Job thua Pakai seinom

(Thuguh kisel)

Job thusim hi Pathen thusei hon aseinom pen’ule Houbung mite kihilna aman loitah’u ahi. Aseinom jiu chu Job 1:1-3 sung hi ahiji. Amaho seiji chu “Job hi mihaotah le Pathen gingtah ahi. Achate din maicham jingkah tinin asemin, suhkhel anei jengule tin ama ho din Pathen koma maicham asempehji’ ti hohi ahi. Pathen agin jeh le maicham asem jing jeh a Pathen in phatthei aboh a haova ahi. Eiho jong ama bang ihiule Pathen in phatthei eiboh diu ahi. Aji-acha, anei-agou jouse kichai nungin jong Pathen atahsan jingin ahile achainan Pathenin asanga tamjon phatthei aboh kit e” atijiuve. Adih e. Hitia chu, Christiante jong um ngaiya ahi.

Lekhasim akihi poh in, Job mina Pathen thu sunga Lekhabu khat um jeng hi kagel in. Ahao jeh a hilela Leng maimai hojong Job sanga haojotei ding ahi. Adeh a Leng David, Leng Solom teho vang ahaonau, Pathen ahetnau le achihnau kisei chai lou ding ahitai. ‘David’ ahiloule ‘Solomon’ tin lekhabu aumpoi. Amani thuvang II Samuel le I & II King a nasatah in akiseinai. Hinla, am ho mina hi Abu mong umlou ahi.

Ahile, Job mina lekhabu khat aumjeng hi, Pakaiyin Job hinkhoa kona kihilna amite dia akoiguh umtei dia kagel ahi. Hiche jala jong hi Pathen thusei le Houbung lamkai hohin ama thu hi asei jingo hinte, hinla, akisel nalai uma hinte ti kagelin, phatechan kasimtai.

Pathen Lenggam mite

Pathen Lenggam thu ihasei lheh jengtauve. Ahile, nangla, Pathen Lenggam-mi, citizen lhingset nahi nah em? Tu-leiset a nalenlaiya hi hiche Pathen Lenggam-mi chu nahiya, agamsunga nachenpat loulaiya, hiche Lenggam sunga chu NUNNOPNA,HINNOPNA naneitheilou laile, thinunga bou man din kinemval hih in.

 Mihem muding le mihem gelin haovin, chingin, them hih jong lechun Jesuahinna ((John 1:12) ; John 3:5), chu naneile koiman nalahpeh theilou, NUNNOPNA,HINNOPNA chu naneiya (Luke 17:20-21) kipah jing ding nahi. Nabol le nachan jouse Pakaiyin nangdia apha lampen ahi nahetsah a lungmong tah a na umding, imachan nalahpeh theilou – Hemto chemjam; tulaiya dia choibaipena milhamin manchah hoi ahetpen jong AK 47, natna,thina le lhankhuh jengin jong nakhen jou lou ding kipana nanei (Longlougam a um) jing nahiding ahi. Hiche, Lenggama NUNNOPNA,HINNOPNA  lhingset chu leiset pon in kiphetlhah joutengle (Thinungteng) Christa-to tonsot adia Vanthah le Leithah achu bulhingset a namankhom diu ahi.

Pakai Jesu’n leiset a ahunga chu hiche leiset ahi ana tundohsa ahitai. A hettohsah Baptist John in aseiye “Lungheiyun,chonset dalhauvin,Pathen Lenggam chun hikom ahinphatai’ atin (Matthew 3:2), Pakai Amatah in aseiye “Pathen lenggam chu nasunguva aume” ati. (Luke 17:20-21)

Hitia chu, Pakai Jesu’n Pathen Lenggam chu ahin tundoh-to kilhon chun satan lenggam sunga hahsatna-toh – natna tampiana – mitcho, nangong, numei kum 12 thilong, chatmo, paomo, khosih, le adanga damlou ho chu adamsah in, athigeijong akaithouvin – satan lenggam chu asuneo lheh jengtai.

Athia, athokit jouva Lhagao Theng ahinsol tah vang chun, seijuite gam tampia kithecheh in Lenggam chu kehjaobe ahijing tai. Ama ho thuseiya kon chun midang ahung punbeben tuvang hin vannoi pumpi hi Pathen lenggam soh a ahitai. Pathen Lenggam sunga chu, nang jong chenga nahitai. Hinla, Lenggam mi hi’na (citizenship) lhingset chu naneiloule, Lenggam-mite dia kipe phatthei bohna ( facility) chu nanei theilou ding ahi. Naneile vang hiche phattheibohna NUNNOPNA,HINNOPNA  chu Pathen’a kona nachan teiding ahi.

Nang le nang kilhem hih in. ‘Christian kahinai. Ka pengthah nai. Apha kanolnai. Pathen,Jesu,Lhagao Theng katahsan nai’ tin moh gel hih in. “Abraham chate kahinauve” tia kinem mai hiloudia Pakaiyin Judate ana gihsal ahi. “Pathen in song ho jong hi Abraham chate asothei ahi” ati chu hejingin.

“Christian kahinai” tia moh kinep bol hih in. Houbung lamkai, Postor, HB Upa le hou natong luitahtah jong NUNNOPNA,HINNOPNA   neilou tampi uma ahi. Leiset a hi “tu’n agamnamtui chu katep khatai” titheilou chun “O anom nadinge” ati theilou ahi.

Kasei konkhat hi, hiche bou hi sim nahile, hetthemlou ding tampi neiyinate. Ka seina mun hohi sim lele lechun hethem tanate. Tuni geiya hiche mun hoa kasei lhinglou tampi jong hi olle seidoh jing naute.

