Jesu jui hohin hinkho thusim pha aneina diuvin Pathen in apanpiji

Golte, Pathen in Jesu Christa minin phatthei naboh hen lang nitina nangaichat jouse nape jing jeng hen.

Hichena ding chun, themcha beh, hijongle, nitinin, athu sim jingin. Tunia  simding chu ‘Jesu jui hohin hinkho thusim pha aneina diuvin Pathen in apanpiji’ ti ahi.

Matthew 1- 16 sung hi simin. Hiche sunga hin ‘Jesu’ hi ‘Christa’ ahi tile, Ama chu vannoiya ahung pen jong chu pennabul le gui kicheh le guitanlou anei ahi ei musah un ahi. Hiche banga hi, Jesu nungjui ho jong hin, Jesu guiya peng le hinkho dihtah mang ahidiu hi Pathen in adeiyin ahi. Jesu Christa atahsan masang hinkho chu achom ahitan. Jesu-to ahinkhoma kona vang hi guidettah aneina din Pathen in a Lhagao Theng in apanpiding ahi, hiche Bible chang hohin eimusah un ahi.

Jesu Christa-to hinkhomna ahin hahsatna beideh ponte, hinla, jona chu Pakai Ama-a ahi, eijopeh jing diu ahi. Jesu pen-gui jong chu aboithouji. Apen-gui kiseina ahin ‘Abraham in Isaac ahingin, Isaac in Jacob ahingin’ tin Mipa (pasal) kijet aseiye. Hinla, chang 5-6 ahin numei thum ahinseiye - Rahab,Ruth and Uriah jinu. Hichu, boina aum aseina ahi. Gui tandehchet chu Pathen in numeiho mangchan ahin jopmat thou thouve tina ahi. Hitia chu, gui tantouhel’a Jesu chu hungpeng ahi. Hiche banga chu, Jesu Christa tahsan jouse jong leiset ahin lhepna le hahsatna tampi um jongle, Lhagao Theng thahatna a, Jesu Christa’n jona loupi anei chu eichansah’uva eijopeh diu ahi.

Jesu chu Christa ahi napoma, Leng le Huhhingpu dia nakisanle ‘Amen’ jih in. Pathen in guitanlouva Jesu Christa-a hijing din napanpitahen.

Jesu Christa thupehnit

Jesu Christa-a hinkhothah kimanna-a lolhinjouna chu ‘hinna pumpi Ama (Jesu Christa) koma pehdoh, chule Jesu-a kingai’ na-akon bou hithei ahi. Akhut’a kipehdoh le Ama-a kingaina akona bou khantouna hinkineiya,kipanana, nopna le lolhinna tahbeh kineithei bou ahi. ‘Hinna pumpi Jesu pehdoh’ ‘Jesu Pakaiya nei’ tihi ‘nahinkho, nakiheina, na tohgon le naphat masang jouse Ama thuthu hidia napehdoh le na nganse’ tina ahi. Jesu Christa chu Pakaiya naneiya,Ama thu thua nanunna, Ama a kingaina naneitengle nahinkho mandan chu ol ola ahin khel ding ahi.

Chule, John 10:10 muna asei “Amahon, hinna lhingset aneitheina diuva hung kahi” ati hi chantheina dinga, Jesu Christa chu anungjuiya ‘hinkho lhungkeiya Athupeh nitding’ ahi.

Jesu Christa khut’a nakipehdohle, Pathen kom lhutnan ‘Amen’ jih in. Pathen in panpi jingtan.

KIPA JINGDAN

Golte, Pathen in phatthei naboh henlang KIPA JINGDAN NAHIL THEM HEN LANG KIPAJING DIN NAPANPI TAHEN!

Ka ngailut jalun, thuguh khat seipehkit’unge. Pathen phattheibohna kachandan hi kaveven ahile, ‘kipaje kahet’a kon ahi’ kahetai. Nitina Pathen in eipeh hohi kasimin, ahilou lam hochu gellouvin, apha kachan ho chacha chu kasimjin ahile ‘kipah loutheilou kahi’ kamujin,Pathen koma taovin ei malsomna hochu kaban simlhahjin –

