PATHEN NGAILUT NAHI

            “Pathen hi Ngailut ahi” (1 John 4:8).

Pathen in nangma nangailutna kidanje thu hi semtila chu kipan ahitai. Bible in aseiye,

“Semtil chun, Pathen in van ho le leiset anasem e.” (Genesis 1:1).

Pathen in gol ding, avalepi ding le akihoupi ding gol ana ngaichai. Athilhet ho seikhompi ding le Ama houdin gol phatah semdin agel lhutai.  

            Pathen in, agolpa din chenna ding inmun nomtah agonpeh in, leiset asemin, Nisa, Lha le Ahsi ho jong asemtai. Huilah a lengle din Vacha ho,sahem le louhing (thing le go) jatchom chom asemtai. Ngailutna neitah in Molsang tampi le gomtong (vagom) gongchom chomin asemdoh in. Ol ola mudoh thei din, Sana le Songmantam jatchom chom leinoi sunga akoitai. Athilsem jouse chu kitupchet le hoikei ahisoh phat in, aveching ding le achunga thunei-vaihom din Mihem ahin semtai. Thilsem dang jouse hi Pathen in thu apeh tho (thu aseitho) a hung umdoh ahiuvin, Mihem vang hi Pathenin Ama ‘Mije’ (mi-hi’na) neiya asemtho ahi.(Genesis 1:27).

            Mihem masapen chu Adam ahin, chule, ajinu chu Eve ahi. Amani chu, Pathen in vannoi pumpi hi anapei. Chule, tlsem dang jouse - tuilah a vah-le ganhing jouse, chunga leng vachate, le leiset chunga um ganhing hihen louhing jouse, chunga thunei-vaihom (‘Leng’ ) din apansah tai. Hitia chu, Adam chu leiset chunga dia‘Lengpa’ ahin, Eve chu Lengnu anahi.

Pathen in asem jouse hi umje le umjedingdol nei cheh’a asem ahi. Vacha hohi aleng-leding, Nga hohi tuinoiya vah-le ding, louhing hohi bu-le-an ding, huitheng hohi haitheina dia kisem, apanna nei dia sem cheh ahiuve. Nang hi ‘Vai homding’ le Pathen-Golpa, akivoppi hidia sem nahi.

            Niseh-le, Adam le Eve chu Pathen-to kivop in avah-leuvin, akihou jiuve. Pathen in Adam chu vaihop dan ahiljin, Leng hi’na dola thilsem dang ho jouse chu ngailutna neiya achintup a, lungmong le kipah a achenkhom dandiu ahiljin. Chule, thilsem jouse chu kichamdela ahinkhom theina diuva achunguva vai ahoppeh din jong aseipeh jin ahi. Pathen thalhenga, thilsem jouse chunga vai ahop a, achintup ding, chule, manchah dingdol ho chu aphapen le Pathen lungdeiya amanchah din jong aseipeh ji. Abanin, Pathen thalhenga ‘Leng’ ahijala, asempa Hatchungnung Pathen thupeh jouse anit jing dia jong thupeh anei ahi.

PATHEN LENGGAM SUNGA HUNG LUT IN

THUPATNA :

          Thil jouse hi JAT NI a hopkhen bou ahi. Pathen le Satan. Atheng le Athenglou, Apha le Ase, Ahoi le Ahoilou, Hinna le Thina, Damna le Natna, Pasal le numei,Achal le Api, Van le Lei, chule adang jouse jong hopnia hopkhen cheh ahi.

‘Lenggam’ jong hi ni bou aume – Pathen Lenggam le Satan Lenggam. Vantil ho jong hop ni bou ahi – Pathen Vantil le Satan Vantil’. Mihem jong jatni bou ahi – Pathen cha le Satan cha.

Pathen cha hilouse  chu Satan cha ahijenge. Pathen chate jouse chu Pathen Lenggam mite ahin, Pathen chate hilouse chu Satan chate, Satan Lenggam mite ahijenguve.

Hinla, leiset a damlaisung hin koima chu Satan chate hiden ahipoi, Pathen chate hung hijingthei ahi. Ajehchu, Pathen in Huhhingna lampi agonjeh ahi. Chule, Pathen hi thiljouse sempa, Thuneichungnungen ahin, Satan in ajotheihoi ahipoi. Paten thilgon hi asuhmona thei tahtah thaneina Satan in aneipoi. Asuhmo theilou jeh a, aboncha lolhinsah louva, ama ding jong akisem got jeh a mihemte dia boina umkha ahibouve.