KIPE THENGIN MOUNU BANGIN

(ka lekhajih PATHEN LUNGDEI HINKHO II akona kiladoh)
Nungah le Gollhang kicheng ding chu khat in khat dia ahinkho aphaltheng ngaiya ahi. Achutiloule, kichen chu umtatah theilou, kicheng jongleu, umkhom maimai hi lhona sot louding ahi.  Chule,  Jicha kipah’a  le noma umkhomtheina ding jong chu – khat in khat dia ahinkho aphalthenggel ngai ahi. Chutilou nupa hinkho chu kipana le kitona aumjipon, insung nom asohjipoi. Nupa chu kihetto jing, kihoujing, khat in khat chu khohsah jing ngai ahi. Eima kipana le thanopna tamtah chu pailhah’a i-ji kipana lam holjoh ding ngaikom tamtah uma ahi.
Hitia chu, eima hinkho, ikipa-thanopna le ngaichat tampi chu ijiding gelna phaldoh, pehdoh theng ngaiji ahi. Hitia um nupa chu akitoh dom domin, kingailutna chu ahung sang cheh cheh jin, insung ahung nomin, khantouna lam ahin mano jitai. Hichu, chate dia ‘van-gam’ tobang ahiji. Houbung lah a  le  japi lah ajong vetkah thei chana jong Pathen in ahintun theiji insung ahiji.Hijeh achu, Bible in asei, Theologian tamtah jengin jong ‘ipidia hichelai tah ahi, akongtopi ding beihela kijih ham?’ tia aseijiu hi kisei ahi. Ven, Genesis 2:24 “ Hijehachu, pasal in anu-apa adalhah a, ajinua behding , tipumkhat hidiu ahitai”. (Hiche thu hi kaseina munchoma  namutheiye)
Jesu Christa-to hinkhomna a jong hi chuti ahi. Hijeh achu, Bible in, Jesu Christa hi ‘Moulang’ (Pasal) chule  ‘Houbung’ (Atahsante) hi ‘Mou’(Numei) tia KIPANA THUPHA MATHEW ahi asei ahi, chule, Songs of Solomon ahin ‘Gollhang le Nungah’ (Dongma teni) in aseiye.
Gollhangpa (Jesu Christa) hin Ama munnom (Van-gam) le anop, aloupina jouse hindalha a Nungahnu (adongma nu- vannoi mite) hi ahungvil, ahung-hel ahi. Nungahnu nu-le-pa ( chonset/Satan) hin a-itval jeng jeh un, achantei theina din ahinna chan-gei apetai. Hichea jong chu, nungahnu lhagao beh achanlou ding chu nungahnu dia tijat-um ahitai. Adamlai hinkho jong nomlou ding, vangphalouding ahi (Atahsanlou jeh a themmo changsa ahitai - John 3:18).
Achanteina dia, Gollhangpa’n abolding jouse bolgamta. Nungah nang (vannoi mi atahsaloulai,Leng le Huhhingpua kisanloulai hon) donlouva nakoi jeng ding ham? Achutiloule, Moulang (Jesu Christa) chun iti amounu banga Apa (Pathen) insung (Pathen Lenggama) chu noma hinkho namankhompi thei ding ham?

PATHEN LENGGAM LE VANA LENGGAM HI THAKHAT AHI

Theologian tamtah in PATHEN LENGGAM LE VANA LENGGAM hi achom in geljongleu, thakhat ahina akimui. Kitepna thah lekhabu som sunga hin PATHEN LENGGAM (kingdom of God) kiti hi vel  68 akiseiyin, VANA LENGGAM (kingdom of heaven) hi vel 32 akiseiyin, Matthew sungin bou akiseiye.

Matthew hin VANA LENGGAM atilona hi, Judate kinepna KUMSANG VAIHOPNA (millennial kingdom)  hito aseicheptha hinte. Hinla, Matthew jog hin achomin aseideh poi.

Jesu’n Khangdong mihaopa koma seina ahin VANA LENGGAM  (kingdom of heaven) le PATHEN LENGGAM (kingdom of God) hi amang hallen ahi. Matthew 19 :23 “ Hichun Jesu’n aseijuite jah a ‘ tahbeh a kaseipeh nahiuve, mihao din VANA LENGGAM lutding ahahsai” ati. Hinla, abana chang 24 ahin “ Kaseipehkit nahiuve, mihao PATHEN LENGGAM  a alutsangin, heu bil homa Sangongsao lut abaijoi” atikit e. Hitia chu, Jesu jengin jong VANA LENGGAM le PATHEN LENGGAM hi aman hal lele bou ahi.

Mark le Luke in PATHEN LENGGAM (kingdom of God) atinauva hin Matthew in VANA LENGGAM (kingdom of heaven) atin ahi. Hichu, thakhat ahi hetna ahitai.”

Hitia, kiman halle naho hi noiya hoa hi muthei ahi :-

Matthew 11:11-12  withLuke 7:28;Matthew 13:11withMark 4:11andLuke 8:10;Matthew 13:24withMark 4:26;Matthew 13:31withMark 4:30andLuke 13:18;Matthew 13:33withLuke 13:20;Matthew 18:3withMark 10:14andLuke 18:16; andMatthew 22:2withLuke 13:29. In each instance, Matthew used the phrase “kingdom of heaven” while Mark and/or Luke used “kingdom of God.” Clearly, the two phrases refer to the same thing.

JESU THI CHU NADAMNA DING AHI

Jesu’n tahsa dammo tamtah boldam jongle, leiset’a ahung lona pipen vang chu hahsatna chungnung jocheh boldam ding chu ahijoi. Aman aseiyin, “Keima ‘amangsate holdoh le huhhing dinga” hunga kahi’ ati (Luke 19:10). 
Jesu chu mihem le Pathen kijopmatna kikhensa chu jopmat kit dia hunga ahi. Adeipen chu, Pa to ihinkhom le kihoukhomna sumo’a ‘chonset’ hi sumang ding hi ahipene. Hichu aboldan lampi phapen chu ‘thi-ding’ chu ahi. ‘Chonset’ man pehdan phapen chu ‘Thina’ ahi. Hijeh chu, Ama (Jesu) chu chonset neilou, ‘Ama’ thi ngailou hijongle, mijouse ‘chonset’ man sahlhahna din ahinkho chu aphaltheng tai.
“Mi khat in thupeh anitlou jeh a mijouse chonsea kisim ahibangin, mikhat in thupeh anit jala mijouse chonpha’a sim hidiu ahitai.” (Romans 5:19).
Miphalou phabep in dihlou tah in Jesu chu ahehseuvin, tha dingin themmo achan tauvin ahi. Ajep un, alua ling-lukhuh akhuh peh’un, akhut le akeng cross in akilbeh’un, athidin adalha tauvin ahi. Chuti chun, eiho chonset man sahlhahnan, Jesu chu cross chunga athitai. Athi konchun, O gingtah in asamin, “Akichaitai” ati (John 19:30). Hichu, huhhinga iumna diuva tohding ngaijouse akichaisoh chu aseina ahi. Seijui konkhat in alongdamsa chu cross akonin alauvin, lhanin alupsah tauve. Hinla, Jesu chu lhanin aumdenpoi. Nithum jouvin, athoudoh kittai!
“Christa, chonset neilou chu michonset jouse Pathen kom puilutna din khatveiyin athitai. Tahsa ahi’na chu tha in ana umin, hinla, Lhagao ahi’na in ahing kittai.” (1 Peter 3:18).
Jesu chu ahingdoh kit in, tuni geiyin ahing jing tai. Vana akaltouvin, Pa jetlamin atou tai. (Ephesians1:20).
Tutahhin jong, Jesu’n nave jingin, chonset akona huhhinga na umding angah jinge.