 “Pakai, nei vangbohna hohi kamun kipah loutheilou kahi. Hinla, kipaje kathemlou jeh in neingaidamin. Nei phattheibohna, nei thilbolpeh loupi hohi muchentheidin, kamit hohi tahsa le lhagaovin hatsah inlang, na ngailutna thu hohi hethemthei din tahsa le lhagaovin ka lungthim-ngaitona le khohetna hohi neisemhat peh in; chutile, nachunga kipaje themingting kipah jing tange. Kipana neipeh hohi van kipana, tonsot kipana, Jesu-a kipana chamkim chu sosah in, tia ka Leng le Huhhingpu ka Pakai Jesu Christa mina katao ahi, loupina changjing jengin ka Pakai Jesu, Halleluiyah, Amen”

 tia kataonia pat in, nitinin avangbohna kachang jingin, thil-hahsa dep, thu-hahsadep katoteng jongle kaboisot, kagelsotthei jipoi; Pathen thu kalunga ahunglutjin, ka boina le kagelboina hochu “Pakaiyin aphalamin sodohnante, Ama-a kahi chu, Aman kading, Amiteding ahetnah chu, kei ipin kaboipoi; boipipi, gelgel jongleng ipibon kibol theilouding, ka ei huhhing ka Pakai Jesu Christa katahsana hichan Aman eipui, aban jong Amathu kahi” tin Pathen thu kagelkit jitai.

Nitina, Amathu, Website,facebook hoa eisosahji ho jong hi keima mihem hakiboljal hile ‘Absent’ (bollou) kahi jingding ahin, Ama thuthua kakoile, Internet Link umlou tilouvin 2011 apat nikhat jong ‘Absent’ (bollou) in a um khapoi.

Hiche jala hi, “Jesu Christa-a kingaiyin” (Rely on Jesus Christ’ tia kaseisei jingji ahi. Keimatah in kasei jijohi lekhabu hetna akon ahipoi, kato le kathodoh hoa kon ahijoi. Keima hatlou le lhasampenbon hitia eipuiya eiumsahtheile hitiho simtheiya  Internet khoithei jouse hi hitheicheh dia katahsan nahiuve. Eiho bolding hilouva, Pakai Jesu chun Ama Lhagao Theng thahatna-a eibolsah jiu joh ahi.

Chule, Athu kisahlelpi ding hin, Pathen’a kipana umlouvin koiman ajoutheipoi. Amin maimaiya, simdohna akona kisei hohin na atong ngaipoi, bolsot thei jong ahipoi.

Hijehchu, Jesu Christa jala ka golte, tunia pat in kipanin, kipana hinkho mang panin. Tunia ipipi thilpha nachan em gelkhomin, sutoh in; hicheho jouse thilpha nachan jalin Pathen koma kipathu lhut in, taovin. Nahinkho ol ola kikhela kipana nachan jingding, Pathen phattheibohna nitina nachan jingding ahi. Pathen in, Achunga kipahte akipapin, adiuva pha abolpehji. Hichehi, ahetthem jalin, Mitheng Paul in Phillippi 4:4 muna chu “Pakaiya kipah thanom jingun;”  ati ahin, bol-hih khakhante, hethem hih khakhavinte eiti jeh’uva avela aseikit’a “ tikit leuvinge, kipah thanom jingun.” tia

Golte, kaseihi natahsanle, chunga keima taona hi juiyin, phatechan siminlang “Pakai, hiche hi kataonan neisanpeh in, tia ka Leng le Huhhingpu ka Pakai Jesu Christa mina katao ahi, loupina changing jengin ka Pakai Jesu, Halleluiyah Amen” Hitia chu nataole ‘Amen’ jih in. Pathen in panpi jingtan.

SUM KIMANSAH TEKAHNA THU

Golte, Pathen in phattheina-chamkim nape henlang, Acha deitah bangin nachingjing jeng henuo. Bible a i-Pakaiyu Jesu Christa thusei hi phatechan siminlang, kipana chamkim chu kisanin.

SUM KIMANSAH TEKAHNA THU – Jesu’ aseiyin, “Vetsahnan, numei khat in dangka som neihen, khat mansah tale; Thaomei avah a, in atheh a phatecha, amutokahsea ahollou ding ham? Chule, amutengle, aloi-agolte le heng le kom ho koukhoma, ajah’uva ‘Nei kipa piuvin, danga sum kamansah kamukittai’ tia asei ding ahi. Chutobang chun, michonse khat akisih tengle, Pathen Vantilte hoto kipa khomna chu vana umji ahi” ati.(Luke 15:8-10)

Hichea hi Jesu Christa hin, Ama le vannoi mit thu asei ahi. Pathen in mihem anasemin, chonset in i-mahthah tauve. Aholdoh din, Pathen in Achapa Jesu ahin solin, Ama tahsan chan chu Pathen lama kilekit, Pathen in amukit ahi. Pathen’a kona mangthah, gamla tah a um i-hiuvin, Jesu Christa tahsana Leng le Huhhingpua kisan jose chu Pathen in namukit a, acha, a-insungmi asokit ahitai. Chutengle vana kipa loupe umji ahi.

