Pentecost ni

Pakaiyin, insungmite, loi-le-gol’a eipeh jouse tuni Pathen Lhagao Theng kisancheh ding le achangsa jouse semthah a i-umcheh diu kataona ahi.

Tuni hi ‘Pentecost’ ni ahi. Jesu Christa’n, atahsa chunga mijouse chonset apoh tah jehchun, chonsetbeh atahsa chu Pathen in cross chunga chonsete khut mama’n akhenbehsah tai. Athi in, lhana vuiyin aumin, vouchompu in kaithouvin aumtai. Chonsetgal ajouvin, Ama nungjui jouse ‘Pathen chate hitheina tha apen’, tonsot hinna aneithu’u phongdoh in, Vana lah touva aumtai. Ni 50 jouvin, Ama tahsante jouse - ‘puidih, hilthem, lhamon ding le Pathen lungdeilam hinkho mantheina lama kaihoi dia- Ateppeh Lhagao Theng apehni ahi.

Hiche Lhagao Theng hi eiho sunga achentengle, ihinkhou, chonna le lunggel hi hung kikhel jingjenga, i-hetlou kah’uva, Ama lungdeilam chu ana kinei domdom ahi. Hitia hi, Bible in aseibanga Christa nunchanjom chu ihung hidiu ahi.

Lhagao Theng chu nathumle ‘Amen’ jih in. Pathen in napanpi jing tahen.

(simbenadin ven < http://jesua-hinna.blogspot.in/ Lhagao Theng hi Pathen thahatna ahi /> )

Lhagao Theng hi Pathen thahatna ahi

Golte, Pathen in phatthei naboh jing nadin, Jesu minin nataona jousea  Lhagao Theng thahatna chu thum jingin!

Lhagao Theng hi Pathen thahatna ahi. Hiche Lhagao Theng hi Jesu Christa Leng le Huhhingpua kisan jouse Pathen in apeh thahatna chu ahi – tahsante  pan-hu, puidih ding, hilding le lhamon dinga apeh Pathen thahatna chu ahi.

Pathen in atoh ding jouse hi Lhagao Theng a atoh ahi imu’ve. Semtilin, “Pathen Lhagao chu tuipi thim chunga avahlei “ tin Genesis 1:2 achun akimui. Chule, Pathen in, "Eiho lim bangin mihem sem’ute" tin Genesis 1:26 achun aseiye; hichu, Lhagao Theng chu Pathen ahi kiseina ahi.

Tahsante jousen  Jesu Christa hi Leng le Huhhingpu dia akisan tengule, Lhagao Theng thahatna chu akisan jiu, changjiu ahi. Romans 8:11 achun, "Thina akona Jesu kaithoupa Lhagao chu nanghoa achenvangle, thina akona Jesu kaithoupa chun, nang ho jong na thithei natahsau chu Ama Lhagao nasunguva chenga kona chu hinna napeh diu ahi" tin aseiye.

Chule, Lhagao Theng chu Jesu Christa’n, anungjuite apeh ahi akimui. Thina akona athodoh jouva, seijuite akimupi chun

‘Hichun, Ahaina-hu chu amaho alhakhumin, "Lhagao Theng kisanun. Koitobang mi hijongle, achonsetnau nangaidam’ule, ngaidam chang diu ahi. Nangaidam louvule vang, ngaidama umlou diu ahi" ati (John 20:22-23).

Ahile, nangin, Jesus Christa hi Leng le Huhhingpu dia nakisana Lhagao Theng chu nachantah em? Nasantahle, Pathen thangvah pumin, adeilam hinkho mangjing theidin, phattinin, Lhagao Theng thahatna chu thum jingin.

Nachan loulaile, tutah hin, kisan jengin- Dilsunlang, Jesu chu kouvin, taovin-

“Pakai, chonse kahi, neingaidamin. Kadinga genthei hesoh nathoh’a, Cross geiya nahungthia, thina le chonset thahatna jouva nathokit’a  Pathen-to chamna neisempeh’a, ‘Hepa’ tia kouthei dinga ‘Cha’ neisokit tah jalin kakipah e. Tuhin ka Leng le Huhhingpu hung hijengin. Chonset najona thahat chu neipenlang, nanga um tonsot hinna chu neichansah in. Ka hinkho hi nadeilamin neipuiyin, nathun neinunsah in. Nadeilama eipui, eihil ding le ei lamkai jing din Lhagao Theng chu neipen tia eihuhhing ka Pakai Jesu naminin kathum’e, Amen.”

Hitia chu nataole ‘Amen’  jih in. Pathen in phatthei naboh jingtahen.