PATHEN LENGGAM

Sept 21,2013 jana Songpijang CC Houina kathusei

A.     ‘PATHEN LENGGAM (Kingdom of God) hi Synoptic gospels ho ahin vel 61 akiseiyin. Hiche tobang hi vel 85 akiseiye.

 ‘Kingdom’  kiti hi Greek thucheng ‘basilea’ kitia kona kila, ‘ THUNEINA CHUNGNUNG’, ‘LENG THANEINA LE VAIHOPNA  (‘Sovereignty, royal power {and} dominion”) kiseina ahi

‘Kingdom of God’ le ‘Kingdom of Heaven’ hi aseimat loi le achomchom hisah jong aum’e.

Matthew 6:11 – Jesu’n aseiye “ Hinla, amasa’n Pathen Lenggam le Achonphatna hol masauvin, chutengle hicheho jouse hi kipebe ding nahiuve” ati. {“But seek you first the ‘kingdom of God’, and His righteousness; and all these things shall be added to you.” (Matthew 6:33)}

Theologian tamtah in aseibangun, hichea ‘Pathen Lenggam’ ati vang hi ‘Pathen mingailutna Jesu Christa  a hung kiphong’ hichu ‘Huhhingna’ hi aseina ahi.

“Amasan, Lhagaova Huhhingna hi kisan masah un, chutile, adang jouse hi nachanthei diu ahi” tina ahi. Hiche hi, Christiante dinga ngaimasapen ahi. Jesu Christa ‘huhhingna’ hi naneiloule ‘Christian jon hilou nahi. Huhhing nahi tengle Pathen in Lhagao Theng napeh a, hiche Lhagao Theng panpina jala chu Pathen phatthei bohna ho nachan thei ding bou ahi’. Hiche hi, Jesu Christa le aseijuite, solchah dang jouse thupipen, Christiante dia ngaimasapen ahi.

 Kitepna Lui veleu hen, Leng David in “Pakai (Jehovah) le Ahatna chu ho’lun, Amai chu holjingjeng’un” ati’(1 Chronicle 16:11){“Seek the Lord (Jehovah) and His strength, seek His face continually.”}

David sei hi, Pakai Jesu hin avelsei, hijala, thucheng chomjep aman ahi. Jesu hin, ‘Pakai’ (Jehova) kiti hi Matthew ahin ‘ Pathen(Elohim) lenggam’ atin.

Chule, “Amai’ kiti hi ‘Adihchamkimna’ atin ahi {‘His face’ become ‘His righteousness’.}

Matthew 3:2- John the Baptist in “Lungheiyun,chonset dalhauvin,Pathen Lenggam chun hikom ahinphatai’ atin (Matthew 3:2),

Themgao Isaiah chun aseina achun, “Pakai hungnading lampi semun, achena ding lampi sem jangun” ati (Matthew 3:3)}

Hiche ahin, John hin Jesu hung le Jesu-a Pathen Huhhingna hung uma, Pathen heloute hin Pathen ahinbel’uva, Pakai le Pathen,Leng le Huhhingpu dia akisanuva, Pathen Lhagao Theng chenna mite le Athupeh nit mite ahung hidiu aseina ahi.

Luke 17:20-21  achun “Pathen lenggam chu nasunguva aume” ati. (Luke 17:20-21)

Hichu, Pathen thu, Huhhingna thu, tahsanna hetna ineithu’u le Jesu Christa jala Lhagao Theng isunguva achen thu aseina ahi. Ajehchu, ‘Huhhinga ummite chu Pathen in Lhagao Theng apeh a, Lhagao Theng in achenpi ahi le Pathen thu nittheina thahat aneijiu ahi(Acts 1:8). Hitia, Huhhinga um mite chu Pathen chate (John 1:12) ahitauvin, Pathen chenna mite, Pathen thuneina-vaihopna mun ahitauvin ahi.

Acts 1:68 (Kjv)  ahin Jesun “ Hichu nangho hetding ahipoi” ati.

Hiche laiya mite chun, Pathen Lenggam le Messiah (Jesu Christa) hunga vaihopna ding angalel’uva, ahetchet nom vangun, ijakai Pathen thu thu ahin, mihemten Ama itahsan’uva, Ama a hinna inei diu bou akhohpen ahin, Aman ipi-iti, itihle ipi abol ding, Pathen kin chu kisahlelpi ding ahipoi, tihi aseinom ahipenin akimui.

DAMNA KISANIN

        ‘Pathen Lenggam’ (Huhhingna nei) a um hi Lhagao damna keu ahipoi. Tahsa damna jong ahi. Jesu Christa hin ‘Lhagao’ bou adamsah ahipoi. Athohna hoa jong inatna hou apoh a athohtha ahi. Ajehchu, tahsa natna jouse jong hi ‘chonset’ jeh a hung um ahi. Hichu, ‘mikhat natna chu ama chonset jeh ahi’ tina ahipoi. Adam le Eve in chonset anabol lhon jeh a leiset ahi Agiloupa vaihopna hung umkha ahi. Hiche, ‘Muthim Lengpa’ (Agiloupa, Satan) hin, mihemte hi hatmosah ding, suhgam ding eitiu ahi. Ajehchu, mihem ahung hatdoh kit khahle ama ‘Leng channa’ hi ilahpeh theiyu ahi ti ahen akichan, eihatmo sah diuva hi, i-i-tahsau hi asuhset nom jing ahi. Mihem in, Asempa Pathen akimu-nile, Pathen mipa lhagao chunga chu Satan thaneina umtalou ahi. Hijeh achu, tahsa chunggeiya jong tha anei theilou ahitai. Ajehchu, Jesu Christa’n Ama tahsante jouse tahsa le lhagaova ahuhhing ahitai.

 ‘Chonset’ jeh a mihem chunga Satan in tha aneiya, tahsa jong asuhgentheiya, natna chom chom asosahji ahi. Hichu, ‘tahsa natna’ hohi ‘chonset’ jeh ahi, chonset umjeh a ‘natna’ uma ahi. Pathen in mihem khat chu achonset angaidama, chonset thaneina akona ahuhdoh tengle atahsa le alhagao chu Satan vaihopna akona huhdoh hija, atahsa le a lhagao jong damna changjia ahitai. Hiche thu hatchet theina dinga chu, Jesu Christa chun, mihem chatmopa ( paralyzed man) chu “Lungdong hih in, na chonset akingaidam tai” (Matthew 9:1-8) atile dam jenga ahi.