Gol, Jesu Christa chu Leng le Huhhingpua nakisan ahitahle, Pathen le Vantilten nakipapinau jop in Pathen thangvahnan ‘Amen’ jih in. Pathen in na umpi jing tahen.

Jesu tahsan jousen tonsot hinna anei ahitai

“Ajehchu, mihem jouse hi chonsea Pathen loupina changlel ahitauve” (Rome 3:23)

Adam le Eve chu mijouse pa le nu dia Pathen in anasem ahi. Chule, mihem asem chu akivoppi ding le Ama khela leiset a vaihomdia asem ahi’n, Ama (Pathen) limloa (Pathen banga hinna, loupina le hitheina neiya) Pathen in anasem ahi. Hinla, bollodia Pathen in ana seipeh abollhon phat in Pathen umna mun a kona deldoh ahilhontan, Pathen mije hina chu lahpeh in aum lhonin, Pathen bang thitheilou ding chu thiteidin koi ahi lhontai.

“Ajehchu, chonsetman thina ahin, Pathenin manbeiya apeh vang chu tonsot’a i-Pakaiyu Jesu Christa to hinkhomna ahi.” (Rome 6:23)

Pathen deilou boljeh a tonsot a thidendia Pathen in gao anasap jeng tah vangin, a ngailut behseh jalin, Ama lama akinungle kit’uva Pathenna hinna chu aneikitna diuvin, Pathen in Achapa Jesu Christa vannoiya ahinsol in, hiche Jesu tahsan jouse chu, natohphat vang hilouva, ngailutna jala manbeiya tonsot hinna chu apeh ding ahitai.

“Hiche ahin Pathen in eingailutnau photchetna eimusah-un, chonse ihi laitah-uvin Christa eiho kheldin ahng thitai! Tua Ama tahsan jal’a them chang ihitauvin, achung chon’a Ama vanga Pathen lunghannaa kona huhhinga ium teidiu ahiye.” (Rome 5:8-9)

Jesu le Mose Dan

Golte, Pathen in na umpi jing jenguvuo! Judaism thu seidin eisolun, hinla, kahepon,  kahetlou kaseiding Pathen in eiphal poi. Kahet chasun kajihle, ka subei kittai – kalung anom theipoi. Nei ngaidamun.

 ’Israel’ chu ‘Pathen namlhen’ ahiuvin, ‘Messiah’ ngah jing ahiuve. ‘Jesu’ hi ‘Messiah’(Christa) ahi atahsan pouvin, adang angah nalaiyuve akiti. Ipihile, Pathen in alhensa, Amite ahiuvin, nikhat hetsah teiyinte. Ahin hetdoh niu chu ahisa ahijenguve.

 “Oho ! Jesu hi Messiah hija hila uo!” ati diubou abat in kagele.

Mose thusompeh DAN koiman ajui kim joupoi! Hijehchun, Pathen in, ei ngailut beseh jeh un Achapa Jesu Christa chu ahinsol in, eiho chonset a ithidiu khel in ahung thitai. Ama (Jesu Christa) tahsan jouse chu Pathen in achonset angaidama Acha-a asema, Ama-a um tonsot hinna chu apeh ahi.(John 3:16)

Mose DAN man hile, ajonpettah a kiman numeinu chu songa selih ding ahitai. Jesu kom ahunglhung tai. ‘Jesu’ chu ‘Huhhingpu’ tina ahi. Huhhingpu koma hung chu thinte nati em? Akoma che ho chu thi louding, hing tei tei ahi.

Jesu chu DAN subeiya hung ahipoi. DAN chu ‘huhhing’ nadia kipe ahin. Hinla, DAN chu koiman ajuilhing jou tapoi! DAN chu LOSAM, PILHINGLOU, LOLHINGLOU, NATONG LHINGLOU dia um ahitai. Ajehchu, mihem ho huhhinga umna dia kisem chu koiman hinpi jou talou ahi. Hiche jeh achu, Pathen Chapa Jesu Christa chu PIlhing joutalou  DAN chu pilhinsah’a hung ahi. Iti apilhinsah em, DAN Thusompeh bana chun Ama ahung kikoitai. Tichu, ‘Mose Dan’ khela Ama hung kipe ahi. Hichea ‘khel’ kiti hi ‘change’ hilou ‘alternative’ joh ahi. Hichu, khat joh joh nalhenthei tina ahi. DAN nalhen nomle nalhen ding, ahiloule Jesu nalhen thei ahi. Jesu lhen chu  ‘NGAILUTNA’  lhen tina ahi. DAN nalhen ding ham NGAILUT nalhen ding ham?

