh thema seithem ding ahinai. Hinla, itobangin themin seithem jongleng, keiya hi Pathen achenloule, kasei jahon hetnan vang neitheiyuntin, hinna’a vang aneilou maitheyu ahi.

Pathen in ‘hinna’ apeh kiti hi, ‘A Lhagao, Lhagao Theng’ apeh tina ahi. Pathen in hiche ‘hinna’ ‘Lhagao Theng’ apeh hi mihem khut akonin apepoi. Amanbou apeh ahi. Mi apehna din, mihem amangchaji. Amanchah mihoa chun Lhagao Theng hi apansan, Pathen thilpeh ‘hinna’ chu apesonji.

Achomlama seidin : Pathen in Ama a um ‘lhagao hinna’ hi Jesu Christa tahsana kisan ho apeh ahi. ‘Hinna’ neiho chu amangcha in thu aseisah in, aseiyuva kona tahsan ho chu ‘hinna’ chu apeji. Amanchah ho chu ‘tuikai’ abou amanchahji ahi.

“… ‘Keima eitahsana chu alungsunga hintui put’a luiya longding ahi’ atibanga um ding ahi,”ati.(John 7:38b)