HETDING: Adammo hohi ‘huhhinga umlou’ tina ahipoi. ‘Huhhingna’ chang jouse atahsa jong dam ding tina ahiseh poi. Pathen thu thu ahi. Hinla, huhhingna change jong tahsa dammo hohi Pathen in adammopa dia phajoa agel hithei ahi. Pathen in agelkhohpen chu ‘Lhagao damna’ bou ahi. Hinla, tahsa natna neiya manthei hilou jong chu Pathen in Ama ‘Lhagao theng’ chenna ding ahile, adamsah a, ahoilou jong asemhoi jengthei ahi. Hitia, um ho chu Pathen in amannom ho ahiteiye. Na atohtheina dia tahsa manmo chu abdamsah a, damna le hatna apeh a tohdia agon hochu atohsahji ahi.

HUHHING IN NA UMTHEIYE

       “Koihile Pakai min kou chan chu huhhinga um ding ahi” (Romans 10:13).

Mihem apha chamkim aumpoi. Mimal tin hi chonset akona huhhing ngaicha cheh ihiuve. Bible sei chu,

“Chonset man hi thina ahin, Pathen in i-Pakaiyu Christa Jesu-a eiho manbeiya eipeh’u vang hi tonsot-hinna ahi” (Romans 6:23).

Pathen in Achapa eiho chonset jeh a thidia ahinsol hin eiho huhhinga iumna diu lampi eisempeh’u ahitai.

“Pathen in vannoi(mite) angailut behseh jeh a Achapa changkhatseh (Jesu) chu ahinpeh ahitai. Koi hile Ama (Jesu) tahsan chan chu mangthah talouva, tonsot hinna anei ding ahitai.” (John 3:16).

            Pathen hi ‘Theng chamkim’ ahin, Ama umna achu ‘chonset’ um theilou ahi. Ama kom ilhun masanguva, ichonset jouseu athensoh ngaiya ahi. Jesu’n aseiye,

 “Nakikhel heluva, chapang neocha ho bang nahilouvule Vana Lenggam chu nalut louhel diu ahi” (Matthew 18:3 - KJV).

Chonset hinkho hi dalah’a, Pathen dia hinkho iman tei diu ngaiya ahi. Chapang neocha hon tahsanna lhingset anei banguva, chapang tahsanna neiya Pathen hi itahsan diu ngaiya ahi. Aman eingailutnau photchetna a, chang dia lom ihilou vanguva, Achapa Jesu chu eiho huhhingna dia ahinsol ahi.

“Pathen in eiho eingailutnau photchetna eivetsah nau chu hiche hi ahi : Chonse ihilai tah un, Christa chu eiho din ahung thitai” (Romans 5:8).

            Jesu bou hi Pathen heng lhuntheina dia lampi khatseh chu ahi. Bible in aseiye,

 “Pathen khatseh ahi. Chule, Pathen le mihem kah in Palai khatseh aumin, hichu Christa Jesu, mijouse lhatdoh nadia achamtah a hung kipe chu ahi.” (1 Timothy 2:5 6).

Mihem thilbol theina a huhhinga iumtheina diu aumpoi. Eihon huhhingna hi ikilamdoh theina diu umlouhel ahi. Jesu Christa itahsannau jal, le Pathen in eikhoto(lungset) jaluva bou huhhingna ichantheiyu ahi.

“Tahsan’a akona, khotona (lungset) jala huhhinga um nahiuve, chule, hichu Pathen in manbeiya apeh ahi; chule, natoh vang ahiloujeh a koima kisonpithei ahipoi” (Ephesians 2:8 9).

 Huhhingna hi Pathen in manbeiya eipeh’u ahi. Manbei thilpeh nachanteng, nathum ngailou, aman napeh ngailou, kisan ding bou chu nakin ahi.

            Koihile, Jesu hi Pakai dia kisan jouse chu Huhhinga umding ahi. Jesu’n aseiye,

 “Lenggama din kalemuve,Keima kot chu kahi, koihile Keiya kona lut chan chu huhhinga umding ahi” (John 10:9).

Jesu’n aseiye, “Kot ahin kadingin, kot kakiuve. Mi khattouvin ka O ajah a, kot ahonle, Ka lut a an kanehpi ding, chule, aman Kei-to aneh ding ahi” (Revelation 3:20).

 Jesu hi nalungkot nahonpeh-le, Pathen-to kijopmatna nanei jengthei ahi. Akouna nasan phatphat-le huhhinga naum jeng ding ahi.

PATHEN LENGGAMA HUNGLUT IN

THUMAKAI 1na.: Pathen het in Leiset ahin Lenggam nibou aum e – Pathen Lenggam le Satan Lenggam ahi. Pathen Lenggam hi  Vah, Hinna, Damna, Hinnopna, chule Ngailutna dimset jeng ahin;  Satan Lenggam vang hi Muthim, Chonset, Jachat le jumna, Natna le gim-hesohna, Hatmona le Lhahsamna, chule Kiseiset le kithettona dimset jenga ahi.

Hitia hi, mihem jouse jong hi hopni a kikhen jeng ahi. Khat a hilouse chu, khat joh a hijeng ahi. Mijousen, hoijoh a aumding chu, akilhen cheh ding ngaiya ahi. Nangla, hoijoh nalhen em? 

.Pathen Lenggam nakilhen joh-le kipah aum e, hiche lekhabu hi nasimdia kijih ahi. Jesu Christa hi nahinkhoa Pakai dia nakisantah-le ‘Leng cha’ (Pathen Cha) chu nahitai. Pathen hi napa ahin, Jesu Christa hi na sopipa ahitai, chule, Pathen Lenggam-mi (citizen) nahitai.

“ Ajehchu Ama (Pa) chun muthim thaneina hoa kona eilhatdoh’uva, Angailut Achapa Lenggam sunga chu eipuilut’u ahitai. Ama (Chapa) a chu  lhatdamna, chonset jouse ngaidamna ineiyu ahitai.”(Colossians 1:13-14).

            Hiche Lenggam thudola hin agam miten ahetchet diuva ngaikhoh thu tamtah aumin, hichu hettheina dia hiche lekhabu hi kigong ahi. Siminlang, ‘Hinnopna Bulhingset’ mangin. (aban sim jomin.)

