Tunia ‘thu-homkeu,
Thujou’ kiseithang ‘Chi aman akal in Kg a Dk 100 ahiti le akimujoulou ding
ahi’tia kiseithang. Chule, mipi kisunonga bazaar le dukan hoa chi amujatjat
chogam jeng hohin, ei lungnatsah lheh jengin ahi. Kaloinu tah in jong kg a dk
50 a achohdeh ahi. Phone eihinbol manin, kajahda peh in ahi.
Mipi chihola
kisunong. Ahemamasa hon dukana, aman kal masanga tia aloma chocho jeng. Min
adoh-le ‘tamtahtah kachohji mong ahi’ tia amujatjat choh jeng. ‘Thu-homkeu,
Thujouvin alhep chatvaiya ‘jousei’, mi-lhemlo’ adim jenge!
I-gamsungu, North
East pumpi, adeh a eiho chenna hi, tumasanga chu ‘jat le nam chomchom kikah a
thu-homkeu thethang jeh a kinah-kithana ana dimset ahi. Phatecha thu kilah
tona’achun ‘thu-homkeu, thujou thethanga uma, athethang hon amaho lunghan
buhlhahna a mipi atilset’u ahi’ dol mudoh ahi. Hichea kona chu eiho lah ahi
jatjouse simthei, thu kiselgu umlouna dia English a Thuso aumlou akhohje hea
hinbolpan kahi.
“Pakaiyin,
kalungdei ahei! Apha katup hi ei hetpeh
‘ngoingoiye’” kati nom ahi. Phatthei eiboh in, imacha duhdah hihih jongle, miho
seichomna sangtahtah eichan in, jat jouse-to kihouna le dei-hu’na eineiyun,
2004 apat in tanglou helin, eipui jing’e. Kajalen vala, nom kanasah vala, Ama
lungdei khellam kagei ding anompoi. Midang ho jouse banga kaumna a kona chu
mahthah den ding kanahitai. Anompoi. 2008 in eikouvin, ka jonin, kadalha kit e.
2009 in eikou kit in, kasangin, lha li-lhanga jouvin kakilepmang kit’e. 2010
kumbula konin, ka-inboh tai. April lha in kahinkho akhel tai. Eikhel heltai.
Pathen thu bolto, kanatoh eikopsah jing tai.
Hichea, keima hinkhoa
eimusah hi – mijouse Pastor, Evangelist, le adang ihithei pouve. Thil dang dang
ibollouvule, iti Pathen thilbol hohi imanchah thei lou diu ahi.Achomcheh ibol
diu ahi. Hinla, ipi natoh nei jongleur hen, Pathen thu lhangsap hi koptha
jingthei ahi. Hiche boldinga chu, nang ho jouse hi katem jing nahiuve. Bolin.
Pan jengin. Pathen phatthei bohna hi alomin hunglha ponte. Chutichun hunglha
tahbah-le nangollo ding ahi. Ol ola nahinpeh ding ahi. Jesu Christa kouvin,
kipan in. Na panpi ding Lhagao Theng aum jinge. Kei jong kapanna thei aumle,
taona le Athu pehson ding beh hinpe nange.
Lhepna hohin nitinin
eibomun, chonset eibolsah jing’uve. Hitia lhepna kitoh-gempen hohi – lunghan,
khat chunga lungnopmo, mikhat houset a pho le gihsal, tohding dol toh nomlouva
phatdanga dia vohchon, thaset, jousei, mi jouva lhep (apha hile kilomtah,
alunghan le lhaset diu noplou jeh a i-ngailuttah iji, icha, i-gol jong thu
neocha cha lhep a lunghang lou le lhaselouva koi) – hiti hohi kitoh jing ahi.
Chunga kisei lhepna,
mihem geldia neocha cha, hohin asuhset pen chu ‘eima’ akihiji – ‘eima kipana’
eilahpeh’a, i-hidingdol ki-hitheiji talou. Mi kipah-louvin tohdoh pha anei
theilou iheuve. Agiloupa dei chu mi suhmo hi ahi. Suhmo’a kona nalah-mangpeh
jichu – na insungmite le nagolte chunga nalunglhaina ho, natohna a nakipa le kinepna,
na-gunchu’na le tomngaina, nachanchunga lunglhaina, thilpha nabolnomna, le
adang ahin – hicheho jouse nasuhmo’a kona chu Pakai chunga nakipa le kinepna
chu nalahpehgotji ahipen’e. Lunglhai lou le kinemlouva na-umtengle Bible simnom
talou, tao nomtalou, houin kainom talou; chule, nanu-napa, na sopi, naji-nacha,
naheng le kom,chule midang ho dia thilpha bolnomna umjitalou ahi. Hichu, na
lhempa lungtup le kipana ahi.
Bible in, “Gotsa
demin umun(lung neng le limgeh in), chingtheiyin, phat jousen kiging jinguvin;
na kidoupiu, Agiloupa chu, Sakei gilkel banga, koi kaval lhum the idem tia
vah-le ahi.”( 1 Peter 5:8)
Pakaiyin eideiyu chu
“Soh (chonset soh) ihi louna diuva Christan eilhatdoh’u ahitai; dingdet
jing’un, soh namkola chun kihen ohkit tahih un” (Galatians 5:1)
Pakai Jesu Ama tah in
“Vannoiya hin hahsatna natoh’ui, hinla, lungmong’un, Keiman vannoi kajoutai”
tia asei ahi(John 16:33).
Hijehchun, ajousohpa
Pakai Jesu chu i-Lengpau le Huhhingpu ahi’n, Ama koma tao jouse chu, chonset
akona ahuhhing banga nitin lhepna akona jong ahuhhing jing ahi.
Tao’vute : “Pakai,
hatlou le lhinglou kahi; nei umpi jingin, lhepna kato jouse hohi Lhagao Theng
thahat in neijopeh jingin, nanga kakipana hi nei-honbitpeh jing jeng’in, chule,
nadeilam hinkho chu nei mansah in, Na kina din neipansah in, tia ka Pakai Jesu
namina katao ahi, Amen.”
Hiche taona hi taona
naneile ‘Amen’ jih in.
No comments:
Post a Comment