Keivang, hatlou le lhasam, michonse kahijeh in DAN chu kajui joupoi, katheinan ajoupoi. Hijehchun, Jesu kakouvin, Aman kachonset eingaidam in, kalung amongin, kakipah in, Angailutna thu hi kaseichim theipoi!

DAN juiding hile, tua kasei ho jong hi seithei lou ding kahi. Kamin jong hi tahlang ngamlou ding kahi! Tunvang, Jesu Christa chu ka Pakai, ka Pathen, ka Leng le Huhhingpu, ijakaiya ka ijakai ahitah jeh in, suhkhel kaneijongle eingaidamsa ahitah jeh in, adihlamin eipui jinginte ti tahsanin, ngampel in thu kasei jingtai.

Judaism hi Jesu Christa tahsanlou ahiule, keivang NGAILUTNA (JESU) kimutah a, DAN kikheltah lam jotkit ding vang kangappoi. “Hiche jeh achu, min anu-apa adalhah a, numeinu chu abelji ahi”.

 ( Halleluiyah, Amen! Akidange.

O Pakai, ipi kitina hija, hichelai mun tah ahi, hiche – Genesis a chang dang hoto akijopmatpi behseh umlouva kijih thuhi kakhut ahi neihintadoh sah ham? Pakai! Kahethem poi, nangman, miho le kei lungsunga hetna chu nei hinpetauvin. Atah hetsah dinga neiteppeh’u, na Lhagao Theng chun neihil jenguvin, O Pakai.’Nu le Pa’ tihin ka tahsanluiyu tina ham? Numei, akichenpinu (aji) chu New Testament a Moulang (Jesu) kiti khu kiseina ham?)

Hinte kati, Golte. Hiche, Genesis 2:24 “Hiche jeh achu, min anu-apa adalhah a, numeinu chu abelji ahi” hi, numeinua kona hung pengdoh ding Jesu Christa le Adam chilhah miho kiseina hinte. Adam chu Pathen in asem ahin, chonset jeh a Pathen to kikhen ahitan, achilhah jouse jong Pathen’a kona gamla tah a umdiu ahitai. Hinla, Pathen in, huhhingna lampi agongin, hichu, Adam(pasal) pang louva numeiya kona Pathen in mikhat, Huhhingpu Jesu Christa chu ahin pensah a, hiche Huhhingpu chu mihon ahinmutengule, anu-apa (Adam son hi’na) in le chonna chu dalha-a Jesu Christa chu bel’a, Ama (Jesu Christa) chuto pumkhat hung hiuva, chengkhom diu ahitai.

 “Jesu nei chihna bulpi, Jesu nei haona bukim; Jesu nei chu vannoito kikhenna!”

Hiche Labolpa(nu) hin aseihi ahechen nadem? Labol tamtah, Psalm(LAbu) a Labolpu jong hin (chule, Themgao tamtah in), aseiyu helouva, Pathen Lhagao Theng in, amaho hetchetlou thil nasatahtah jong aseidohsah jiu ahi. Hichea, “Jesu nei chu vannoito kikhenna!” hito “Hiche jeh achu, min anu-apa adalhah a, numeinu chu abelji ahi” tihi athusei kibang ahi tutu hin kalunga ahung umin, kahintatdoh e. Jesu Christa chuto nakimuteng, nachondan, nanunlui, natahsanlui (‘vannoi’ kiti hi ‘Pathen chenlouna, Pathen deilouva umna, chenna,chonna’ tina ah) chu na dalhah a Jesu Christa chuto hinkhothah naman ahitai. Hitei tei jenguo, Gol.

Taovute, “Pakai, hiche sim jouse hi LAMLUI Lamhahsalam, Mose DAN hahsatah chu jui ngaitalouva, numei jongnu na huhhing bang chun, Na NGAILUTNA jal in,Nanga um phattheina simjoulou, tonsot hinna chu neipecheh jengun tin, ei Huhhing ka Pakai Jesu Christa Namin ka thume, Halleluiyah, Amen!”