TAHSANNA HI VAN CHABI AHI

Kaseinompen le huhhingna changsa jousen ihet diu akhohpen khat chu Cross thu hi ahi. Pathen thun,

“Thingpel (Cross) thu hi amangthah ho dia ngolkaitah ahin, huhhinga um eiho din vang Pathen thahatna ahi. Ijeh-inem itile, Pathen lekhabua kisun chun,

“Keiman miching ho chihna kasuhmanga,

Hetthemna neiho hetna moh kahisah ding ahi,” ati

 Miching hoiya uma, lekhathem hoilam ham? Tukhanga minel them hoiyaba um ham? Pathen in hiche vannoi chihna hi ngolna ahisah lou ham?

Ijeh-inem itile, Pathen chihna a hin hiche chihna vannoiyin mangcha a Pathen ahetdoh theilou phat in, ngolkai thua kigel hiche thu kiseiphong tahsan ho joh huhhing ding hi pha asai.” (1 Corinth 1:18-21)

Cross hi michonsepen kithanadia kisem ahin. Vannoi huhhingpu Jesu Christa’n alhenna chu, Pa’n asolna lhinset a asana, michonsepen jong huhhing thateina dia Cross Jesun alhen ahi. Hichu, kineosahna chungnungpen le thohna gimneipen ahi.

Ama tahsana, anungjui jousen, chonsetgal ijotheina diu chu – Cross kaput jingding ahi. Hichu, kineosah ding, thohhatding, thua nunding, Pathen thupeh nitding, mijouse, achonsepen jong ngailut ding tina ahi. Hichu, leiset chihna dia ngolkai ahi. Melma gei ngailut ding chu Mihem geldia ngolkaitah ahi. Chule, michonse ngailut ding jong chu ngolkaitah ahi. Hinla, hichu ei Huhhingpu’u Pakai Jesu Christa delpen chu ahitai.

Houlamkai hihen hou lama kipedom hon ‘Thenna hinkho, chondihna, chonphatna hinkho’ ti ahaseiyun, aphai. Boldingmong ahi. Tahsa le lunggel then ding, chonna then ding chu Kipana Thupha to kitoh ahi. Hinla, hitia umho chun, athenglou jep, ahatmojep hochu mudana, musitna, thetba le seiset-oimo boljijeh in hitobang miho chu amaho le amaho akikoikang un – jahcha kisa in Houin lam le Pathen thu ngaina in jong lungmongin ahunglhatheiji pouvin ahile Pakaiya tonsot hinna hi amukhatheiji pouve.

Hijehchun, ahatmo le athengloujep hojong hopthana din Pathen mingailutna hi hasei jouhitin, ‘Achonsepen jong angailut ahi’ tin hasei leuhen, ahatmo, athenglou ho, agenthei- tolom petheilou hojong hunguntin, Pathen thu hungngaiyuntin, Pakai chu akisan tengule, Pakaiyin,

“Lhagao Theng chu ahinpeh niteng chule, then theina thahat, tolom pehtheina dia phattheibohna, nun le khanna thenna le phatna chu petante (Acts 1:8 a kimu bangin). Chutengle, ahat le atheng iti hou sanga ‘Pakai thahatna chun hatna lhingset  apeh’uva’ ahatpen hung hithei ahiuve.

Hiche hi natahsan em? Jesu natahsan em?

Hiche hi Jesu thusei ahi “Lhagao theng chu nanghoa ahung umtengle thahatna nanei diu ahi”(Acts 1:8)

Jesu natahsan a asei hohi natahsan loule, ipi-itiding nati ham?

Bible in thilkidang umding le amanchah hon jong aboldiu tia asei hohi tahsan joulou-le thildang aseina hidia gel HOU LAMA lamkai jeng jong aum chetchut in akihei.

Chapang neochan, apa bajar lam jon koma chun,”Hepa, ijemtia sum naneijengle, changlhah neihin chohpeh uo” atipoi, chute hilouvin, apan iti jongle chotheiyinte tia tahsanna lhingset neiyin, “Hepa, changlhah neihin choh peh uo” atiji. Hitia asei chu, ginchatlelna beihela atia, apa amukittengle aneh jengdia atahsan ahi. Apan jong acho teiji. Sum anei lou jongle bat in beh alahpehji.

Nanginla, nataotengle, “Pakai, ijemtia nakidatthei jengkhat-le kangaichat hi neibolpeh uo” nati jeng em? Chuti chun tikhel hih jonglechun, natahsanna chu alhinset loule, hitia chu nati bangbang ahi.

‘TAHSANNA’ hi ‘CHABI’ ahi, Pakai kom ibelnauva hi.

Kakinem e, tahsanna lhingset nanei ding chu. Pathen tenan ‘itahsannau’ lhingpoute. Hinla, tahsan poupu jengutin, Ama a kingaiyin nganse jengute.

NAKIPANA CHU PHONGDOH IN

Matric result lah a, hoikeicha hung lolhin vang chu – im ahahsai. Min eidohlou jongle kiseinom nom jeng ahi. Result lah jouva inlam hinjot chu – tol akichotkhah lam jong kihelou – huiya leng kibang jeng ahi!

Seldingpen khat chu ‘Underpant’ ahin. Numei chapang neocha khu ‘Underpant’ thah chohpeh lechun, anih don duhdahlou, hompenga tou nom jingjeng ahi – hichu ‘athah’ chu mi amusah nom jal ahi.

Israelte chun kum tamtah Messiah hungding chu kinema anganga jengu ahi. Hahsatna tampi atoh un, soh in kaimangin aumun, bolgimna tamtah atoh un, ‘Itih-le Messiah chu ahungun, suhlinghoi hilou Lenggam chu ahintungdoh in, soh akon eilhadoh un, nomtah in hinkho akimang dem’ tia ngahlel ahiuve.

Nikhat hi Jesu avalepet in Samaria kho koma tuikul komahin akicholdoi. Numei khat amun, thu kidang tampi aseipeh in, AMA  Messiah ahi thujong aseipeh in-

“ Hichun Jesun, “ Kei, nakoma thuseipa hi Ama (Messiah) chu kahi” ati.(John 4:26)

Hichun,  Amanu chu atha anomval jengin, miho seipeh kal ngahlel in, “Atuikhaina bel chu tuikul koma dalhan, khosunga alhailut in, mijouse aga seipeh tai." (John 4:28). 