Bible ahin, ‘Pathen Lenggam’ atina aumin, ‘Vana Lenggam’ atina, chule ‘Tonsotgam’, ‘Longlougam’ hihen ipi Lenggam ki tijongle Pathen’a jouse chu ‘Pathen Lenggam’ ahijenge.

            Pathen het in, Leiset ahin Lenggam ni aum in – 1.Pathen Lenggam, le  2.Satan Lenggam bou ahi.

Pathen Lenggam sung hi  Vah, Hinna, Damna, Hinnopna, chule Ngailutna dimset jeng ahin;  Satan Lenggam vang hi Muthim, Chonset, Jachat le jumna, Natna le gim-hesohna, Hatmona le Lhahsamna, chule Kiseiset le kithettona dimset jenga ahi.

Mitinin, leiset a hinlaiya khat johjoh akilhen cheh ding ahi.Hoijoh nalhen em?

            Pathen Lenggam nakilhen joh-le kipa aum’e. Hitia chu, Jesu Christa hi nahinkhoa Pakai dia nakisanle ‘Leng cha’ (Pathen Cha) chu nahitai. Pathen hi napa le na Pathen ahin, Jesu Christa hi (mihem ahung hina in) na sopipa(Pathen cha-gel hi’na a), na-insungmi (nachenkhompi), nagolpa (nakivoppi) ahitai, chule, Pathen ahi’na in, Jesu Christa hi na Lengpa, na-Pakai le na-Pathen ahi. Chukit-le, na-Huhhingpu,chonset akona na huhdohpa) nachingjing,na-Pakaipa ahitai. Pathen Lenggam-mi (citizen) nahitai.

“ Ajehchu Ama (Pa) chun muthim thaneina hoa kona eilhatdoh’uva, Angailut Achapa Lenggam sunga chu eipuilut’u ahitai. Ama (Chapa) a chu  lhatdamna, chonset jouse ngaidamna ineiyu ahitai.”(Colossians 1:13-14).

            Hiche Lenggam thudola hin agam miten ahetchet diuva ngaikhoh thu tamtah aumin, hichu hettheina dia hiche bu hi kigong ahi. Siminlang, ‘Hinnopna Bulhingset’ mangin. (aban simbe teiyin, nahetchet nading le tahsanna lama nakhantouna din)

‘PATHEN LENGGAM KISANIN

Jesu’n aseiye “ Hinla, amasa’n Pathen Lenggam le Achonphatna hol masauvin, chutengle hicheho jouse hi kipebe ding nahiuve” ati. (Matthew 6:33)}

 “Amasan, Lhagaova Huhhingna hi kisan masah un, chutile, adang jouse hi nachanthei diu ahi” tina ahi. Jesu Christa ‘huhhingna’ hi naneiloule ‘Christian jong hilou nahi. Huhhing nahi tengle Pathen in Lhagao Theng napeh a, hiche Lhagao Theng panpina jala chu Pathen phatthei bohna ho nachan thei ding bou ahi’. Hiche hi, Jesu Christa le aseijuite, solchah dang jouse thupipen, Christiante dia ngaimasapen ahi.

Hiche ‘Huhhingna’ chu nachantah-le achangloulaiho seipeh in, kaihoiyin. Them hihjonglechun, nathei sunsinin seipeh in, Pathen in phatthei naboh ding ahi.Nachanloulaile, tuhin taonan Jesu kouvin ;taovin

“Pakai, nei u chu neipen, na Lhagao Theng thahat chu neipen. Na thupha hi hilthemna din jong neipanpi, ei Huhhing ka Pakai Jesu naminin kataove, Amen.”

NGAILUT HI ACHATLOH THEI UMTHIMBEHLOU AHI

Ngailutna hi ‘ahinga’, ‘achatthei’, ‘natongthei’ ahin, umthim-behbeh ahipoi.

Gollhang khat in nungah khat ‘ka ngailut nahi’ tihenlang, angailutna chu imachan vetsah thei hih-le a ‘ngailut’ ahipon, ‘adei’, ‘hoi asah’ bou ahijoi.  

‘Ngailut’ hin thu aseiye. Gollhang in nungah angailut-le ‘ angailut chu aseipeh ji. Akama aseilou jongle ‘anunchan in seiye’.