Gol, hitia chu nataole “Halleluiya, Amen” jih in. Pathen in umpi jingtuo.

Halleluiyah, Amen

Golte,Pathen in phattheina lhingset napehenlang, Amin vahchoi jingthei din napanpi henlang, Acha dei-um nasohenuo.

Ipu-ipateu chun jihtho(written) hi ana manloujeh un, minchom(signature) ana hepouve. (Koiman lunghannan neidahen tin kangeh e - 1980 kum lahchun Pathen kana bahsah jengu Pastor Mangkholet chun amin Rev.M.Doungel ajihji. Houina Chairmanpun aphondoh dia jih thoa apeh’ule, ahin phongin, “Tu nilhah thuseiding Rev.M.Mangkholet Doungel ahi”ahinti.)

Golte, mitamtah hin, thil ahetnomjin, bol le manchah jong anomji. Hinla, hetna dih le kicheh neilouva bol le man hi aphachompon, nuijat umtah jong ahiji.Lemsa Rev.M.Doungel chun “Halleluiyah” samin lhagao-boh ho akinomangtheiye”anati. Hichelaichun, houlama kana pontho lheh vang chun kana tahsan behseh poi. Hinla, tuhin adihtahbeh ahi kamutai.

Bible them ho seidanin,  “Halleluiyah” kiti hi “Vahchoiyin Pakai chu” tina ahi akiti. Chule, ‘Amen’ hi ‘hihen, chutihen’ tina ahi. Hichea, Yah’ kiti hi ‘Yahweh’ (Thiljouse sempa Pathen ‘Pakai’ khatseh Israelte a kona kihe peh a kitahsana Pathen’a ineiyu hi ahi akiti. King James version –KJV in “Yahweh” hi “Lord” ati. “Lord” hi eipaova ‘Pakai’ tina ahi. KJV hin “Elohim’ hi ‘God’ ati. God chu ‘Pathen’ ahi. Hebrew paova “Yahweh’, English a ‘Lord’, eipaova ‘Pakai’ hi Kitepna Luiya patna kiseina Kitepna Thah a hung kilangpeh hi ‘Jesu Christa’ kiseina ahi. Hiche Yahweh chu Sinai mola meikong bangin Mose koma akilangin, ‘Kitepna Thingkong’ achun aumpeh e. Israelten Kitepna thingkong umpi jalin gal ajoujiuve, hahsatna tamtah jong agalkaiyui. Hiche, chu KT lamahin Jesu Christa hito akitoh peh e. Jesu Christa chun thil kidang tampi abolin, Ama min panin solchah hon ahin bol peh un; tuni geiyin Jesu Christa minin damlou tamtah damsah ahin, bolmo kidang bol ahijinge.).

Golte, keivang adihtah, Hebrew paova aditah chu kahepoi. Hoi chu hita jongle, hiche “Halleluiyah, Amen” hi Pathen khatseh chu vahchoina a kimang ahitai. Koima Hou dangin aman akijapoi. Hiche hi, “Pathen khatseh le Achapa Jesu Christa ki vahchoina monga kimang ahitai”. Hichu, ‘Thu-Sap’ (Slogan), “ Chungnungpen Pathen chu vahchoiyin umhen, Umhen” tina bang ahitai. Hitia, Jesu Christa min chu “Min kidang, Thilkidang bolthei, Thaneitah min – Jesu Christa” min panna ahijalin ‘thilha-sangah, lhagaoboh’ ho geiyin agindiu mong ahi.

Hinla, Lhagao Theng neiloumihon iti sap in “Halleluiyah, Amen” sam sam jeng jongleu apanna umdeh lou, thilha-sangah ho dinga jong, Minchom mangthemloupa man nuijat aumbanga chu, nuijat umbep ahi. Jesu mina lhagaoboh nodoh ahet jalun, ama tahsanlouhon, lhagaoboh nodohgon “Jesu minin potdoh in” tia aseiyule, lhagaoboh hochun adonbut un, “Jesu kaheuvin, Peter,John teho jong kaheuve.Hinla, nangho koi nahiu kahepouve” tin adonbut un, athu’vin anungpouve akiti.

Jesu Christa-a hinnanei Lhagao Theng chenpihon, “Halleluiyah, Amen” hi asap tengle lenkhom lasah, tao ho anomjin, lhamon le kipa aumjin, lhagaoboh hon jong aging’uve. Hinla, Jesu Christa neilouhon asap’ule apanna aumpon, Israelte thusompeh na a “Na Pathen min moh phahpoh hih in” tina-a joh mandia pha, moh a sap lou pha ahin kagele.