Nang jong Jesu Christa Huhhingna nakisan nia nakipaje chu seikal nangahlela nasei ding jong katahsan e. Keivang tuni geiyin kaseichim theipoi. Chule, chute ding mong ahi. Hitobang kipana thu, nunlui le mamot mot a hinkho kimang, kinepna lhing neilouva, kiginmona kineijing. Ikhat ibol jongle akilolhing nadem tia tahsanna det kineilou. Dammona inei jongle dam ding le damlouding kihelou. Itaona jong asanding le asanlouding kihelou. Hinkho kipah le lungmonga kimang theilou. Hicheho jouseh eijopeh ding, chonset thaneina jousea kona eihuhdoh a tua le tonsot geiya kipahtah a Pakai-to cheng khomthei dinga Pakaiyin eitepehnau kichehtah a kihetdoh chu iti kipahlouva ki umding ham? Hitobang kipana chu koiham a imthei ding? Koiham seikal ngahlel louding?

Chule, hiche Kipana Thupha hi ‘imding’ hilouva phonjal ding mong ahi. Hichu, Pakai loupina, A Ngailutna thu seiphongna ahi. Chule, hitia kiseiphong chu ‘Jesu Christa’ hi  miho lah a phondohna ahi.

Ijemtia, hichu naphahlou laile, tuhin kunin taovin. Jesu chu kouvin. Na Leng le Huhhingpu hung hidin kouvin. Aman nasan ding, na huhhing ding, kipana kemtih ngailou napeh ding ahi.

Miho ve hih in. Houbung lamkai hojong ve hih in. Bible het le thepman, houin kaihat man, mipha himana le thilpha bolman a Huhhingna hi chanthei ahipoi. Natahsan tahtah miho jong chu chang loulai himaithei ahi.  Pakaiyin anopnop Leng ahisah a, anop nop anomnom ahisah ahi. Lamakiya atun mana chu Pakaiya (huhhingna chang) hija ahidehpoi. Pharao Lengpa Pakaiyin amangchan, Israelte bolchah din Pakaiyin apansah e. Hitia chu Pakai manchah ahimana ‘huhhinga uma’ ahidehpoi.

Amasan nang ding kigel in. Nachantengle miding nagelpeh le napanpi ding dan chu Pakaiyin Lhagao Theng thahat a nahin bolsah ding ahinai. Bible hi niseh in simin, tao jing jengin.

Pathen hi iti nahet em

1.PATHEN HI

Pathen hi thaneichungnungpen, lei le van sempa ahi.

Bible in aseidanin Pathen bou hi kichaitih neilou,chule  tonsot mi, abul le apatna neilou ahi. Pathen hi thiljouse Sempa le chingtup, athua nunsahpa. Ama hi hetna chungnungpennei le kidihna lhingset a lei le van a vaihompa ahi.

 “Ama hi ‘Hinna’ ahi jeh a, ‘Hinna’ hung konna  Ama bou ahi.” (John 5:26)

Bible in Genesis 1:1 ahin, “ Atilin Pathen in Lei le Van ana sem e” ati.

2.Bible seidanin, PATHEN HI  :-

1) LEI le VAN le asunga thil kisem jouse SEMPA ahi (Genesis 1:1-27)

2)“NGAILUT ahi”  (1 John 4:8),  

3) “VAH ahi”  (1 John 1:5), 

4) “LHAGAO ahi” (John 4:24), 

5) THILJOUSE HESOHPA  ahi (Psalm 147:5),

6) THANNEICHUNGNUNGPEN ahi (Revelation 19:6),

7) MUNJOUSEA UM ahi (Psalm 139:1-10).

3.Achomlama seidin, PATHEN HI

Mutheilou;Lhagao; Tonsot mi; Tonsot apat umjingsa; apatna le ajona bei ahi. Lei le Van, thiljouse chunga thuneina nei, thahat chungnung, thunei chungnungpen ahi. Achingchungnungpen le thiljouse hesoh ahi. Chule, Pathen hi mihemte chonset akon Huhhingpu Jesu Christa hung konna ahi.  

JESU CHRISTA INNING KHOMPIPEN

“Solchah ho le themgao ho kiphuna a kiphutdoh, Christa Jesu inning khompipeh hina a”, (Ephesians 2:20)

Jesu Christa hi ‘hi INNING KHOMPIPEN – ‘In’ tobanga kisei ‘Houbung’ a khompipen ahi. Ama bou hin jatchom chom ajopmat ahi - Judate le chiding-namdang, numei le pasal – alhenchom mithengte jouse, akhang akhanga ahinjopmatpeh jing ahin; hiche IN gongso hi khat bou, tahsanna a kitungdoh, tahsante jouse aumkhomnau chu ahi.

‘Houbung’ kiti hi ‘Jesu Christa huhhingna changsa ho’ kiseina ahi” (Romans 16:5)

‘Tahsante’ hi ‘In-tobanga kiseiji ahi. In’a mihem achen banga, ‘Christa tahsante’ sunga hi Lhagao Theng chenga ahi. Jesu Christa chu Leng le Huhhingpu dia nakisan tengle ‘Lhagao Theng chu nanga chenga, Lhagao Theng dinga chu ‘in’ nahi ahitai.

Chule, Lhagao Theng chu nanga achentengle ‘hinkhothah’ naneiding ahi. Chutengle, nanunlui, aphalou jouse chu nasuhthengpeh a nunthah, kipana,thenna, lhamonna, lungnenna, kinepna, ngailutna le hepina neimi, mi lolhing le tohgapha nei nasoding ahi. Pathen thahatna (Lhagao Theng) chenna achun thilthenglou aching theipoi, Aman jolel aneipoi.

INNING KHOMPI beiyin inpha akisadoh ngaipoi. Jesu Christa umlouvin, Lhagao Theng chenna akisoh theipoi.

Jesu Christa neiya Lhagao Theng chenna nahitah ding kakinem’e. Nitinin Bible siminlang, phat jousen tao jingin.

PAKAI NGAHJINGTE NUNNOPNA

“Kenvang Pakai vejinging ting,

eihuhhing ka Pathen kanga jingding ahi;

ka Pathen in kataona angaitei ding ahi.” (Mica 7:7)

Pakai nga hi Ama phattheiboh channa ahi. Ama ngahte chu Pakaiyin aumpi jingin, angaichat jouseu, apha ho chu, apejingji.

Nungah kichu khanglaiya chun, Keima mudolin -

 “Ngah hat in lungnengin phunlouvin” ti bolpa chu changpen ji e.

Lungneng pana, ngahhat hi natoh molsona pipen khat ahi.

Pakai vaihomna jong hi ‘Ngahat’ angaiye.

Tao tao jengding ahi. Tanglouva, gunchu tah a. Eipeh tokahse thum thum jeng ding ahi. Alhacha, ahinga vana alahtou, Themgao len Elija bon vel sagi atao Pakaiyin anga hilou ham?