Nungah hohi, sih-mihon thilnam ajahbai banguva, ‘ngailutna’ hi anam ajahlet jeng’u, amatdoh-let jengtheiyu ahi. Gollhang tampi umjongle, koichun angailut ham ahetlet jengu ahi. Kama sei ngailou, anuna ahetdoh jengu ahi. Gollhang hodia ki-chat umtah hiuva ahi.

amel amua, akoma aum jeng jongle ‘kipana anei’ chu anuna hetdohthei hiding, mihon ahou dan’u le aman ahoudan jong danglam jep ding ahi. Mihon, nungahnu chu ‘i-machan gel hih jongleu’ angailu- gollhangpa vang chun ‘jana le lungsetna’ giltah aneiyin, moh mai maiyin jong ahou jipoi. Hitia, gollhangpa nunchan jouse hin ‘tohdoh’ anei ahi. Athil dei le adudu achohpeh ding tina ahipoi. Anun in, angailutna chu avetsah ahi.

Mipa khat in achate  angailutna chu natoh in avetsah e. Adonin, avechingin, kichat-tijatna akonin ahongbit in. Adamna diu abolpeh in, angaichat ho abolpeh in, aseilene. Pathen in eingailutnau hi natong hattah ahi. Eingailutnau eivetsah nauvin, Achapa Jesu Christa chu vannoiya ahinsol tai. (John 3:16) Nangman, Pathen ngailutna chu nasan’a, Pathen chu nangailut-le Achapa Jesu Christa hi na Huhhingpu le na Pakaiyin kisanin. Chutile, ‘Huhhinga na umding’, ‘Pathen cha’ nahiding ahi.

MIJOUSE HI HUHHINGNA NGAICHA IHIUVE

‘Mi’ nahi em?

Pathen thu’n “Mijouse chonse-a Pathen loupina changlel ahitauve” (Romans 3:23) atia, nangin “kachonsepoi” natile ‘mi’ nahilou hinte. Ahiloule, Pathen thusei hin nang nahoptha lou hinte.

Pathen natahsan em? ‘Mi’ angollou jousen Pathen aum atahsan cheh e. Achutiloule, Pathen lekhabu Bible in “Mingollin alunggela Pathen aumpoi ati” tia asei ahi.

‘Mi’ nahin, ‘Mingol’ nahipoi. Pathen natahsane, Athusei jong tahsan in.

“Mijouse chonse ahitai” atihin, “mijouse huhhingna ngaicha ahi” atina ahin. Hitia atichu, “Mijouse Ka huhhing ding ahi” atina ahikit e. Pathen thusei ngaijouse ‘Huhhingna’ chang ding ahi.

Nang jong Pathen ‘huhhingna’ hi nachan ding ahi, asei hi ngaiyin.

Pathen in tonsot’a Amato chengkhom dia eina semu ahi. Pathen umna achun hahsatna le gentheina, natna le gentheina aumpoi. ‘Chonset’ hung um jeh a hahsatna,gentheina,natna le thina humg uma, hinkho hi boina dimset ahin, thina gei umdoh a ahitai. Nang jong nathi tei ding ahi. Hitobang hahsana um lona hi mihemte hi Pathena kona gamlatah a um ihi jeh’u ahibouve.

‘Chonset’ kiti hi ‘Pathen deilouva um’ tina ahi. Chule, ‘Pathen lung toh-lou’ tina jong ahi.

Pathen chu ‘Athenga’ ahi. Mihem hi ‘athenglou’ ihiuve.

Na lunggel chu ‘theng jing’ theiya nahet em? Nang le nang jong nakideimo kom, nalunggul nangdia phalou kom uma nahet em? Nalunggul le nalungsat bangin chon lechun khonunggeiya nangdia phamo dia nahet kom um am? Nanu-napa, nangailupeh ahi. Abanin, naji-nacha, chule na insungmi, nagolpha ho ahiuve. Ama ho nathet kom, adiuva naphatmo kom umji am?

Natahsa, na gilpi, nathin, na lung le namit, naha, nakol, le adang ho thohmah nabolnom, nanehnom, nagelnom kom um kha am?

Natahsa le nalhagao ngailupen, nasempa Pathen lungdei dia nagel le nahet ho nabol nomlou kom, nathaset kom, thilpha bolding na jolou kom um kha am?