Golte,kipehdoh le Jesu Christa Leng le Huhhingpua kisanna taona kahinso ho sima  ‘Amen’ tia sang nahitahle, keima thu le thaneina hilouva, Pathenthu (Bible seibanga) thaneina-a Pathen cha – Jesu Christa nei nahitai. Taojingin, natao tengle ‘Halleluiyah, Amen” tijin. Natao anop le tuibehseh lout eng jongle, ‘Halleluiyah, Amen” hi samnon jenginlang, nalung pumpi pen, imachadang gellouvin, tanglouvin minute 5 – 10 seisei jengin, chuteng natao hung nomin tin, Lhagao Theng panpina nachanding ahi. Hitia chu, Pathen phattheibohna nachan ding ahi.

Golte, “Halleluiyah, Amen”  hi Christiante, namjouse ho dia, pao kibang Pathen vahchoina kibang(Common) ahitai. Pao le nam in eikhenlouva, thucheng lhomcha “Halleluiyah, Amen”  ahi Pathen i-vahchoitheinau ahi. Jana neitah, athengtah in gelinlang, moh sei le mohsap hih beh in, taona le taotengle bou seijin.

Jesu Christa chu Leng le Huhhingpu-a naneiya, Pathen cha nahitahle ‘Amen’ jih in. Pathenin phatthei naboh jingtahen.

Na chonsetna kingaidam ahitai

Golte, Pathen in phattheina lhingset Jesu Christa minin napehenuo. Hiche thu hi siminlang, phattheina chanbetan.

“Pathenin hibanga hi vannoi angailut jeh in Achapa neisun(Jesu Christa) chu apetai, hichu, Ama tahsan chan mangthah louva tonsot hinna aneitheina ding joh ahi.” — John 3:16 Hiche chang hi alomlomin ven athudihsei nahetchetna din:

“Pathenin hibanga hi vannoi angailut jeh in...”  Hichea “vannoi” kiti hin nang le leiset chunga mimaltin (mijouse khat khat cheh a) ahoptha ahi. Pathen in nangma nangailut ahin, chule, abana chang hin itobanga nangailut ham chu avetsah ahi:

“... Achapa neisun chu apetai ...” Pathen in nangailut behseh jeh a Achapa neisun chu ahinpeh ahitai.(Romans 5:8). Jesu Christa, Pathen Chapa, chun Cross a athia chu nachonset man chu apeh ahitai ( tichu, nachonset jeh a nathiding khela Ama kipea, thia, na lha ong ahitai, nangma thi ngaitalou ahitai),chule, Athi chu khatveiya thichai ahitai( velthi ngaitalou ahi). Hijeh achu, Athi kona chu, “akichaitai” atia aphondoh ahi.(John 19:30), hichu, nang le kei eilhatdohnau (Huhhingna) kin chu achaisoh (kichaisoh) ahitai tina ahi.

Jesu “Pathen Cha” ahina chu Pathen to-bang ahina ahi. Hijeh achu, Theologian hon “Pathena mithum”(Trinity) atiu – Apa, Acha, chule, Lhagao Theng atinauva hi khat ahi. Hinla, Jesu chun, Pathen-tokibang  (John 1:1-3;10:30) ahijeng vangin, mihem banga hina neiyin ahungin, nang le keidin lunglhaiselin ahung thitai(Philippians 2:5-8). Hichu, nang le kei damna ding ahi.

“... koihile atahsan chan mangthah louva...” tihin,Jesus Christ chu Pathen Chapa ahi, natahsana, na-Huhhingpua nakisanle nachonset jeh a tonsot a nathohgimna (Pathen-a kona manthahna) ding chu nathohlou ding (ongdoh) nahitai, ajehchu, nathoh ding chu Jesu’n cross chunga anathoh tai.

“... tonsot hinna anei joh diu ahi.” Jesu Christa chu natahsanle, tonsot a thina le Pathen-to kikhenna hilouva, tonsot a hinna nanei joh ding ahi. nstead of eternal death and separation from God, you will have eternal life the moment you trust Christ. Nahetthei ding chu:

Na chonsetna kingaidam ahitai (Colossians 1:14), Pathen cha nahitai (John 1:12), tonsot hinna nanei tai (John 3:16)

Pathen cha nahitahle, Pathen thangvahnan ‘Amen’ jih in. Pathen in umpi jingtan.