Nang le kei koi i-hija Pathen chu eini thuthua i-nunsah got a, i-thum thum chu eipeh jeng dia i-kigel khah ham? Ina kigel sang valjiuva Pathen chunga lunglhailouna nei banga i-umjiu ahi.

Chule, Pakaiyin, mihem ngaichat jouse apepoi. Adiuva pha ho bou apeji. Mihemin apha itihou atamjo hi khonunga dia phalou atamjin; hicheho chu, angailut miho chu Pakaiyin apejipoi.

KHONGBAI BANG IN KIPAH IN

Nao donnu : “Khongbai yo, Lam tahih o, kanao a ih-mu theipoi.”

Khongbai : “Kahinkho Lhathum bou ahi. Ka hinlai chomcha sunga hin Pathen vahchoinan lamjing jeng ding kahije.”

Paul : “Pakai chunga kipah thanom jingun.”

Philippian : “Ka kipah theipoi. Kato le kachan hohi koima kipana jat ahipoi.”

Paul : “Ahipoi. Kipah jengin. Pakaiya chun kipah thanom jing jengin.”

Philippian : “Sei da to.”

Paul : “Sei kit jenginge, kipah thanomin.”

Solchah Paul in eihilnau chu, “4-Pakai chunga kipah jingun. Tikit leuvinge, kipah un.” (Philippians 4:4)

Pathen in mihem’a nasem jeh in kipah in. Hinna napeh jeh in kipah in. Nu le pa ahiloule midang don le seilet a na umjalin kipah in. Damna nanei jalin kipah in. Neh le don ding napeh jeh in kipah in. Pathen lungdei nahung hidohthei kitna dia na hinkho akoi nah lai jalin kipah in.

Pathen in nachunga na kidang atohho gelkhomin. Ase le na vangsetna lam chu sumilin, apha napeh sese sutoh in. Nangsanga chan phalou chang hoto kitekah inlang, hichan thilpha napeh jalin Pathen thangvah in.

Pathen in kipaje heho akipapin, akipana diu abolpeh nom jinge.

Mi phunche nadei em? Na lungsunga nakipalou, nalungnat, chan vangse nakisah a lungnat nabol chu Pathen na oimona hilou ham? Pathen oimo poute. Eibolpeh’u nasatahtah ho – hinna le damna eihon i-kipeh theilouvu eipeh jal jenguva jong hi kipa ding, Pathen thangvah ding ahi.

Hichu bolin. Ven, nahinkho kikhel dom doma, damna, kipana, lolhinna nahin nei jeng ding ahi.

MIHEM A NAPEN LONA IPI HAM

Ipi dinga Pathen in mihema nasem ham tihi nagel khah tah em?

Pathen in vohcha, ahcha, uicha hama nasemlouva, mihem hija nasem hi mohmaiya donlouva koi jeng nagot ham?

Meding in ache nachon, honding nati ahinai. Na at in konga nakoitai.Chu in, Meichunga bel nasong tai. Na hetloukah in na medinga na at anche chu, achamin, thuh chunga kisong belsunga chun galut henlang, achamin anakilhah in, anaki hon-le; i-nati nadem? Na kipah dem? Ole, nalung ahang dem?

Kei gelin vang, thilha, lhagaoboh, lhadam bolin gelinatin, na ngam po’nate kati.

Anche chu me-a hondia nachoh ahi. Hinla, nangin belsunga nalhah dia nakoi bou ahi. Hiche anche bon nagon banga media achama akihon mana nakichat le nakidah ham ahithei-le, gelin. Pathen in, lungtup khat neiya mihema nasem ahi. Nangman, nasempan ipi dia nasem, ipi le itobang dia nasem le nagon jong kihetlouva na nopnop a nachon chu, Pathen in ipi agel dem?

Pathen hi lungdong, lunghang lou ding ham?

Lunggel-ngaituona neiya nsem ahi ngal’e. Hijeh achu, nasempa lunggel, lungdei le lungtup chu nagel ngaiya ahi. Achutiloule, nadonda ding ahi. Nadonda keu hilouva napaimang ding ahi.

Hitia, ei sempau donlouva, inop nop’uva i-um’u, ichun’uva, hinkho iman’u hi Bible in ‘chonset’ tia asei ahi.

Eihon ‘chonset’ hi ‘mi tha (toltha)’, ‘jukham’, ‘khamnathei louneh’, ‘guhchat’, le thilse mongmong ho bol bou hi chonset in i-gel’un ahile, Pathen thu i-he chentheipouve. ‘Chonset’ hetthemlou jeh in, Pathen thu Bible in ‘chonset ngaidam thumding’ atihi, mipha (thilseval bollou) hon Pathen ngaidamna le ngailutna hi aching thei pouve.

Chonse ahi kihetlou jeh a, ngaidam thumlou mitamtah –adeh a miphadom ho, chule, Houlamkai –Bible sima Pastor, Evangilist hung hiho tamtah in Lhagao Thilpeh achangthei pouve. ‘Retire’ (tohna hai) geiya pastor, Solchah, Houbung lamkaiya panga, thu jong themtah le sangtah tah a seiya, hijala, ama thuseiya kona mi khat jengin jong Pathen Lhagao thilpeh – huhhingna le Lhagao thilpeh chom ho chang umlouhel- tampi uma kiseiya ahi. Ajehchu ipiham, amatah jengin jong Bible sei ‘chonset kiphonna le ngaidam thumna neilouva uma, Lhagao thilpeh changlou chun, iti miho huhhingna sannatheiya thu seidohtheina anei ding ham?

Pathen hi lhagao ahi natahsan’e. Athu jong lhagao thu ahi natahsanai. Hinla, Lhagao Theng ipi ham hechenlou Christian tamtah aume. Chule, Pathen thu hi, Pathen Amatah in ,semtila pat a ahinseiya, miho hetsah dia Themgao ho ahinseipeh a, hichu kisei sonpeh ahi. Themgao hi ‘Pathen thusei lhunna le nganse khat’ ahi.