Hitiho chu nanga aum jengle, Bible in asei ‘chonset’ chu nanga uma ahi. Nasunga, nathisan, anlungsunga ‘chonset’ chu chenga ahi. ‘Chonset’ in athua nanunsah, nahin thununji ahi. Achutile, Bible seibanga ‘michonse’ nahi. Nasukhelle, adihlou nabolle, tina ahipoi. Adihlou boltheina ‘chonset’ chu nanga hin achenge tina ahijoi.

Nanglele asukhel nahipoi. Mijouse chutia ahicheh e. Miphatah nati ho jong chute thou ahiuve. Hijeh achu, Bible in,

 “Mijouse chonse-a Pathen loupina changlel ahitauve” (Romans 3:23).

Hitobang ‘chonset thaneina’ a kona chu nahuhdohthei, mihem koima aumpoi. Mipha, nanu-napa le nangailu mihem tamtah in nachintup a thilpha nahila, nakaihoi jinga, nangma jong nasatah a naha kibol vangin, ‘chonset lunggel’ nanei jing theiye. Hichu, koiman ajo theilou ‘chonset tha hatna’ nasunga chenga chu ahi.

Koi ham ‘chonset thaneina’ joutheiya? Pathen, Jesu Christa bou ahi.

PATHEN CHA EISAH TAOVE

“Veuvin, lungsetna kemlou,Pa’n eipeh’u hi; Chonset’a lamvai, amangsa eiho,’Pathen cha’ eisah tauve. Eiho, Jesu Christa thisan jal’a ngaidam chang ten,Alungsetna hi heu hite. A lungsetna o ja jing din,Pathen naiyu hite. (HBLa 267 & I John 3:1 )

267      Behold what love.                 S.S. 21, R.S. 481.

                Doh is  D. b.                                          ( I John 3:1)

1.   Veuvin lungsetna kemlou hi,

      Pan eipeh u ahi  ;

      Setna lamvai mangsa eiho,

      Pathen cha kivo ding.

            Veuvin lungsetna kemlou,

            Lungsetna kemlou pan “cha” tia

            Eikounau onem chu ;

            Van vouva eikikhel teng,

            Pathen cha eikikou ding.

JESUN LHATNA KIN ACHAISA AHITAI, HINLA NAKISAN ANGAIYE

Chonset in mihem jouse hi khat cheh a hi ‘soh banga’ ahena, athua anunsah ahi. Jesu Christa hin, hiche chonset-soh a kona hi eilhatdohnau kin chu achaisa ahitai. Hinla, mimal tin hin eima ding cheh’a kisan ngaiya ahi.  Chule, hiche Jesu tohga chu santheina dia ‘achang thei dingdol chu hithei (lhin) ngaiya ahi’.

Vetsahnan, Solkal in natohna ding mun (post) chu akoitai. Adeh a tribal dinga koitum ahi. Hinla, achang dia lhing nahi ngaiya ahi. Tribal jouse chanthei ahipoi. Busom najoa, najona lekha dihtah nanei ding, tribal nahiding tribal hina hetpina napedingdol hon phatecha lekha asemu chu nanei ngaiya ahi, agamsungmi hi’na lekha naneiding ngaiya ahi. Chubana, hitobangmi tamtah lah a chu lhendoh nahiya, tohmun chu nachannadia themvetna khat ngai kit’a ahi. Hichu, jihthoa le kama kidohna ho ham dihtah a nadonbut thei ngai nalai. Aban kit a, napeding ho deichomthei mi, ama mel-het, party mi, insungmi, ahiloule, seiphat chang nahi ngai nalaiya ahi.

Kaden! Moh mumaimai thei ahipoi. Lhai kitet jong ngai maithei nalaiya ahi.

Hitiho jouse chu nalhin jouhel tengle vang, tohmun chu namchan jeng ding ahitai. Hijeh achu, Bible in,

“Lungheiyunlang,nachonsetnau chengse suhmanga aumnadin Pathen lam’a kiheiyin, chutile, Pakaiya kona kisuhhalna chu nanei thei diu ahi”(Acts 3:19) ati ahi.

Kasei hohi abolloulai, achangloulai nahile bollin. Abolsa, achangsa nahile, midang seipehnan mangin.