Tahsanlouhon atahsan theina diuva pan ladia temna

Golte, Pathen in phatthei naboh henlang, Alenggam kehjaona din pan latheiyin napanpihen.

Pathen leng gama natong ho taopeh in, Pathen in phatthei naboh ding ahi.

Thiljouse hi aumlouva kona Pathen in asem ahi. Jesu Christa lhatdamna nachantahle, Ama kina pan lathei nahitai. I-macha nanei masah angaipoi. Jesu-a hinna, Lhagao Theng nanei bou chu thupi ahi. Chutengle, Pathen cha nahina-a Ama lenggam keh jaona dia pan nalah nomle na lahthei ahi – Taona le thilpeh a; akalsongthei kalsongin.

School, College le adang jillaite dia sum le pai tothei ahipoi. Taonan pangin. Pharao lungtah sunema, Peter teho kihenna khao kilhapsahpa Hatchungung Pathen in thilkidang abola, tahsanlou hon ahintahsa theina diuva alungu heisahna din Pathen koma taovute.

 Taovin :

“Pakai,ngailutna jala Nacha neiso jalin namin kathangvah e. Tun, nangma muloulaihon ahinmutheina diuvin, pan neilahsah in, neipanpin. Chihna, themna, nei le gou, thil jouse nanga ahi. Katha kason theina din thahat neipen, nei le gou katotheina din neipanpin. Na lenggama dia natong ho thahatna pen. Sum le pai, nei le gou, damtheina, na phattheina chu pen. Thil le lo toh thei din nei panpiuvin, atohthei ding ho hinsol in. Kei jong pan lathei din neipanpin. Nangma muloulai jousen nangma nahin mu’va, vannoi pumpi nalenggam asona din nei panpiuvin; na hatna hinson tia ei huhhing ka Pakai Jesu Christa minin kataove, Amen”.

Sibergool khoa mite hi ‘Chorei Kuki’ akitiuve. Hrangkhol,Khelma(Sakachep),Biate, ho pao tobang amanguve. Eiho pao iman jongle aheve. Hinla, khatcha Christian umlou ahiuve. Christmas chu Pastor H.Haolai in eipuiyun, kalung atongkha lheh jenge. Chin-Kuki-Mizo sunga hohi Christian ihigam thimu hitam kiti chu amahohi hiloulai ahiuve.

Lamkaihon eingeh banguva pan ladia tem ihiuve. Mijouse, anei le aneilou – Jesu nei jousen pan lahthei ahi. Thilpeh, ahiloule, taona a napanthei ahi.

Bengalee lah, Karimganj district (Assam) sung ahin. Asopiu Kuki dang umjong hevah lou ahiuvin. Tu masang jep chun ahinheuvin, eikouvui. Bengali School bou aneiyun, English ahenom’uve. Kuki Inpi ahin houvun, lamkaiho pan lahna-a konin Kuki Inpi Barak Valley aphutdoh un; kihettona jalin Gam lenthimtah KCC Assam Synod apeuvin, School phu ahitai. Pastor ni akoiyun. Tukuma kona hi English school ahonpat’u ahitai. School in sahchai ahitan. Convent a kona kijil – Lasah, Lam le adang jong hilthei Teacher ngaichat le hol ahi. Teacher ho umna ding, jun-in,eh-in sahding ngai; electric kisuh lou Generator ngai; tuichopna ding machine ngai. Pathen La ho hilna ding, Jesu Christa film ho vetsahna dia manchah ngai. Synod hin hitiho bolna ding hi gonmasahna le budget semna ana neilou lai ahi. Thil hung um to kitoh a pan alah jeng bou ahin, hitia gamthah natoh jengna dinga hi Synod dinmun hahsa ahi. Hinla, Pakai lenggam kehjaona dia Pathen in kot ahon ahijala, pankhomna kinepna jala abol jengu ahi. Kei jong Houbung lamkai hilou, Synod lamkai jong hilou kahi. Hinla, Pakai cha kahi jala pan lahnatheiya pan lanom kahi. Panpiute. Mijouse itiba Hou lhacha kihi ding ham, tohna chomcheh tong hon jong pan lahna thei inei cheh ui. Koima Houbung ti ngailou, Jesu Christa atahsan diu bout up ding ahi.

Ka hunglhunun Pastorpun aseiyule, mi konkhat in – Dangka Sangkhat, Sangni, janga,jani, cheng ahin toh’uvin; pehdia kitep loi jong aumuve. Pumping machine choding jong uma ahitai.