Tukhanga ‘Themgao’ aumpoi tia gel atam’e. Min hi ‘Themgao’ tia kimang ahitapoi. Jesu Christa huhhingna chang jouse chu Lhagao Theng in aumpia, Lhagao Theng chun, achennapa/nu chu Pathen thu ahinseisahji ahi. Hitia, Lhagao Theng manchah jouse ‘Houbung mi hochu’ Themgao hija ahitai. Hinla, hiche hoa kon jong chun ajoujaiyin Lhagaovin thu ahinseidoh deh jipoi. Hinla, hitia Lhagao Theng chenna hochun, phatecha taona manga Pathen thu hi ahinseidoh tengule, Pathen Lhgao Theng chun phatthei aboh jia, akiseidoh Pathen thu hochun miho lungsunga thu aseiya, angaiho chu Pathen phatthei bohna changji ahi. Hitia chu, mihon Jesu Christa huhhingna chu akisanjiuva, ama hoa chu Lhagao Theng chu chengjia ahi. ( aban olle seiding)

Pathen in mihema nasemlona nakihet-le, alungdei, nagondol banga na um, nachona, hinkho Ama dei le gonbanga nachon theina din panpina thumin tao jingin.

 Na kihet loulai ahile, taovin Ama dong jing jeng in. Hichu nakihettengle akipahpen, alolhingpen, Pathen phatthei bohna lhingset chang ding nahi,

PENTHAH A LHAGAO THENG NEI ANGAIYE

Pathen in phatthei naboh henlang, kipana chamkim le lolhinna thah nape hen.

Pathen in alhendoh Abraham chu chabei ahin. Asohnu-to acha Ismael vang aneiye. Ajinu-to cha aneiloule asohnu cha Ismael chu gou lodia uma ahitai. Hinla, ateh nungin, Pathen akon in Isaac ahin neitai.

Isaac apen phat a, Ismael chedohtei ngaiya, chedoh jenga ahi.

Chonset thisan-guiya peng ihiuvin, chonset-lunggul le chonset-nun chu eihoa uma ahi. Hinla, Pathen chonphatna, thenna jouse kimsoh Jesu Christa chu eihosunga hung achenteng, i-miluiyu(mihem hi’na chonset) chu chedoh jeng ji ahi.

Genesis 21:1-14 chan beh anasimin. Ismael chu mihem lungdeiya sohnuto Abraham in ahin achapa masa ahi. Isaac chu ajinuto ahin, Pathen teppeh cha ahi. Itiba,mihem deiya adihlouva kihing sohnucha chun Pathen cha chuto gou alo khom thei ding ham?

Eiho ipenuva lhah, mihem lunggul (chonset) hin i-hinkhouva vai ahop ahin, Pathen Cha Jesu Christa chu tahsanna Leng le Huhhingpu dia ikisan tengule, eiho milui (Chonset) chu chedoh a Pathen Cha Jesu Christa chun eiho hinkhoa vai ahopji ahitai. Hiche hinkho chu ‘Hinkho thah, penthah hinkho, lolhinna le kipana hinkho’ ahiji. Hinla, hiche ‘Hinkho thah’ chu change kipanathah i-nei joutengle, ‘Lhagao Theng’ eihoa ahung chen ngaiya ahi. Lhagao Theng chu ahung chen tengle bou ‘Thahatna’ eipeh’u ahi. Hiche ‘thahat’ chun, chonset eijopeh jiu ahi.

‘Ka pengthah tai, kana kilhan ahitai’ natitheiye. Nakilhan chu aphai. Kilhantei ngaiya ahi. Hinla. ‘Pathen tha-hatna’ ‘Lhagao Theng’ chu nanga ahungchenloule, nalhuh kitji ahi.

Na penthah a, na lhuhkit em? Lunglha hih in. Kilhan thah jengin. Na kilhantengle, bohden hih in. Thaovinlang, lamjot in. Lhagao Theng chu thum jing jengin. Keima kana chandan themcha cha kasei ho chu geldoh in, chule, simkit in.

Hiche ‘hinkhothah’ chu naneitah em? Nanei loulaile, napeh din Pathen koma taovin.

MINGOLIN BOU PATHEN AMUTHEIYE

“Vo Khongbai, Lam lam ta’hih uo, kanao a ih-mu theipoi !”

Khongbai : “Lam tading’e. kahinkho lhathum sung beh hin, Pathen vahchoiyin Lam’ing e !” tia kisei thusim neite ihiuve.

Pathen Lhagao Theng in ei umpiuvin, lha masa sungse se le tua Kisuhhalna programme in ei hin phauvin, ka lam lam jeng’uve.

Aji’n adalhah a lunghel hinkho mang – Nu khupngamnu, nu Chonglhingnu le nupi adang ho; chule, ja-umtahtah Pa Ruthpa te ho, mihem mudia ngolkaitah a, ahung lamjiu hi kakipana achimtheijipoi. Keima lamthei mong hih jongleng, kaboltheisun, khut bengin, la sa’n kakihot hotji.

Ka thuseiji “Pathen Lhagao thudol’a hi ngolthut angaiye. Mihem chihna hi Pathen dia ngolkai, Pathen chihna hi Mihem dia ngolkai ahi. Mihem hi’na dol’a i-ngolthutloule Pathen Lhagao Theng akichangtheipoi” tia kasei hi Houbung lamkai, adeh a Pasor Satkaipa tehon ahin heuivin, aseijing taove. Pastorpu jong aloinu’n adalhah nia pat lunghelgeuva um ahin,tunvang, alamtheilou vang in, akhut abeng in la asachim jipoi. Kum upa tahtah hitia Pakaiya kipah a aum’u hi imu jongle kipahna thah kinei jeng ahi.

Adeh a aji’n adalhah hohi Pathen Lhagaovin aumpi pat tengle, thini geiyin, aji khel un aum jitai.Loupina Pakai chang tahen.

Bible in aseiye :

“18-Thingpel thu hi amangthah ho dia ngolkaitah ahin, huhhinga um eiho din vang Pathen thahatna ahi. 19- Ijeh-inem itile, Pathen lekhabua kisun chun,

“Keiman miching ho chihna kasuhmanga,

Hetthemna neiho hetna moh kahisah ding ahi,” ati

20- Miching hoiya uma, lekhathem hoilam ham? Tukhanga minel them hoiyaba um ham? Pathen in hiche vannoi chihna hi ngolna ahisah lou ham?

21- Ijeh-inem itile, Pathen chihna a hin hiche chihna vannoiyin mangcha a Pathen ahetdoh theilou phat in, ngolkai thua kigel hiche thu kiseiphong tahsan ho joh huhhing ding hi pha asai.” (1 Corinth 1:18-21)

Hijeh chun, leiset chihna le themna donlouvin, angola bangin Pathen holing, nitinin phat chomkhat beh pedoh inlang Bible simjin, chule, amun le aphat ti umlouvin – na lamjot, natohpet, ipi nabolpet jongle tao jingin. Chutile, Pathen chihna chu nachana, Lhagao theng tha hatna nachan ding ahi. Chuteng kipah jing tanate.