English Bible in ‘Repent’ atihi eipaovin ‘lunghei’ akiti. Hinla, dihtah a Bible paocheng hilchet din ‘nahinkho mandan dihlou chu kihetdoh inlang, nalungheiyinlang, nanunchan, nahinkho mandan chu dalhan, kinung heikit tahih in’ tina ahi. Nadalhahsa nanunchan dihlou, Pathen hetlou hinkho, Jesu Christa kisanlou le athupeh nitlou hinkho naman chu kihet in dalhanlang; kisih in, taovin, Jesu Christa hi nahinkhoa vaihom ding, athuthua nanunsah ding, anop le natousah, nalupsah, nahinsah, nathisah ding athuthu hidin kipedoh in; noiya bang hin taovin( hiche bangtah hin taovin tina ahipoi. Nadei le nalungdei bangin kilhan in, hinla, hitidol vang hi kilhan dan ahi tina’a kasei bou ahi. Na tao themvanga huhhinga na umding ahipoi. Natahsan jala bou huhhinga na umding ahi. Mitamtah in, chonset a aum kihet in, taodohmo leuvin akap in Pakaiyin asang thouji. Ajeh chu, alunga um jouse Pakaiyin ahenai.) Kilhanvang ngaiyin kahei. Pakaiyin,”Lungsunga um chu kamin aphondoh ahi” ati banga, nalunga um chu nakamin aseidohji ahin. Ase bon naseidohji-le, apha Pakai koma taona, kisihna, kipan phondoh chu bolding mong ahi. Noiya bang hin taovin :

 “Pakai, nathupeh nitlouva um, chonse kahi. Nei ngai damin. Tua konin, ka Pakai, ka Huhhingpu hung hinlang, kahinkho hi nadeilam in nei puiyin.Kalungsunga hin hung chengin, vai hung homin; tTonsot-hinna chu neipenlang, Lhagao Theng in nei umpin. Nei huhhing loule, chonset a thiding, tonsot geiya nangma mulouva mahthah ding kahitai. Nei huhhingin, nei kipomin. Cross chunga kadinga nahung thina-ga chu neipen. Nacha kahi. Nei panpin, neipui jingin tia ei Huhhingpu ka Pakai Jesu minin kathum e, Amen”.

Pathu Nit Phatthei Channa

“Kachapa, nanu le napan nahilna khohsah-in…... nanun-nakhan asemhoi ding ahi.” ( Proverbs 1:8-9)

“ Kachapa, chonseten jol lhah nagot teng, athuvah nung hih-in. Amahon, “Hungin mi gathat’u tin, golnop’in monabeite gadel khumu hite! Hing nomsel jongleu itokhah-uva inop igot’a ibol chai tengu athisa kijam diu ahi! Mi nei le nga chomkhomu hitin, i-insungu dipset jengu hite! Hungin kilhonu te, iguhdoh jat kihom naute,” tijong leu. Hiche ho chutoh kilhon dan kachapa! Amaho chu dalhan! Thilse abol loi jengun, mitha ding bou atup jingui! Vachan amu pet’a lenpel kisong chu pannabei ahi. ( Proverbs 1:10-17)

Leiset a nanu-napa hilna ngaiyin, chule, adeh a vanna-um napa hilna Bible’a kijih hohi ngaiyin, nit in. Pathen Chapa Jesu Christa chu Huhhingpu le Pakaiyin neiyin. Chutile, tua nahinkho le tonsot geiya dia phatthei naboh ding ahi.

.NGOLTHUT ANGAIYE

Chihna in Pathen muponate. Ngolthut a natahsana, nakingapna jeng ngaiya ahi. Abraham chu angol thut a ahi. “Na nu-napa, na in-nalou dalhan, kasolna muna chen” atile chejenga ahi. Ajotna ding, lamkah a i-atiding jong gellou. Pathen khut a kingama chejenga ahi.  Hichu, ‘tahsan’ kiti ahi.

Jesu Christa kisana, mi pengthah hija hinkho naman dan ding nagel masah-le, imatih in kisan ponate. “Kijou ponte. Iti kadu-kangai hohi kadalhah ding ham? Kathanopna hohi, kaloi-kagolte, kachena jiho, kakipana ho dalhah a iti, Pastor bang hinkho Kaman ding ham? Ningkihal umding.

Kakivahna, kasummuna ho iti kadalhah-le, iti sum kamuding ham? Kagenthei bep louding ham?