Lamkaihon eingeh banguva, Tonom naneile hin hetsah in, message hinthot in. KCC Assam Synod Office, Songpijang hinhetsah in. Kei neihetsah’ule kahetsahson thei ahi. Thil natothei loule taonan pangin. Pathen ahin hetna diuva, Pharaoh lungtah nemsahpa Pathen in alungu asuhnemna din taopeh in, jing le nilhah in taona neiyin. Taona hi thahattah ahi. Phatecha natao jingle Pathen in, alungu kihei jengthei ahi. Chujongle, sum le thil tohthei midang ahinsoldoh jengthei ahi. Chule “Lah sangin peh ochat aumjoi” kiti hi dihtah ahi. Mi napehle, Pathen in lamchom beh a jong phatthei nabohthei ahi. Chule, midang dinga taona imanchanna eima kihatcheh cheh ahi.

Hiche muna natoh hi – Jesu Christa helou nahetsahna ahin; nasopi gammang naholdohna jong ahi. Pan hinla jouse jihdoh a, kihettoa, kitaopeh-to ding lamkaiho dei ahi.

Sibergool koma hin Chorei kho Bodrogool le adang jong a umin, hiche kho miteho jong hi school hung kaidiu ahi. Bodrogool ahin missionary khat anachen Houin jong anasan, hinla, apanpi ding amujoulou phatna gentheival tah a adonda Houin jong lhu ahitai. Haosapu’n hichelai mun(gam) jong chu Synod hin alah a amanchah din eiseipeh’uve.

Jesu Christa tahsan loulai ahivangun, ginna le Pathen hattah ahi atahsanui. Hiche Pathen mina kipesa chu mihem in alahkit ngailou ahisah un, aging lheh jengun ahi. Hetchetsah hi eiho kin ahi. Bible in aseiye :

Ajehchu, “koihile Pakai Amina kou chan chu huhhinga umding ahi.” Chuti ahile, iti atahsan loupau chu akou thei diu ham? Chule, athu ajah khahlou pau chu iti atahsan thei diu ham?  Chule, mi aseipeh’uva aumloule iti athudol ajah thei diu ham? Chule, asola aum loule koiyin aga seithei ding ham (Rome 10: 13-15)

Chuti ahijeh chun, amuna gaseithei kisol ho le ahin nailut theina diuva school kikoiya natong ho din taona le nei le gout oh in pangute.

Pathen mina Taona ham thilpeh hama pan ladia na nople Pathen thangvah nan ‘Amen’ jih in. Pathen in na umpi jing tahen.

Taona thahatje

Golte, taona hi kidangtah a natongthei ahi. Bible in : “Nalah’uve athoh gima umam? Ama chu taohen. Kipah thanoma umam? Vahchoila ashen. Nalah’uva damlou umam? Amachun Houbung upaho kouhen; amahon Pakai minin thao nu’hen; achunga ,taovuhen. Chutile tahsan a taona chun anapa chu damsah intin, chule Pakaiyin ama chu akaithouding ahi; chule achonsea hijongle hichu suhbeiya umding ahi.Hijehchun, nadam theina dingun khat in khat koma nachonset phongun.Khat le khat kitaopehto jiuvin. Michonpha mitaopehna chu thil nasatah bolthei ahi”(James 5:13-15)

Golte, taona hi kidangtah a natongthei ahi. Hahsatna natoteng, adang nagel masangin, aguh in beh taovin. Houbung upa, ahilole, koitobang atahsanmi ahinahle, nagol khat hijongle kitao sah in, ama phat le phatlou don hih in, nangma tahsan joh chu khohjo ahi. Taona chu Pakaiyin asa’n teiding natahsanle, nasan peh jeng ding ahi. Nagolpa/nu mipha ahijeh a ataona Pakaiyin asa’n hilouva, nangma tahsan jal’a asa’n joh ahi. Nang jong taovin lang, guhthimbeh in nachonset, nasuhkhel ( adang aumloule natahsan lhom jeh beh chu) ngaidam thumin. Taona Pakaiyin asa’na nakipah tengle kipathu taona’n lhut kit inlang, Pakai vahchoina La, nalung beh in, sa’n. Tu’n jong, ipi ham khat beh thumnan taovin, Jesu Christa chu na Leng le na huhhingpu, na Pakai ahi chu phongdoh jingin lang, panpina thum jingin, na loi le gol, insungmi le adangdin jong taovin.

Hitia chu na taole ‘Amen’ jih in. Pathen in phatthei naboh tahen.