Abram chun imacha gellouvin, Pathen thiljouse sempa, ama sempa, sum-le-pai, nei-le-gou, chihna-themna, ijakai sempa, aumlouva kona ijakai umsahpa chun umsah tante ti atahsana ainakona kipatdoh jenga ahi. Ache jengle, Pathen in aching jingin, ahoidamin, ahaocheh cheh in, amin jong mihem minsah hitalouvin Pathen in amin akhelpeh in ‘Abraham’ ahitan, mijouse-pa ahung hitai. Pathen, mingol ho chingjing Pathen hi ahat e. Loupina Pakai chang jing tahen.

Kipaje Het, Kipathu Phon Aphatdan

Kipah thu phondoh le kipaje het hi tahsa  din jong damna, kipana le hinkho lolhinna ahi. Midang tojong kijopmatna asemphan, Pathen-to kijopmatna akhangtouvin, kipana akineibe cheh cheh in, i-boljousea kipana le lolhinna ahi

Kipathu kama phondoh hi Pakai lungdei ahi. Chule, mihem kipana jong ahi. Kipaje het hi thilkhoh ten ahi.

Jesu leiya alenlai chun ‘Leprosy’ (Phah) natna neiho chu ‘Athenglou, Aboh’ a koi ahiuvin, milah a um phallou, in-le-lou, kho-le-tohmun jong adalhah a khopama umdohsah ahijengji.

Hitobang ‘Miphah’ som chu Jesun adamsah tai(Luke 17:11-19).

“ Alah’uva khat chun, adamthen amuphat in, Ogingtah a Pathen vahchoi pumin, ahungkilekit e.” (Luke 17:15) Adang hovang, kipahcheh jongleur, khat chan ahung seipouve.

Bible in, “ Imajousea kipathu phongun, hichu Jesu Christa’a Pathen lungdei ahi.” (1 Thessalonians 5:18)

Miphah khat kipathu hungphongpa chunga chun Pakai akipah lheh jengin, amapa thu hi Bible in akisei jingtai.

Eiho jouse hi miphah sanga ‘bohjo’, chonsetna dimset, Pathen-to kijopmat theitalou inahiuve. Jesu Christa eiho dia ahungthi jala eihon Ama Huhhingpu le Pakai dia ikisan’uva kona Pathen in Acha dia eikisan kit’u bou ahi.

“Chonset a thisa”(Ephesia 2:1) tonsot geiya mangthah dingsa chu Pathen lungset le khotona jala, “Christa-to hingkhom”(Ephesia 2:5) a eisem’u ahitai. Jesu Christa’n cross chunga eithohpeh jal’uva, eiho chonsetna Pathen in angaidam a, Pathen-to eijopmat kit’uva, tonsot geiya Ama le achate jouse to chengkhom dia eisemdoh’u ahitai. Ahile, miphah ho sanga chu eihohin, tonsot a thenna-damna ichan chunguva hi nitina kipathu i-phon jing diu adol hilou ham? Naphon jing nah em? Nitina Pathen in napeh hinna,damna, thilpeh seijoulou ho jala jong phon jingding hilou ham?

Hijeh achu Bible in, “ Imajousea kipathu phongun, hichu Jesu Christa’a Pathen lungdei ahi.” (1 Thessalonians 5:18)

Imalam jousea kipaje het ding. Thil umdol hoa jong hi aselam sanga apha hung sohdoh thei ho hi muthem-hetthem a kipaje hetding ahi. Chutile, nangma dia damna, kipana, lolhinna hiding ahi.

Jesu Christa huhhingna nachan tah-le nitinin kipathu phongin. Damna, hinna, neh-le-don, phatpha, le adang napeh jalin Pathen thangvah in. Na insungmi, lo-le-gol chule midangin na umpi, nakivoppi, napanpi jalin amaho koma kipathu seiyin, Pathen thangvah in.

JESU KI VOPPIN PATHEN VANGBOH CHANGIN

Pathen in nang koi-itobang nahi,chule ipi nangaichat ahi jong ahesoh keiye. Phatthei naboh nom e. Hinla, Acha nahi loule adding bangin phatthei naboh theipoi. Hijehchun, Achapa neisun Jesu Christa hito kivop lechun, Acha naso ding phattheina lhingset napeh ding ahi.

Jesu Christa-to kivopna din – chonset thaneina noiya kona nahuhhing dinga Jesu hinsola chu Apa, lei-le-van sempa Pathen khatseh ahi chu tahsanin; chule, Jesu Christa hi, taonan kouvin, naleng le huhhingpu hidin temin. Na hinkho napuijing din temin. Chutile, Jesu Christa-to hinkho namankhom ding, Ama (Jesu) mina chu Pathen in nangaichat jouse, Lhagao Theng khut a kona nahinpeh ding ahi.

Themgao Isaiah chun Pathen lunggel ahet jalin, aseiye,

 "Nangma natahsan jal’uva, amaho hi lungmonna le kipana lhingset napeh ding ahi.” Isaiah 26.3 

Hichu, naboltah-le, nabolding jongle, Pathen hetsahnan ‘Amen’ jih in.

Thouvin nalupna pheh kilah-in lamjot tan

Kumthah jong ahitai, “Thouvin nalupna pheh kilah-in lamjot tan”. Ih-mut le moh jenjuna umlouvin, lum lum tahih in, nalupna chu la inlang kichoithon, lam jot in na tongtan. Pakaiyin natahsa le na lhagao adamsah ahitai. Damna hinkho mangin. Adamlou, achonse, athemmo, imacha helou bangin um tahih in. Pathen in lunggel pha napen, chihna napei. Hatna napei. Jesu Christa mihema hungpenga, chonset tha-hat jeh a hahsatna umho najopeh ahitai. Nadam lam nahetlou ham. Jesu lam ven, na damsahpa chu. Peter in Pakai Jesun tuichunga lam ajot chu athangsen Pakai koma chun ama jong lam ajotsah din angeh in ahile, Jesun “hungin” ati.
Peter jong Jesu lam aven tuichunga lam ajot jengle ajottheitai. Hinla, kichat ahinbolin ahile, akilehlut tai. Hichun, Pakaiyin akhut in agah sangin akaidoh tai.
Jesu hatna, panpina, jona chu tahsan in lam jot in. Adam umin umin. Na chonsetna, nadammona, nahatmona, nalhahsamna gel hih in. Ama natahsan laisungin , kilhehlhu ponate. Na keng najet navet a, nahatmo nageldoh vangle, nalhuh jeng ding ahi. Hijeh achu, Solchah Paul in Jesu lam vejingin, mallam jonute ati ahi.
Noiya thu hi simin. Nasima kona hetna naneiya, Pathen phatthei bohna nachan ding kataona ahi:
“ Jerusalema chun kelngoi kotphunga Hebrew paova, “Bethzada” kiti twikul khat aumin, leibuh nga aume. Hiche dunga hi ana damlou mitcho, elbai, nakong chatmo tampi um ahiuve.(Amaho hin twi kilin angau ahi; ijeh-inem itile phat khat khat leh Vantil twikul’a hi hung kumlhaa twi chu ahinsuh lingjia, hiche twi kicholong joutah leh chomlut masapen pen chu itobang hiveiya na hijongleh damhelji ahi.)
Hikoma hin mi khat kum som thum le get jen na chatmo aume. Ama chua alup Jesun amun, phat sotpi hichea hi lum ahi, ahen ajah a, “Nadam nom em?” atileh; anapan adonbut’in ajah a, “Pakai, twi hung kicholoh teng twikul sunga eidomlut dingla koima kaneipon, kacheleh kalhun kah-in min eikheljin achomlut masajitai,” ati. Jesun ajah a, “Thouvin nalupna pheh kilah-in lamjot tan,” ati.
Apettah chun mipa chu adamhel’in alupna akijeldoh-in lam ajottai. Hiche nikho chu Choldo ni ahi. Hijeh chun Juda hon adamdohpa jah a, “Tuni hi Choldo ni ahin, nalupna nakiput jeng chu dan ngai ahipoi,” tin aphoh-ui. Aman adonbut’in, “Eidam sahpan kajah a, ‘Nalupna pheh kilah-in lam jottan,’ eiti chume,” ati. Amahon, “Najah a, ‘Nalupna kilah-in lang lam jot’in,’ tia chu koipen ham?” tin adongui.
Ahinla adamdohpan amuna mi atam behseh phat’a, Jesu ache mang tah jeh-in, aboldampa chu koiham ahetapoi. Hicheng nung hin Jesun ama hi Houin a amudoh-in ajah a, ‘Ven, adam nahitai; akhoh chehjo nachunga achuh louna din chonse kit ta hih-in,” ati. Mipa chu achen Juda miho jah a adamsah chu Jesu ahi agaseitai. “(Joh 5:2-15)

Pathen in panpi jing tan.